মণিপুৰত পুনৰ হিংসাই ভয়ংকৰ ৰূপ ধাৰণ কৰিছে। জিৰিবাম আৰু তামেংলং জিলাৰ সীমান্তৱৰ্তী অঞ্চলত নতুনকৈ সংঘটিত হিংসাত্মক ঘটনাত দুগৰাকী আদিবাসী মহিলাক গুলীয়াই হত্যা কৰাৰ অভিযোগ উঠিছে। মঙলবাৰে দুপৰীয়া জিৰিবাম জিলাৰ লেইসাং কুকি গাঁৱত এই আক্ৰমণ সংঘটিত হোৱা বুলি জানিব পৰা গৈছে। এই ঘটনাৰ পাছতে অঞ্চলটোত কেইবাটাও খামাৰঘৰ জ্বলাই দিয়া হয় বুলিও খবৰ পোৱা গৈছে। নতুনকৈ সংঘটিত এই ৰক্তক্ষয়ী ঘটনাই সীমান্তৱৰ্তী অঞ্চলৰ বাসিন্দাসকলৰ মাজত তীব্ৰ আতংকৰ সৃষ্টি কৰাৰ লগতে সাধাৰণ লোকৰ নিৰাপত্তাক লৈ পুনৰ প্ৰশ্ন উত্থাপন কৰিছে।
স্থানীয় লোক আৰু আৰক্ষীৰ তথ্য অনুসৰি, মঙলবাৰে প্ৰায় ৩ বজাত দুগৰাকী মহিলা প্ৰতিদিনৰ দৰে নিজৰ পথাৰলৈ কাম কৰিবলৈ গৈছিল। সেই সময়তে তেওঁলোকৰ ওপৰত আক্ৰমণ চলোৱা হয়। নিহত দুগৰাকী মহিলাৰ পৰিচয় ৬০ বছৰীয়া চঙ্গা সিতলৌ আৰু ৩০ বছৰীয়া কিম্বোই সিঙ্গসন বুলি জানিব পৰা গৈছে। দুয়োগৰাকী লেইসাং গাঁৱৰ বাসিন্দা আছিল।
জানিব পৰা মতে, চঙ্গা সিতলৌ নিজৰ খেতিপথাৰত কাঠ সংগ্ৰহ কৰি থকাৰ সময়তে গুলীৰ আঘাতত নিহত হয়। আনহাতে, কিম্বোই সিঙ্গসনে শেহতীয়াকৈ নাৰ্ছিংৰ শিক্ষা সম্পূৰ্ণ কৰি ঘৰলৈ উভতি আহিছিল। তেওঁ পিতৃ-মাতৃক খেতিৰ কামত সহায় কৰি আছিল। আক্ৰমণৰ সময়ত তেওঁকো গুলীয়াই হত্যা কৰা হয় বুলি স্থানীয় সূত্ৰই জনাইছে।
এই আক্ৰমণৰ সময়ত আন বহু লোকো নিজৰ নিজৰ খেতিপথাৰত কাম কৰিবলৈ গৈছিল। তেওঁলোকৰ মাজৰ কেইবাজনো লোক এতিয়াও সন্ধানহীন হৈ আছে বুলি জানিব পৰা গৈছে। অৱশ্যে সন্ধানহীন লোকৰ সঠিক সংখ্যা আৰু মুঠ হতাহতৰ সম্পূৰ্ণ তথ্য এতিয়াও স্পষ্ট হোৱা নাই। দুৰ্গম অঞ্চল হোৱাৰ বাবে ঘটনাস্থলীৰ পৰা সম্পূৰ্ণ তথ্য আহিবলৈ কিছু সময় লাগিছে।
ইয়াৰ আগতেও যোৱা কেইবাদিন ধৰি মণিপুৰৰ এই অশান্ত অঞ্চলত ধাৰাবাহিকভাৱে হিংসাৰ ঘটনা সংঘটিত হৈ আহিছে। ১৩ ছেপ্টেম্বৰত তামেংলং জিলাৰ টোলেন গাঁও আৰু নোনে জিলাৰ লংপি গাঁৱত পৃথক আক্ৰমণত এহাল দম্পতীসহ চাৰিজন আদিবাসী লোক নিহত হৈছিল বুলি খবৰ পোৱা গৈছিল। সেই ঘটনাৰ দুদিনৰ পাছতেই লেইসাং গাঁৱত দুগৰাকী মহিলাৰ হত্যাই অঞ্চলটোত পুনৰ উত্তেজনা বৃদ্ধি কৰিছে।
ধাৰাবাহিক এই হত্যাকাণ্ডক লৈ বিভিন্ন মহলত উদ্বেগ আৰু ক্ষোভ বৃদ্ধি পাইছে। ১৩ ছেপ্টেম্বৰৰ ঘটনাৰ পাছতে এই বিষয়ত ৰাষ্ট্ৰীয় অনুসন্ধান সংস্থা অৰ্থাৎ এনআইএৰ জৰিয়তে উচ্চ পৰ্যায়ৰ তদন্ত চলোৱাৰ দাবীও উত্থাপন হৈছিল।
ইফালে, টোলেন, লংপি আৰু এতিয়া লেইসাং-একে অঞ্চলত একেৰাহে সংঘটিত আক্ৰমণক লৈ কুকি-জো সমাজৰ সংগঠনসমূহে অধিক সক্ৰিয় হৈছে। পাহাৰীয়া আৰু সীমান্তৱৰ্তী বিপদসংকুল বসতিসমূহত অতিৰিক্ত নিৰাপত্তা বাহিনী মোতায়েন, আক্ৰমণৰ সৈতে জড়িত লোকসকলৰ বিৰুদ্ধে কঠোৰ আইনগত ব্যৱস্থা আৰু নিৰ্দিষ্ট সময়ৰ ভিতৰত সম্পূৰ্ণ তদন্তৰ দাবী উত্থাপন কৰা হৈছে।
মণিপুৰত সংঘাতৰ পৰিৱেশৰ মাজতে পুনৰ এনে আক্ৰমণ সংঘটিত হোৱাই অঞ্চলটোৰ সাধাৰণ জনতাৰ নিৰাপত্তাক লৈ নতুনকৈ আশংকাৰ সৃষ্টি কৰিছে। বিশেষকৈ খেতিপথাৰলৈ যোৱা সাধাৰণ লোকসকলেই আক্ৰমণৰ লক্ষ্য হৈ পৰাত সীমান্তৱৰ্তী গাঁওসমূহত ভয় আৰু অনিশ্চয়তা অধিক গভীৰ হোৱা দেখা গৈছে।
