মাত্ৰ ২৫ কোটিৰ বাজেটেৰে নিৰ্মিত এখন চিনেমাই ৩৩০ কোটিৰো অধিক উপাৰ্জন কৰিছে! মালয়ালম চিনেমা ‘বেথলেহম কুডুম্বা ইউনিট’ এতিয়া বক্স অফিচত সফলতাৰ নতুন নিদৰ্শন। নিভিন পৌলী আৰু মমিথা বাইজু অভিনীত এই ৰোমান্টিক কমেডীখনে বহুচৰ্চিত চিনেমা ‘লোকা অধ্যায় ১: চন্দ্ৰ’ক অতিক্ৰম কৰিছে। শেহতীয়াকৈ অ’টিটিত মুক্তি পোৱাৰ পাছত ছবিখনৰ প্ৰতি বিদেশৰ দৰ্শকেও আগ্ৰহ দেখুৱাইছে।
প্ৰতিবেদন অনুসৰি চিনেমাখনৰ বিশ্বব্যাপী আয় ৩৩০ কোটি ৯৩ লাখ টকা। ইয়াৰে ১৯২ কোটি ৪৮ লাখ ভাৰতীয় বজাৰৰ পৰা আৰু ১৩৮ কোটি ৪৫ লাখ বিদেশী বজাৰৰ পৰা আহিছে। ভাৰতৰ নেট আয় ১৬৪ কোটি ৯১ লাখ। অৰ্থাৎ বিশ্বজুৰি মুঠ আয় নিৰ্মাণ ব্যয়ৰ প্ৰায় ১৩ গুণ।
চিনেমাখনৰ পৰিচালক গিৰীশ এ.ডি.। কাহিনীটোত প্ৰেম, বয়সৰ ব্যৱধান, লাজ আৰু সম্পৰ্কৰ জটিলতাক লৈ নিৰ্মাণ কৰা ছবিখনৰ কাহিনীত ফুটি উঠিছে সাধাৰণ মানুহৰ চিনাকি জীৱনশৈলী। পৰম্পৰাগত ৰোমান্টিক চিনেমাৰ আত্মবিশ্বাসী নায়কৰ পৰিৱৰ্তে ইয়াত নিভিন পৌলীক দেখা গৈছে লাজুক আৰু দ্বিধাগ্ৰস্ত চৰিত্ৰত। ত্ৰিশ বছৰৰ উৰ্ধৰ জাষ্টিন নামৰ কেটাৰাজন নিজৰ কামত নিৰ্ভৰযোগ্য যদিও প্ৰেমৰ ক্ষেত্ৰত যথেষ্ট অস্বস্তিকৰ। কাষৰ ঘৰৰ কলেজীয়া ছোৱালী এজনীৰ আগ্ৰহে তেওঁক এক নতুন পৰিস্থিতিৰ মুখামুখি কৰে।
নিভিন আৰু মামিথাৰ অন-স্ক্ৰীণ কেমিষ্ট্ৰি, স্বাভাৱিক অভিনয় আৰু দৈনন্দিন জীৱনৰ হাস্যৰস চিনেমাখনৰ অন্যতম আকৰ্ষণ। বিনয় ফ’ৰ্ট, সুৰেশ কৃষ্ণ, শ্যাম মোহন আৰু শ্ৰীন্দাইও চিনেমাখনত অভিনয় কৰিছে।
ইয়াৰ পূৰ্বে গিৰীশ এডিয়ে ‘থান্নিৰ মথান দিনাংগল’, ‘ছুপাৰ শৰণ্যা’ আৰু ‘প্ৰেমালু’ৰ দৰে চিনেমা নিৰ্মাণ কৰি সুখ্যাতি অৰ্জন কৰিছিল। তেওঁৰ চিনেমাবোৰৰ বিশেষত্ব হ’ল জটিল কাহিনীৰ পৰিৱৰ্তে চিনাকি চৰিত্ৰ, সাৱলীল সংলাপ আৰু সৰু সৰু ঘটনাৰ জৰিয়তে দৰ্শকৰ সৈতে সংযোগ স্থাপন কৰা। ‘বেথলেহম কুডুম্বা ইউনিট’ৰ সফলতাত দৰ্শকৰ মুখে মুখে প্ৰচাৰে ডাঙৰ ভূমিকা পালন কৰিছে।
এই চিনেমাখনৰ পূৰ্বে সৰ্বাধিক উপাৰ্জনকাৰী মালয়ালম ছবিৰ অভিলেখ আছিল ‘লোকা অধ্যায় ১: চন্দ্ৰ’। কল্যাণী প্ৰিয়দৰ্শন অভিনীত আৰু ডমিনিক অৰুণৰ পৰিচালিত ছবিখনৰ বিশ্বব্যাপী সংগ্ৰহ আছিল প্ৰায় ৩০১.৪১ কোটি টকা। ‘বেথলেহম কুডুম্বা ইউনিটে’ নতুন আয়েৰে সেই অভিলেখ অতিক্ৰম কৰিছে।
সৰ্বাধিক উপাৰ্জন কৰা মালয়ালম ছবিৰ তালিকাত ‘এল ২: এম্পুৰাণ’, ‘মঞ্জুমেল বয়ছ’ আৰু ‘দৃশ্যম ৩’ও আছে। ‘দ্য ইণ্ডিয়ান এক্সপ্ৰেছ’ৰ তথ্য অনুসৰি এই ছবিসমূহৰ বিশ্বব্যাপী সংগ্ৰহ ক্ৰমে প্ৰায় ২৬৬.৮১ কোটি, ২৪১.৩ কোটি আৰু ২৩৯.৮৩ কোটি টকা।
গিৰীশ এ ডিৰ ছবিৰ সফলতাৰ অন্যতম ৰহস্য হৈছে সৰল কাহিনী আৰু চিনাকি জীৱনৰ উপস্থাপন। প্ৰেম, বন্ধুত্ব, প্ৰত্যাখ্যান আৰু দৈনন্দিন জীৱনৰ হাস্যৰসে দৰ্শকৰ সৈতে সহজেই সংযোগ স্থাপন কৰে। তেওঁৰ পূৰ্বৰ ছবি ‘প্ৰেমালু’ ৮ৰ পৰা ১০ কোটি টকাৰ বাজেটত নিৰ্মাণ কৰি ১৩০ কোটিৰো অধিক উপাৰ্জন কৰিছিল। ‘থান্নিৰ মাথান দিনাংগল’ আৰু ‘ছুপাৰ শৰণ্যা’ইও তেওঁৰ স্বীকৃতি বৃদ্ধি কৰিছে।
ছবিখন তামিল আৰু তেলেগু সংস্কৰণৰ লগতে মালয়ালম ভাষাতো মুক্তি লাভ কৰিছে। চিনাকি জীৱন কাহিনী, অভিনয়, দৰ্শকৰ ইতিবাচক প্ৰচাৰ আৰু আন্তঃৰাষ্ট্ৰীয় বজাৰলৈ সম্প্ৰসাৰণৰ সমন্বয়ৰে ২৫ কোটি টকাৰ এই ছবিখনে এতিয়া ৩৩০ কোটি টকাৰ ব্যৱসায় অতিক্ৰম কৰি মালয়ালম চিনেমাত নতুন ইতিহাস সৃষ্টি কৰিছে।
