জুবিন দিৱসৰ পৱিত্ৰ ক্ষণত অসম আৰু নাগালেণ্ডৰ সীমান্তৱৰ্তী অঞ্চললৈ এক নতুন আশাৰ বতৰা কঢ়িয়াই আনিছে এখন ঐতিহাসিক চুক্তিয়ে। সৰুপথাৰ সমষ্টিৰ বিধায়ক বিশ্বজিৎ ফুকন আৰু নাগালেণ্ডৰ ভাণ্ডাৰী সমষ্টিৰ বিধায়ক আছুম্বেমো কিকনৰ মাজত এক গুৰুত্বপূৰ্ণ বৈঠক অনুষ্ঠিত হয়।
আলোচনাৰ এক বিশেষ অংশ হিচাপে অসম-নাগালেণ্ড সীমান্তত এখন জুবিন গাৰ্গ নাহৰ উদ্যান স্থাপনৰ প্ৰস্তাৱ গ্ৰহণ কৰা হয়। প্ৰয়াত শিল্পী জুবিন গাৰ্গৰ স্মৃতিত আৰু অসমীয়া সংগীত তথা সংস্কৃতিলৈ তেখেতে আগবঢ়োৱা অৱদানক চিৰযুগমীয়া কৰি ৰাখিবলৈ এই উদ্যানখন নিৰ্মাণৰ পৰিকল্পনা কৰা হৈছে। ইয়াৰ লগতে দুয়োগৰাকী বিধায়কে শান্তি আৰু সম্প্ৰীতিৰ এখন চুক্তিতো আনুষ্ঠানিকভাৱে স্বাক্ষৰ কৰে। সীমান্তৱৰ্তী অঞ্চলসমূহত শান্তিপূৰ্ণ পৰিৱেশ অটুট ৰখা আৰু দুয়োখন ৰাজ্যৰ জনসাধাৰণৰ মাজত সহযোগিতা বৃদ্ধিৰ বাবে এই চুক্তিত বিশেষ গুৰুত্ব আৰোপ কৰা হৈছে। এই লক্ষ্যত উপনীত হোৱাৰ বাবে এখন যুটীয়া শান্তি আৰু সমন্বয় সমিতি গঠনৰ প্ৰস্তাৱো আগবঢ়োৱা হৈছে, যিয়ে দুয়োটা পক্ষৰ মাজত সু-সমন্বয় গঢ়ি তোলাত সহায় কৰিব।
এই চুক্তিৰ জৰিয়তে দুয়োখন ৰাজ্যৰ মাজত বৈধ অৰ্থনৈতিক কাৰ্যকলাপ বৃদ্ধি, সাংস্কৃতিক বিনিময় আৰু পাৰস্পৰিক সম্পৰ্ক শক্তিশালী কৰাৰ ওপৰতো গুৰুত্ব প্ৰদান কৰা হৈছে। দুয়োগৰাকী বিধায়কে একমত প্ৰকাশ কৰে যে সীমান্তত উদ্ভৱ হোৱা যিকোনো ভুল বুজাবুজি বা সমস্যা সংঘাতৰ পৰিৱৰ্তে কেৱল আলোচনা আৰু বুজাবুজিৰ জৰিয়তে সমাধান কৰা উচিত। সীমান্তৰ জনসাধাৰণে যাতে সুকলমে নিজৰ জীৱিকা নিৰ্বাহ কৰিব পাৰে আৰু আইনসন্মতভাৱে অৰ্থনৈতিক কাম-কাজ চলাই যাব পাৰে, তাৰ বাবে দুয়োটা পক্ষৰ মাজত অধিক সমন্বয়ৰ প্ৰয়োজনীয়তাৰ বিষয়েও বৈঠকত বিতংভাৱে আলোচনা কৰা হয়।
শিল্পী জুবিন গাৰ্গৰ স্মৃতিত পালন কৰা জুবিন দিৱসৰ লগত সংগতি ৰাখি অনুষ্ঠিত হোৱা এই বৈঠকত দুয়োখন ৰাজ্যৰ জনসাধাৰণৰ মাজত থকা সুগভীৰ সাংস্কৃতিক সম্পৰ্কৰ কথা পুনৰবাৰ প্ৰতিফলিত হয়। অসম-নাগালেণ্ড সীমান্তত বসবাস কৰা লোকসকলৰ মাজত দীৰ্ঘদিন ধৰি এক সু-সমন্বয়ৰ প্ৰয়োজনীয়তা আহি পৰিছিল আৰু এই পদক্ষেপে সেই দিশত এক যোগাত্মক পৰিৱেশৰ সৃষ্টি কৰিব। সীমান্তৰ জনসাধাৰণৰ জীৱনত প্ৰভাৱ পেলোৱা বিভিন্ন বিষয়ত নিৰন্তৰ আলোচনা, সাংস্কৃতিক আদান-প্ৰদান আৰু সহযোগিতাৰ বাবে এই চুক্তিয়ে এক সুন্দৰ আৰু স্থায়ী মঞ্চ প্ৰস্তুত কৰি তুলিব বুলি দুয়োটা পক্ষই আশা প্ৰকাশ কৰিছে।
