উত্তৰ প্ৰদেশৰ এটাহ জিলাৰ এটা কথিত ক’চিং চেণ্টাৰে সামাজিক মাধ্যমৰ ৰাজনৈতিক আৰু আপত্তিজনক ভিডিঅ’ত কণ কণ শিশুক ব্যৱহাৰ কৰাৰ এক গুৰুতৰ অভিযোগৰ ভিত্তিত ৰাষ্ট্ৰীয় মানৱ অধিকাৰ আয়োগে কঠোৰ পদক্ষেপ গ্ৰহণ কৰিছে। আয়োগৰ সদস্য প্ৰিয়াংক কানুনগোৰ নেতৃত্বাধীন বিচাৰপীঠে এই সন্দৰ্ভত এটাহৰ জ্যেষ্ঠ আৰক্ষী অধীক্ষক, জিলা দণ্ডাধীশ, মেটা ইণ্ডিয়াৰ পৰিচালন সঞ্চালক আৰু কেন্দ্ৰীয় ইলেক্ট্ৰনিকছ আৰু তথ্য-প্ৰযুক্তি মন্ত্ৰণালয়ৰ (MeitY) সচিবলৈ জাননী প্ৰেৰণ কৰিছে। শিশুসকলক এনেদৰে ব্যৱহাৰ কৰাৰ অভিযোগত আয়োগে সংশ্লিষ্ট কৰ্তৃপক্ষক অহা দুই সপ্তাহৰ ভিতৰত ব্যৱস্থা গ্ৰহণৰ প্ৰতিবেদন দাখিল কৰিবলৈ নিৰ্দেশ দিছে।
অভিযোগ অনুসৰি, এটাহৰ উক্ত ক’চিং চেণ্টাৰটোৱে ‘প্ৰতিভা_এডু_স্কোৱাড’ নামৰ এটা ইনষ্টাগ্ৰাম একাউণ্টৰ জৰিয়তে তিনি বছৰীয়া শিশুকো ৰাজনৈতিক শ্লোগান আৰু আপত্তিজনক বাক্য মাতিবলৈ বাধ্য কৰাইছিল। এই ঘটনাই শিশুসকলৰ মৰ্যাদা, গোপনীয়তা আৰু মানসিক স্বাস্থ্যৰ প্ৰতি তীব্ৰ ভাবুকি কঢ়িয়াই অনাৰ লগতে পিতৃ-মাতৃৰ সন্মতি অবিহনে এনে ভিডিঅ’ প্ৰচাৰ কৰাৰ সন্দেহ ঘনীভূত কৰিছে। আয়োগে এটাহ আৰক্ষীক ভিডিঅ’সমূহত থকা শিশুসকলক চিনাক্ত কৰি তেওঁলোকক উপযুক্ত সুৰক্ষা আৰু মানসিক পৰামৰ্শ প্ৰদান কৰিবলৈ নিৰ্দেশ দিছে। লগতে, সামাজিক মাধ্যমৰ একাউণ্টটো পৰিচালনা কৰা আৰু শিশুসকলক এনে কামত লিপ্ত কৰোৱা প্ৰাপ্তবয়স্ক লোকসকলক চিনাক্ত কৰিবলৈ আৰক্ষীক নিৰ্দেশ দিয়া হৈছে। যদি তদন্তত কোনো অপৰাধ সংঘটিত হোৱা বুলি প্ৰমাণিত হয়, তেন্তে এজাহাৰ পঞ্জীয়ন কৰিবলৈকো আয়োগে নিৰ্দেশনা জাৰি কৰিছে।
এই সমগ্ৰ ঘটনাটো আইএছএছএফ ইণ্ডিয়াৰ সঞ্চালক মুজী সিং ৰাংগীয়ে এক্স যোগে পোহৰলৈ আনিছিল। তেওঁৰ অভিযোগ অনুসৰি, কথিত ক’চিং চেণ্টাৰটোৱে অৰ্থনৈতিকভাৱে পিছপৰা পৰিয়ালৰ শিশুসকলক পঢ়া-শুনাৰ প্ৰলোভনেৰে আকৰ্ষণ কৰিছিল যদিও প্ৰকৃততে তেওঁলোকক সামাজিক মাধ্যমৰ সমল সৃষ্টিৰ বাবেহে ব্যৱহাৰ কৰা হৈছিল। ৰাংগীয়ে দাবী কৰা মতে, ইতিমধ্যে শিশুসকলক ব্যৱহাৰ কৰি নিৰ্মাণ কৰা ১,১০০ তকৈ অধিক ভিডিঅ’ আপল’ড কৰা হৈছে য’ত তেওঁলোকক ৰাজনৈতিক আৰু আপত্তিজনক শ্লোগান দিবলৈ বাধ্য কৰোৱা হৈছিল।
আনহাতে, মেটা প্লেটফৰ্মত নাবালকৰ এনে আপত্তিজনক সমল কেনেদৰে বাৰে বাৰে আপল’ড আৰু প্ৰচাৰ কৰা হৈছিল, সেই সন্দৰ্ভত ৰাষ্ট্ৰীয় মানৱ অধিকাৰ আয়োগে প্ৰতিষ্ঠানটোৰ পৰা স্পষ্টীকৰণ বিচাৰিছে। এই ভিডিঅ’সমূহৰ পৰা কোনো ধৰণৰ আৰ্থিক লাভালাভ বা মুদ্ৰাকৰণ কৰা হৈছিল নেকি আৰু এই সমলসমূহ আঁতৰাবলৈ কি পদক্ষেপ গ্ৰহণ কৰা হৈছে, সেয়াও জনাবলৈ মেটাক নিৰ্দেশ দিয়া হৈছে। সমান্তৰালভাৱে, ভৱিষ্যতৰ তদন্তৰ স্বাৰ্থত প্ৰয়োজনীয় ডিজিটেল প্ৰমাণসমূহ সংৰক্ষণ কৰি ৰাখিবলৈকো আয়োগে নিৰ্দেশনা দিছে। উল্লেখযোগ্য যে, ৰাষ্ট্ৰীয় শিশু অধিকাৰ সুৰক্ষা আয়োগে শিশুসকলক মনোৰঞ্জন আৰু বাণিজ্যিক সমলত ব্যৱহাৰ কৰাৰ ক্ষেত্ৰত কঠোৰ নীতি-নিৰ্দেশনা বান্ধি দিছে, য’ত শিশুৰ মানসিক আৰু শাৰীৰিক নিৰ্যাতন ৰোধৰ ব্যৱস্থা আছে।
ৰাষ্ট্ৰীয় মানৱ অধিকাৰ আয়োগে স্পষ্ট কৰি দিছে যে এই সমগ্ৰ প্ৰক্ৰিয়াটোত শিশুসকলক কেৱল সুৰক্ষাৰ প্ৰয়োজন হোৱা ভুক্তভোগী হিচাপেহে গণ্য কৰা হ’ব আৰু তদন্তৰ মূল লক্ষ্য হ’ব শিশুসকলক ব্যৱসায়িক আৰু ৰাজনৈতিক স্বাৰ্থত ব্যৱহাৰ কৰা প্ৰাপ্তবয়স্কসকল। শেহতীয়াকৈ উচ্চতম ন্যায়ালয়ে শিশুৰ ওপৰত সামাজিক মাধ্যমৰ নেতিবাচক প্ৰভাৱক লৈ উদ্বেগ প্ৰকাশ কৰাৰ লগতে সামাজিক মাধ্যমত শিশুৰ প্ৰৱেশ নিয়ন্ত্ৰণ কৰিবলৈ কেন্দ্ৰীয় চৰকাৰক আইনী সুৰক্ষা ব্যৱস্থা বিবেচনা কৰিবলৈ আহ্বান জনোৱাৰ মাত্ৰ কেইদিনমানৰ পাছতেই আয়োগৰ এই কঠোৰ পদক্ষেপে বিশেষ তাৎপৰ্য বহন কৰিছে। নিৰ্দিষ্ট সময়সীমাৰ ভিতৰত প্ৰশাসন আৰু মেটাই দাখিল কৰিবলগীয়া প্ৰতিবেদনৰ ওপৰত ভিত্তি কৰি পৰৱৰ্তী আইনী প্ৰক্ৰিয়া নিৰ্ধাৰণ কৰা হ’ব।
