শ্লীলতাহানিৰ গোচৰত জড়িত হৈছিল তেওঁৰ নাম। তেওঁৰ বাগদত্তাইও প্ৰতাৰণাৰ অভিযোগ উত্থাপন কৰিছিল। অৱশেষত পৃথ্বী শ্ব’ৰ এংগেজমেণ্ট ভাঙি গ’ল। বৃহস্পতিবাৰে ক্ৰিকেটাৰগৰাকীৰ বাগদত্তা আকৃতি আগৰৱালাই এংগেজমেণ্ট ভাঙি দিয়াৰ কথা ঘোষণা কৰে। অৱশ্যে এই সিদ্ধান্তৰ কাৰণ সন্দৰ্ভত আকৃতিয়ে মুখ খোলা নাই। মাত্ৰ ৬ মাহতে তেওঁলোকৰ এংগেজমেণ্ট কিয় ভাঙিল তাক লৈ ইণ্টাৰনেটত চৰ্চা চলি আছে।
টি-২০ বিশ্বকাপৰ ফাইনেলৰ দিনা পৃথ্বীয়ে ছ’চিয়েল মিডিয়াত আকৃতিৰ সৈতে এংগেজমেণ্টৰ খবৰ ঘোষণা কৰে। তেওঁ দীৰ্ঘদিন ধৰি জাতীয় দলৰ পৰা আঁতৰি আছে। অৱশ্যে এইবাৰৰ আই পি এলত তেওঁক দললৈ মাতে দিল্লী কেপিটেলছে।
ক্ৰিকেট অনুৰাগীসকলে ভাবি আছিল যে প্ৰেম জীৱনত থিতাপি লোৱাৰ পিছত পৃথ্বীয়ে হয়তো পুনৰ আগৰ দৰে ক্ৰিকেটত মনোনিৱেশ কৰিব পাৰিব। তেওঁ নিজৰ প্ৰতিভাৰ সৈতে ন্যায় কৰিব। এটা সময়ত পৃথ্বীক শচীন তেণ্ডুলকাৰৰ লগত তুলনা কৰা হৈছিল। কিন্তু পৃথ্বীৰ কেৰিয়াৰ নিম্নগামী হৈ পৰিল।
‘অবাধ্য’ লেবেলটো মচি পেলোৱাৰ এক তীব্ৰ প্ৰয়াসৰ মাজতে পৃথ্বীৰ ব্যক্তিগত জীৱন ক্ষতিগ্ৰস্ত হ’বলৈ ধৰিলে। প্ৰায় তিনিমাহ পূৰ্বে হঠাৎ তেওঁৰ বাগদত্তা আকৃতিয়ে ইনষ্টাগ্ৰামত পোষ্ট কৰিছিল। তেওঁৰ বাৰ্তা আছিল, ‘আগতেও মোক বহুবাৰ প্ৰতাৰণা কৰা হৈছে। কিন্তু মই কেতিয়াও মুকলিকৈ কোৱা নাছিলো। এতিয়াও বিশ্বাস কৰিব পৰা নাই, ইমান দূৰলৈ অহাৰ পিছত…’ ।
প’ষ্টত পৃথ্বীৰ নাম নাছিল যদিও নেটিজেনে ধৰি লৈছিল যে পৃথ্বীয়ে এংগেজমেণ্টৰ পিছতো তেওঁক প্ৰতাৰণা কৰিছিল। ইয়াৰ সমান্তৰালকৈ আকৃতিয়ে লিখিছে, ‘সকলো গুঞ্জন সঁচা আছিল। ছ’চিয়েল মিডিয়াত তেওঁৰ বিষয়ে দেখা সকলো কথা সঁচা।’
নেটজগতৰ বহুতেই দাবী কৰে যে আকৃতিয়ে ছ’চিয়েল মিডিয়াত প’ষ্টৰ জৰিয়তে পৃথ্বী আন কাৰোবাৰ সম্পৰ্কত আছে বুলি জানিব পাৰিছিল। সেইবাবেই তেওঁ এনে এটা পোষ্ট দিয়ে। পিছত অৱশ্যে আকৃতিয়ে সেই পোষ্টটো ডিলিট কৰি দিয়ে।
সেই ঘটনাৰ তিনিমাহ পিছত আকৃতিয়ে ঘোষণা কৰিলে যে তেওঁলোকৰ এংগেজমেণ্ট ভাঙিছে। ইনষ্টাগ্ৰামত তেওঁৰ বাৰ্তা আছিল যে তেওঁলোকে ইজনে সিজনক ভাল পালেও একেলগে খোজ দিয়াটো সম্ভৱ নহয়। সেইবাবেই তেওঁলোকে পৃথক হোৱাৰ সিদ্ধান্ত লৈছে।
এই সন্দৰ্ভত প্ৰশ্ন কৰি তেওঁলোকক বিব্ৰতত নকৰিবলৈও আকৃতিয়ে আহ্বান জনাইছে। কিন্তু ৬ মাহৰ ভিতৰতে কিয় সম্পৰ্ক বিচ্ছিন্ন হ’ল সেই চৰ্চা বন্ধ হোৱা নাই।
