আকৌ এবাৰ ক্ৰিকেট বিশ্বৰ সিংহাহনত ‘কিং কোহলী’। তিৰুৱনন্তপুৰমৰ গ্ৰীণফিল্ড ষ্টেডিয়ামত ৱেষ্ট ইণ্ডিজৰ বিৰুদ্ধে ভাৰতে অনায়াসে জয়লাভ কৰিলে। শুভমন গিলৰ দলটোৱে ৮টা উইকেট হাতত ৰাখিয়েই কেৰিবিয়ান দলে দিয়া ২৯৬ ৰানৰ প্ৰত্যাহ্বান অতিক্ৰম কৰে।
সৌজন্যত অধিনায়ক আৰু প্ৰাক্তন তাৰকাৰ দুটা শতকীয় ইনিংছ। বিৰাট কোহলীয়ে ১৩৯ ৰানৰ অপৰাজিত ইনিংছেৰে শচীন টেণ্ডুলকাৰৰ দ্বৈত বিশ্ব
ৰান চেজত আগ্ৰাসীভাৱে আৰম্ভণি কৰে ৰোহিত শৰ্মাই। কিন্তু তেওঁ ভাল আৰম্ভণিৰ ছন্দ বজাই ৰাখিব নোৱাৰিলে। তেওঁ ব্যক্তিগত ৩২ ৰানত নিজৰ উইকেটটো দি পেভলিয়নলৈ ওভতে।
ইয়াৰ পিছত কোহলী-গিলৰ যুটিয়ে বাইশ গজত দমন আৰম্ভ কৰে। বিৰাট কোহলীয়ে ৭৪টা বলত ৫৫ সংখ্যক এদিনীয়া শতক অৰ্জন কৰে। তেওঁ ১৩৯ ৰানত অপৰাজিত হৈ থাকে।
এই মহাকাব্যিক ইনিংছৰ জৰিয়তে আধুনিক ক্ৰিকেটৰ অন্যতম সফল চেজ মাষ্টাৰে মাষ্টাৰ ব্লাষ্টাৰৰ দ্বৈত মেগা অভিলেখ অতিক্ৰম কৰিলে। বিৰাটে মাত্ৰ ৩০৩ টা ইনিংছতে ১৫,০০০ এদিনীয়া ৰানৰ মাইলৰ খুঁটিত উপনীত হয়। ইয়াৰ উপৰিও বিৰাটেই এতিয়া ঘৰুৱা খেলপথাৰত এদিনীয়া ক্ৰিকেটত সৰ্বাধিক ৰানৰ মালিক।
শুভমন গিলে বিৰাটক এক যোগ্য সমৰ্থন আগবঢ়ায়। ইনিংছৰ আৰম্ভণিতে তেওঁ এবাৰ জীৱনদান পাইছিল। ভাৰতীয় অধিনায়কগৰাকীয়ে সেই সুযোগ ব্যৱহাৰ কৰি ১১০ ৰানৰ দৰ্শনীয় ইনিংছ খেলে। কোহলীৰ সৈতে তেওঁৰ পাৰ্টনাৰশ্বিপে ১৫০ ৰান অতিক্ৰম কৰি প্ৰতিপক্ষক সম্পূৰ্ণৰূপে খেলৰ পৰা বাহিৰ কৰি দিয়ে। ৪১.৪ অভাৰত মাত্ৰ ২টা উইকেট হেৰুৱাই ৩০০ ৰান সংগ্ৰহ কৰি খেলখনত জয়লাভ কৰে ভাৰতে।
ইয়াৰ পূৰ্বে ৱেষ্ট ইণ্ডিজে টছত পৰাস্ত হৈ বেটিং কৰিবলৈ নামে। পেচাৰসকলৰ বাবে ব্যৰ্থতাৰ দিনটোত জাষ্টিন গ্ৰীভছৰ দুৰ্দান্ত ১০১ আৰু জন কেম্পবেলৰ ৬২ ৰানৰ সহায়ত তেওঁলোকে নিৰ্ধাৰিত ৫০ অভাৰত ২৯৫/৭ ৰান সংগ্ৰহ কৰে। অপেনিং যুটীত আহে ১৩৫ৰান। শেষত আমিৰ জাংগুৱে মাত্ৰ ৪৩টা বলত ৫৮ ৰানৰ বিস্ফোৰক ইনিংছ খেলে।
কিন্তু কুলদীপ যাদৱে অকলেই এই ৰানৰ পাহাৰত খহনীয়া আনে। মাজৰ অভাৰত তেওঁৰ স্পিন মেজিকে প্ৰতিপক্ষক দিশহাৰা কৰি পেলায়। তেওঁ ১০ অভাৰত মাত্ৰ ৪০ ৰান দি ৪টা মূল্যৱান উইকেট দখল কৰে, য’ত আছিল এটা মেডেনো। বিপজ্জনক শ্বাই হোপৰ পিছত তেওঁ (১২) শতক অৰ্জনকাৰী গ্ৰীভছকো আউট কৰে। বাওঁহতীয়া স্পিনাৰগৰাকীয়ে পৰৱৰ্তী বলত জুৱেল এণ্ড্ৰুক আউট কৰি হেট্ৰিকৰ দুৱাৰদলিতো উপনীত হৈছিল। তেওঁৰ এই অনবদ্য স্পেলেই ভাৰতৰ বিজয়ৰ ভেটি প্ৰায় সুদৃঢ় কৰি তুলিছিল।
