মুখ্যমন্ত্ৰী হিমন্ত বিশ্ব শৰ্মাৰ অধ্যক্ষতাত অনুষ্ঠিত অসম কেবিনেটে ৰাজ্যখনত মুছলমান বিবাহ পঞ্জীয়নৰ নতুন নিয়মৱলীত অনুমোদন জনাইছে। সমগ্ৰ ৰাজ্যতে বিবাহ পঞ্জীয়নৰ বাবে এক সুষম আৰু বাধ্যতামূলক প্ৰক্ৰিয়া প্ৰৱৰ্তন কৰাৰ উদ্দেশ্যে ‘অসম মুছলমান বিবাহ পঞ্জীয়ন (বাধ্যতামূলক) নিয়মৱলী, ২০২৬’ গৃহীত কৰা হৈছে। এই নতুন নিয়মৱলী অনুসৰি, এতিয়াৰে পৰা ৰাজ্যত মুছলমান বিবাহসমূহ অনুজ্ঞাপত্ৰপ্ৰাপ্ত কাজীৰ পৰিৱৰ্তে কেৱল চৰকাৰী পঞ্জীয়কৰ জৰিয়তেহে পঞ্জীয়ন কৰিব লাগিব।
কেবিনেট বৈঠকৰ অন্তত এক সংবাদমেল সম্বোধন কৰি মুখ্যমন্ত্ৰী শৰ্মাই জানিবলৈ দিয়ে যে পূৰ্বৰ এক সিদ্ধান্ত মৰ্মে চৰকাৰে কাজীসকলক মুছলমান বিবাহ পঞ্জীয়ন কৰাৰ পৰা বাৰণ কৰিছিল যদিও পঞ্জীয়নৰ বাবে কোনো বিকল্প চৰকাৰী ব্যৱস্থাৰ কথা উল্লেখ কৰা হোৱা নাছিল। বৰ্তমান এই নতুন নিয়মৱলীৰ জৰিয়তে চৰকাৰী পঞ্জীয়ন ব্যৱস্থাৰ অধীনত মুছলমান বিবাহসমূহ সঠিকভাৱে আৰু আনুষ্ঠানিকভাৱে নথিবদ্ধ কৰাটো নিশ্চিত কৰা হ’ব। আবেদনৰ সংখ্যা বৃদ্ধি পালে ৰাইজৰ সুবিধাৰ্থে চৰকাৰে পৰ্যায়ক্ৰমে অতিৰিক্ত বিষয়াক পঞ্জীয়ক হিচাপে নিযুক্তি দিব বুলিও মুখ্যমন্ত্ৰীগৰাকীয়ে স্পষ্ট কৰি দিয়ে।
নতুনকৈ অনুমোদিত এই নিয়মৱলীয়ে ‘অসম মুছলমান বিবাহ আৰু বিবাহ বিচ্ছেদ বাধ্যতামূলক পঞ্জীয়ন আইন, ২০২৪’ৰ অধীনত পঞ্জীয়ন প্ৰক্ৰিয়াক বাধ্যতামূলক কৰি তুলিছে। ইয়াৰ জৰিয়তে ১৯৩৫ চনত প্ৰণয়ন কৰা পুৰণি আইনখনক সম্পূৰ্ণৰূপে বাতিল কৰা হৈছে, য’ত পঞ্জীয়ন প্ৰক্ৰিয়াটো ইচ্ছাধীন আছিল। যদিও ২০১০ চনৰ এক সংশোধনীয়ে ইয়াক বাধ্যতামূলক কৰিছিল, তথাপিও অনুজ্ঞাপত্ৰপ্ৰাপ্ত কাজীৰ জৰিয়তেহে এই কাৰ্য সম্পন্ন কৰা হৈছিল। শেহতীয়া পদক্ষেপে সমগ্ৰ প্ৰক্ৰিয়াটোক এক আনুষ্ঠানিক চৰকাৰী ব্যৱস্থালৈ ৰূপান্তৰিত কৰিলে।
উল্লেখ্য যে, ২০২৪ চনৰ আইনখনৰ মূল লক্ষ্য হৈছে নাবালক-নাবালিকাৰ বিবাহ সম্পূৰ্ণৰূপে নিষিদ্ধ কৰা। নতুন নিয়ম অনুসৰি, বিবাহৰ সময়ত পাত্ৰীৰ বয়স কমেও ১৮ বছৰ আৰু পাত্ৰৰ বয়স ২১ বছৰ হোৱাটো বাধ্যতামূলক। ইয়াৰ লগতে, পঞ্জীয়নৰ আবেদনৰ বাবে পৰিচয়, বয়স আৰু ঠিকনাৰ প্ৰমাণপত্ৰ দাখিল কৰাৰ প্ৰয়োজন হ’ব। দৰা আৰু কইনা উভয়ৰে স্বেচ্ছামূলক সন্মতি থকাটো বাধ্যতামূলক কৰাৰ লগতে বিবাহ পঞ্জীয়নৰ পূৰ্বে ৰাজহুৱা জাননী জাৰি কৰা আৰু ওজৰ-আপত্তি দৰ্শাবৰ বাবে ত্ৰিশ দিনৰ সময়সীমাও নিৰ্ধাৰণ কৰা হৈছে। বৰ্তমান এই নতুন নিয়মৱলী কাৰ্যকৰী হোৱাৰ লগে লগে ৰাজ্যখনত মুছলমান বিবাহ পঞ্জীয়ন প্ৰক্ৰিয়াটো অধিক স্বচ্ছ আৰু আইনসন্মত হৈ পৰিব বুলি চৰকাৰে আশা প্ৰকাশ কৰিছে।
