নগাঁও লোকসভা সমষ্টিৰ উপ-নিৰ্বাচনৰ প্ৰচাৰৰ সময়ত ২১ ছেপ্টেম্বৰত চামগুৰিৰ বৰমা বজাৰত কংগ্ৰেছৰ কনভয়ৰ ওপৰত সংঘটিত আক্ৰমণৰ ঘটনাক লৈ পুনৰ সৰৱ হৈ পৰিছে অসম প্ৰদেশ কংগ্ৰেছ কমিটি। এই ঘটনাক লৈ নগাঁৱৰ জিলা নিৰ্বাচনী বিষয়াৰ কাৰ্যালয়ে জাৰি কৰা প্ৰেছ বিজ্ঞপ্তিত আপত্তি প্ৰকাশ কৰি কংগ্ৰেছে ভাৰতীয় নিৰ্বাচন আয়োগলৈ জৰুৰী পত্ৰ প্ৰেৰণ কৰিছে। মুক্ত, নিকা আৰু নিৰাপদ নিৰ্বাচন অনুষ্ঠিত কৰাৰ স্বাৰ্থত নগাঁৱৰ বৰ্তমানৰ জিলা আয়ুক্ত তথা জিলা নিৰ্বাচনী বিষয়াক নিৰ্বাচনী দায়িত্বৰ পৰা তাৎক্ষণিকভাৱে অপসাৰণ কৰি বদলি কৰাৰ দাবী জনাইছে দলটোৱে।
প্ৰদেশ কংগ্ৰেছৰ সাধাৰণ সম্পাদক (প্ৰশাসন) বিপুল গগৈয়ে বুধবাৰে নিৰ্বাচন আয়োগলৈ প্ৰেৰণ কৰা পত্ৰত অভিযোগ কৰে যে ২১ ছেপ্টেম্বৰৰ আক্ৰমণ কোনো আকস্মিক ঘটনা নাছিল। কংগ্ৰেছৰ দাবী অনুসৰি, ঘটনাৰ পূৰ্বেই প্ৰশাসনক একাধিকবাৰ সম্ভাব্য আক্ৰমণৰ বিষয়ে সতৰ্ক কৰা হৈছিল। সাংসদ ৰকিবুল হুছেইনে নগাঁৱৰ জিলা আয়ুক্তক বৰমা বজাৰত একাংশ লোক সমবেত হোৱা আৰু শিলগুটি আদি আক্ৰমণৰ সামগ্ৰী মজুত ৰখাৰ বিষয়ে আগতীয়াকৈ অৱগত কৰিছিল বুলিও পত্ৰখনত উল্লেখ কৰা হৈছে।
কংগ্ৰেছে দাবী কৰে যে জিলা আয়ুক্তই সকলো প্ৰয়োজনীয় ব্যৱস্থা গ্ৰহণ কৰা হৈছে বুলি আশ্বাস দিয়াৰ পাছতো ঘটনাস্থলীত পৰ্যাপ্ত নিৰাপত্তা ব্যৱস্থা দেখা নাছিল। ইয়াৰ উপৰি ৰকিবুল হুছেইনে নগাঁৱৰ আৰক্ষী অধীক্ষক আৰু অতিৰিক্ত আৰক্ষী অধীক্ষক ৰজী তালুকদাৰৰ সৈতেও কেইবাবাৰো যোগাযোগ কৰি ছত্তীশগড়ৰ প্ৰাক্তন মুখ্যমন্ত্ৰী ভূপেশ বাঘেলসহ কংগ্ৰেছৰ জ্যেষ্ঠ নেতাসকলৰ ভ্ৰমণৰ সময়ত সম্ভাব্য নিৰাপত্তাজনিত সমস্যাৰ বিষয়ে সতৰ্ক কৰা হৈছিল বুলি দলটোৱে জানিবলৈ দিয়ে। প্ৰয়োজন হ’লে এই বিষয়াসকললৈ কৰা ফোনকলৰ তথ্যও নিৰ্বাচন আয়োগৰ ওচৰত দাখিল কৰিবলৈ সাজু বুলি কংগ্ৰেছে পত্ৰত উল্লেখ কৰিছে।
ইফালে, জিলা নিৰ্বাচনী বিষয়াৰ কাৰ্যালয়ে জাৰি কৰা প্ৰেছ বিজ্ঞপ্তিৰো তীব্ৰ সমালোচনা কৰিছে কংগ্ৰেছে। দলটোৰ অভিযোগ, প্ৰশাসনে ঘটনাটোৰ গুৰুত্ব কমাই দেখুওৱাৰ চেষ্টা কৰিছে। শিলগুটি আৰু বটল দুৰ্ঘটনাক্ৰমে গাড়ীত পৰিছিল আৰু গাড়ীত থকা লোকসকলৰ কোনো ক্ষতি হোৱা নাছিল বুলি প্ৰেছ বিজ্ঞপ্তিত উল্লেখ কৰা কথাক কংগ্ৰেছে সম্পূৰ্ণ অসত্য বুলি দাবী কৰিছে।
কংগ্ৰেছৰ মতে, আক্ৰমণৰ সময়ত নিখিল ভাৰত কংগ্ৰেছৰ সম্পাদক মনোজ চৌহান আৰু অসম প্ৰদেশ মহিলা কংগ্ৰেছৰ সভানেত্ৰী মীৰা বৰঠাকুৰ আহত হয়। দলটোৱে লগতে কেইবাখনো বাহন ক্ষতিগ্ৰস্ত হোৱা বুলি দাবী কৰিছে। আক্ৰমণকাৰীসকলৰ কোনো নিৰ্দিষ্ট নেতা নাছিল বুলি প্ৰশাসনে কৰা দাবীকো কংগ্ৰেছে নস্যাৎ কৰি এই ঘটনাত বিজেপি নেতা মজিবুৰ ৰহমানৰ নেতৃত্ব থকাৰ অভিযোগ উত্থাপন কৰিছে।
পত্ৰখনত কংগ্ৰেছে লগতে দাবী কৰে যে হাবিবুৰ ৰহমান নামৰ এজন লোকক দলীয় কৰ্মীসকলে ঘটনাস্থলীতে আটক কৰি আৰক্ষীৰ হাতত গতাই দিছিল। কিন্তু পিছত আৰক্ষীয়ে তেওঁক মুকলি কৰি দিয়ে বুলি অভিযোগ কৰিছে দলটোৱে। ইয়াৰ পাছত উভতি অহাৰ পথতো একেই দলটোৱে পুনৰ আক্ৰমণৰ চেষ্টা চলোৱা বুলি কংগ্ৰেছে দাবী কৰিছে।
এই সমগ্ৰ ঘটনাক লৈ নগাঁৱৰ জিলা আয়ুক্ত তথা জিলা নিৰ্বাচনী বিষয়াৰ নিৰপেক্ষতাৰ ওপৰত দলটোৰ আস্থা হেৰুৱাইছে বুলি নিৰ্বাচন আয়োগক অৱগত কৰিছে অসম প্ৰদেশ কংগ্ৰেছে। নিৰাপত্তাৰ ক্ষেত্ৰত ব্যৰ্থতা আৰু ঘটনাৰ পাছত জাৰি কৰা প্ৰেছ বিজ্ঞপ্তিৰ জৰিয়তে আক্ৰমণকাৰীক সুবিধা দিয়াৰ অভিযোগ উত্থাপন কৰি ঘটনাটোৰ নিৰপেক্ষ তদন্তৰো দাবী জনাইছে দলটোৱে।
কংগ্ৰেছে নিৰ্বাচন আয়োগক আহ্বান জনাইছে যে আগন্তুক উপ-নিৰ্বাচন যাতে স্বচ্ছ, নিৰপেক্ষ আৰু নিৰাপদ পৰিৱেশত অনুষ্ঠিত হয়, তাৰ বাবে নগাঁৱৰ বৰ্তমানৰ জিলা আয়ুক্তক তাৎক্ষণিকভাৱে নিৰ্বাচনী দায়িত্বৰ পৰা আঁতৰাই এগৰাকী নিৰপেক্ষ জ্যেষ্ঠ বিষয়াক দায়িত্ব দিয়া হওক। ইয়াৰ লগতে কংগ্ৰেছে নিজৰ অভিযোগৰ সমৰ্থনত জিলা নিৰ্বাচনী বিষয়াৰ প্ৰেছ বিজ্ঞপ্তি, আক্ৰমণৰ ভিডিঅ’ ফুটেজ, ক্ষতিগ্ৰস্ত বাহনৰ আলোকচিত্ৰ আৰু আহত নেতাসকলৰ চিকিৎসা নথি নিৰ্বাচন আয়োগলৈ প্ৰেৰণ কৰিছে।
