ধাৰাসাৰ বৰষুণ, তাৰ লগে লগে ধুমুহা বতাহ। কোনো কোনো ঠাইত নদীৰ পানীয়ে বিপদৰ সীমা অতিক্ৰম কৰিছে। কোনো কোনো ঠাইত ঘৰত পানী সোমাইছে। বহু ঠাইত পথ নদীলৈ পৰিণত হৈছে। এই দুৰ্যোগৰ ফলত দেশৰ কেইবাখনো ৰাজ্য ক্ষতিগ্ৰস্ত হৈছে। অৰ্ণবৰ প্ৰভাৱৰ বাবে উত্তৰ প্ৰদেশৰ পৰা ছত্তীশগড়, বিহাৰৰ পৰা মধ্যপ্ৰদেশলৈকে জনজীৱন ব্যাহত হৈ পৰিছে।
উত্তৰ প্ৰদেশত বিগত ৪৮ ঘণ্টা ধৰি অব্যাহত আছে ধাৰাসাৰ বৰষুণ। ইয়াৰ লগতে ঘণ্টাত ৪০ৰ পৰা ৫০ কিলোমিটাৰ বেগত বলিছে ধুমুহা বতাহ। এই পৰ্যন্ত বৰষুণ আৰু বিভিন্ন দুৰ্ঘটনাত ১৩ জন লোকৰ মৃত্যু হৈছে। ৩২খন জিলাত বানৰ আশংকা দেখা গৈছে। বহু অঞ্চলত পানী জমা হোৱাৰ ফলত স্বাভাৱিক জীৱনযাত্ৰা ব্যাহত হৈছে।
অৰ্ণবৰ প্ৰভাৱৰ বাবে কেৱল উত্তৰ প্ৰদেশতে নহয়, দেশৰ আন কেইবাখনো ৰাজ্যতো দুৰ্যোগৰ পৰিস্থিতিৰ সৃষ্টি হৈছে। বতৰ চলাচল দক্ষিণ ছত্তীশগড়ৰ ওপৰেৰে উত্তৰ-পূব দিশলৈ গতি কৰাৰ লগে লগে বৰষুণৰ ফলত আৰু কেইবাটাও অঞ্চলত প্ৰভাৱ পৰিব পাৰে। ছত্তীশগড়, ওড়িশা, অন্ধ্ৰ প্ৰদেশ, মধ্যপ্ৰদেশকে ধৰি কেইবাখনো ৰাজ্যত ধাৰাসাৰ বৰষুণৰ সতৰ্কবাণী দিয়া হৈছে।
আটাইতকৈ ভয়ংকৰ পৰিস্থিতি ছত্তীশগড়ৰ বষ্টাৰত। কেইবাদিনো অবিৰত বৰষুণৰ বাবে সৰু-বৰ প্ৰায় সকলো নৈ-বিল ওফন্দি উঠিছে। বহু ৰাস্তা পানীৰ তলত। ঘৰতো পানী সোমাইছে।
স্থানীয় প্ৰশাসনৰ সূত্ৰ অনুসৰি জগদলপুৰৰ ইন্দ্ৰাৱতী নদীৰ জলপৃষ্ঠ বিপদসীমাৰ ওপৰলৈ উঠিছে। জলপৃষ্ঠ বৃদ্ধি পোৱাৰ লগে লগে নদীৰ পাৰৰ নিম্নভূমি অঞ্চলত আতংক বিয়পি পৰিছে।
পৰিস্থিতি অধিক ভয়াৱহ হোৱাৰ বাবে বহু পৰিয়ালে ঘৰ এৰি যাবলৈ বাধ্য হৈছে। লগত অত্যাৱশ্যকীয় সামগ্ৰী লৈ যাব পৰা নাই। শিশু আৰু বৃদ্ধসকলক নিৰাপদ স্থানলৈ নিয়াৰ প্ৰচেষ্টা চলোৱা হৈছে।
ছত্তীশগড়ৰ ৰাজধানী ৰায়পুৰতো ধাৰাসাৰ বৰষুণৰ বাবে পৰিস্থিতি কঠিন হৈ পৰিছে। মহাদেৱঘাটত খাৰুণ নদীৰ জলপৃষ্ঠ দ্ৰুতগতিত বৃদ্ধি পাইছে। নদীৰ দলঙৰ ওপৰেৰে পানী বাগৰাৰ খবৰ আহিছে।
গৰিয়াবন্দতো একেই ছবি দেখা গৈছে। যোৱা ২৪ ঘন্টাত হোৱা ধাৰাসাৰ বৰষুণৰ বাবে পাইৰি, সৌন্দৰ আৰু মহানদী নৈৰ জলপৃষ্ঠ বৃদ্ধি পাবলৈ আৰম্ভ কৰিছে। সৰু সৰু নদী আৰু জলাশয়বোৰো উফন্দি উঠিছে। কেইবাটাও নিম্নভূমি অঞ্চল ডুব গৈছে।
সুকমাৰ কন্টা অঞ্চলতো পৰিস্থিতি উদ্বেগজনক। দ্ৰুতগতিত বৃদ্ধি পাইছে শবৰী নদীৰ জলপৃষ্ঠ। বিপদসীমাৰ স্তৰৰ ওচৰ পাইছেগৈ পানী। এনেদৰে পানী বাঢ়ি থাকিলে পৰিস্থিতি অধিক ভয়াৱহ হ’ব পাৰে বুলি আশংকা কৰা হৈছে। নদীৰ পাৰৰ গাঁওসমূহত প্ৰশাসনে নিৰীক্ষণ বৃদ্ধি কৰিছে।
ইপিনে, উত্তৰ প্ৰদেশৰ কৃষকসকলে বৰষুণৰ লগতে বতাহৰ ধুমুহাৰ বাবে সমস্যাৰ সন্মুখীন হৈছে। বহু ঠাইত পথাৰত ঠন ধৰি উঠা ধান, কুঁহিয়াৰৰ খেতি মাটিত পৰি গৈছে। শস্য চপোৱাৰ ঠিক আগতেই শস্য নষ্ট হোৱাৰ আশংকাত চিন্তিত হৈ পৰিছে কৃষকসকল। অযোধ্যাকে ধৰি বিভিন্ন অঞ্চলত ধুমুহাৰ ফলত শস্যৰ ক্ষতি হোৱাৰ খবৰ আহিছে।
ছ’চিয়েল মিডিয়াত ইয়াক ‘চাইক্ল’ন অৰ্ণব’ বুলি প্ৰচাৰ কৰা হৈছে যদিও বতৰ বিজ্ঞানীসকলে কয় যে ই প্ৰকৃততে ‘ডিপ্ৰেছন’ বা ‘ডিপ ডিপ্ৰেছন’ৰ শ্ৰেণীত পৰে। নামটোক লৈ বিভ্ৰান্তিৰ সৃষ্টি হ’লেও ইয়াৰ প্ৰভাৱৰ ফলত প্ৰচণ্ড বৰষুণ আৰু ধুমুহা বতাহৰ পৰিস্থিতিৰ সৃষ্টি হোৱাটো স্পষ্ট।
