২০২৬ চনৰ অসম বিধানসভা নিৰ্বাচনত ব্যৱহৃত ইভিএমৰ বিশ্বাসযোগ্যতা আৰু আইনী গ্ৰহণযোগ্যতাক প্ৰত্যাহ্বান জনাই দাখিল কৰা এখন ৰাজহুৱা স্বাৰ্থজড়িত আৱেদনৰ পৰৱৰ্তী শুনানিৰ দিন গুৱাহাটী উচ্চ ন্যায়ালয়ে অহা ৪ নৱেম্বৰত ধাৰ্য কৰিছে। মুখ্য ন্যায়াধীশ আশুতোষ কুমাৰৰ নেতৃত্বাধীন বিচাৰপীঠে যোৱা ১৮ ছেপ্টেম্বৰত আৱেদনখনৰ গ্ৰহণযোগ্যতা সন্দৰ্ভত প্ৰাথমিক শুনানি গ্ৰহণ কৰে। অসম জাতীয় পৰিষদৰ নেতা জিয়াউৰ ৰহমান আৰু কংগ্ৰেছ নেতা গুপ্তমণি শৰ্মা তথা ৰিপুন বৰাই যুটীয়াভাৱে দাখিল কৰা এই আৱেদনত ইভিএমত ব্যৱহৃত ছেমিকণ্ডাক্টৰ প্ৰযুক্তি, মাইক্ৰ’চিপ, ইয়াৰ ছ’ৰ্চ ক’ড আৰু প্ৰগ্ৰেমিঙৰ স্বচ্ছতাক লৈ গুৰুতৰ প্ৰশ্ন উত্থাপন কৰা হৈছে।
আৱেদনখনত জাপানী ছেমিকণ্ডাক্টৰ কোম্পানী ৰেনেছাছ ইলেক্ট্ৰনিকছ আৰু অসমৰ ছেমিকণ্ডাক্টৰ বিনিয়োগ প্ৰচেষ্টাৰ মাজত থকা এক কথিত সম্পৰ্কক লৈয়ো প্ৰশ্ন উত্থাপন কৰা হৈছে। আৱেদনকাৰী ৰহমানে দাবী কৰা অনুসৰি, ২০২৫ চনৰ জানুৱাৰী মাহত মুখ্যমন্ত্ৰী হিমন্ত বিশ্ব শৰ্মাই জাপান ভ্ৰমণৰ সময়ত ২২ জানুৱাৰীত টকিঅ’ত কোম্পানীটোৰ প্ৰতিনিধিসকলৰ সৈতে বৈঠকত মিলিত হৈছিল। নিৰ্বাচনৰ ভোটগ্ৰহণৰ পাছত আৰু ভোটগণনাৰ পূৰ্বে মুখ্যমন্ত্ৰীগৰাকীয়ে কৰা এই ভ্ৰমণৰ সময়ক লৈ আৱেদনকাৰীয়ে ন্যায়িক নিৰীক্ষণৰ দাবী জনাইছে। অৱশ্যে, এই অভিযোগসমূহ কেৱল আৱেদনখনৰ অংশহে আৰু উচ্চ ন্যায়ালয়ে বৰ্তমানলৈকে মুখ্যমন্ত্ৰীৰ ভ্ৰমণৰ সৈতে ইভিএমৰ কাৰ্যক্ষমতা বা সুৰক্ষাৰ কোনো প্ৰত্যক্ষ সম্পৰ্ক থকাৰ কথা নিশ্চিত কৰা নাই।
জিয়াউৰ ৰহমানৰ মতে, এই আৱেদনখন ইভিএমৰ নিৰ্ভৰযোগ্যতাক লৈ পূৰ্বে উত্থাপিত সাধাৰণ প্ৰশ্নবোৰতকৈ পৃথক। ইয়াত মূলতঃ মেচিনৰ ভিতৰত থকা ছেমিকণ্ডাক্টৰ আৰু মাইক্ৰ’চিপসমূহৰ ওপৰত আলোকপাত কৰা হৈছে আৰু ইয়াৰ প্ৰগ্ৰেমিং স্বতন্ত্ৰভাৱে পৰীক্ষা কৰিব পাৰি নে নোৱাৰি, তাক লৈ প্ৰশ্ন কৰা হৈছে। ইভিএম প্ৰযুক্তিৰ প্ৰগ্ৰেমিং আৰু ছ’ৰ্চ ক’ড ৰাজহুৱা নিৰীক্ষণৰ বাবে কিয় উপলব্ধ নহয়, সেয়াও আৱেদনকাৰীয়ে প্ৰশ্ন কৰিছে। ৰহমানে দাবী কৰা মতে, নিৰ্বাচন আয়োগে প্ৰাসংগিক ছ’ৰ্চ ক’ড ৰাজহুৱা কৰা নাই আৰু এক তথ্য জনাৰ অধিকাৰ আবেদনৰ উত্তৰত ইয়াক ৰাষ্ট্ৰীয় সুৰক্ষাৰ সৈতে জড়িত বিষয় বুলি শ্ৰেণীভুক্ত কৰিছে বুলি দাবী কৰা হৈছে। ইয়াৰ উপৰি, নিৰ্বাচনৰ দিনা নিৰ্দিষ্ট এটা সময়ত কেইবাটাও সমষ্টিত ভোটদানৰ হাৰ সম্পূৰ্ণ একেই থকা বুলি আৱেদনকাৰীয়ে দাবী কৰিছে আৰু ইয়াক ন্যায়িক নিৰীক্ষণৰ আওতালৈ অনাৰ আহ্বান জনাইছে।
