দিল্লীত শীতকালীন বায়ু প্ৰদূষণৰ ভয়াৱহতা ৰোধ কৰাৰ উদ্দেশ্যে চৰকাৰে কেইবাটাও গুৰুত্বপূৰ্ণ পদক্ষেপ গ্ৰহণ কৰিছে। নতুন পৰিকল্পনা অনুসৰি, চলিত বৰ্ষৰ ১ নৱেম্বৰৰ পৰা ২০২৭ বৰ্ষৰ ২৮ ফেব্ৰুৱাৰীলৈ সকলো চৰকাৰী আৰু বেচৰকাৰী কাৰ্যালয়ত ৫০ শতাংশ কৰ্মচাৰীয়ে ঘৰৰ পৰা কাম কৰিব লাগিব। শীতকালত একে সময়তে কাৰ্যালয়লৈ অহা-যোৱা কৰা লোকৰ সংখ্যা হ্ৰাস কৰি যাতায়াতৰ হেঁচাকমাৱাৰ বাবে এই ব্যৱস্থা হাতত লোৱা হৈছে।
এই নতুন নিয়ম অনুসৰি প্ৰতিষ্ঠানসমূহে তেওঁলোকৰ মুঠ কৰ্মচাৰীৰ অর্ধেকক ঘৰৰ পৰা কাম কৰাৰ সুবিধা দিব লাগিব আৰু বাকী অর্ধেক কৰ্মচাৰীয়ে নিয়মীয়াকৈ কাৰ্যালয়ত উপস্থিত থাকি দায়িত্ব পালন কৰিব লাগিব। ইয়াৰ ফলত ৰাজপথত বাহনৰ চলাচল হ্ৰাস পোৱাৰ লগতে প্ৰদূষণৰ মাত্ৰাও নিয়ন্ত্ৰণলৈ আহিব বুলি প্ৰশাসনে আশা প্ৰকাশ কৰিছে। কৰ্মচাৰীসকলৰ উপস্থিতিৰ হাৰ বিবেচনা কৰি প্ৰতিষ্ঠানসমূহে কামৰ সময়সূচী পুনৰ নিৰ্ধাৰণ কৰিব লাগিব।
ইয়াৰোপৰি, ১ নৱেম্বৰৰ পৰা ২৮ ফেব্ৰুৱাৰীলৈ দিল্লীৰ চৰকাৰী কাৰ্যালয়সমূহৰ কামৰ সময়তো ব্যাপক পৰিৱৰ্তন ঘটোৱা হৈছে। নতুন সময়সূচী অনুসৰি দিল্লী পৌৰ নিগমৰ কাৰ্যালয়সমূহ পুৱা ৮.৩০ বজাৰ পৰা বিয়লি ৫ বজালৈ চলিব। আনহাতে, দিল্লী চৰকাৰৰ কাৰ্যালয়সমূহ পুৱা ১০ বজাৰ পৰা সন্ধিয়া ৬.৩০ বজালৈ খোলা থাকিব। বিভিন্ন প্ৰতিষ্ঠানৰ কামৰ সময় পৃথক কৰাৰ মুখ্য উদ্দেশ্য হৈছে পুৱা আৰু বেলিটোৰ অন্তত একেলগে অধিক লোক ৰাস্তালৈ ওলাই আহি সৃষ্টি কৰা যান-জঁট আৰু প্ৰদূষণৰ মাত্ৰা হ্ৰাস কৰা।
প্ৰদূষণ নিয়ন্ত্ৰণৰ আন এক গুৰুত্বপূৰ্ণ পদক্ষেপ হিচাপে ব্যক্তিগত বাহনৰ ব্যৱহাৰ হ্ৰাস কৰিবলৈ ১ নৱেম্বৰ ২০২৬ৰ পৰা ২৮ ফেব্ৰুৱাৰী ২০২৭লৈ অনুমোদিত পাৰ্কিং স্থানসমূহত মাচুল দুগুণ কৰা হৈছে। অৱশ্যে দিল্লী মেট্ৰ’ ৰে’ল কৰ্প’ৰেচনৰ অধীনত পৰিচালিত পাৰ্কিং স্থানসমূহ এই বৰ্ধিত মাচুলৰ আওতাৰ পৰা মুক্ত থাকিব।
ৰাজধানী চহৰখনত ধূলিৰ প্ৰদূষণ ৰোধ কৰিবলৈও কঠোৰ নিষেধাজ্ঞা জাৰি কৰা হৈছে। ৩১ জানুৱাৰী ২০২৭লৈকে ধূলি সৃষ্টি কৰিব পৰা ধ্বংসকাৰ্য আৰু বাহিৰত চলি থকা অসামৰিক নিৰ্মাণকাৰ্য বন্ধ ৰখা হ’ব। ইয়াৰ লগতে অহা ১০ ডিচেম্বৰ ২০২৬ৰ পৰা ২০ জানুৱাৰী ২০২৭লৈ দিল্লীত সকলোধৰণৰ নিৰ্মাণ আৰু ধ্বংসকাৰ্য সম্পূৰ্ণৰূপে নিষিদ্ধ কৰা হৈছে।
