ৰাজধানী দিল্লীৰ যন্তৰ-মন্তৰত অনধিকাৰ প্ৰৱেশ আৰু চৰকাৰী বিষয়াৰ কৰ্তব্যত বাধা প্ৰদান কৰাৰ অভিযোগত দিল্লী আৰক্ষীয়ে ককৰোচ জনতা পাৰ্টীৰ তিনিগৰাকী শীৰ্ষ নেতা ক্ৰমে সৌৰভ দাস, আশুতোষ ৰাংকা আৰু অজিংক্য সিন্ধেক গ্ৰেপ্তাৰ কৰিছে। এছআইআৰ প্ৰক্ৰিয়াত হোৱা অনিয়মৰ বিৰুদ্ধে আৰু মুখ্য নিৰ্বাচন আয়ুক্ত জ্ঞানেশ কুমাৰৰ পদত্যাগৰ দাবীত চলি থকা ধাৰাবাহিক আন্দোলনৰ মাজতে এই ঘটনা সংঘটিত হয়। যন্তৰ-মন্তৰক প্ৰতিবাদস্থলী হিচাপে নিষিদ্ধ কৰাৰ চৰকাৰী সিদ্ধান্তৰ বিৰোধিতা কৰি মঙলবাৰে দিনৰ ভাগত চিজেপিৰ নেতা কেইগৰাকীয়ে হাতত ত্ৰিৰংগা লৈ আৰক্ষীৰ বেৰিকেড ভাঙি তথা লোহাৰ গেট বগাই অঞ্চলটোত প্ৰৱেশ কৰিছিল। আৰক্ষীয়ে তেওঁলোকক তাৎক্ষণিকভাৱে আটক কৰাৰ পাছত নিশা চৰ্ত ভংগকে ধৰি একাধিক জামিনবিহীন ধাৰাত গোচৰ ৰুজু কৰি সংসদ মাৰ্গ আৰক্ষী থানাত আনুষ্ঠানিকভাৱে গ্ৰেপ্তাৰ কৰে।
উল্লেখ্য যে যোৱা সোমবাৰে কেন্দ্ৰীয় গৃহ মন্ত্ৰালয়ে দিল্লীৰ ঐতিহাসিক যন্তৰ-মন্তৰক আনুষ্ঠানিক প্ৰতিবাদস্থলীৰ তালিকাৰ পৰা আঁতৰাই (‘ডি-ন’টিফাই’ কৰি) ইয়াৰ পৰিৱৰ্তে ৰামলীলা ময়দান, বুৰাৰী ময়দান আৰু চিবিডি খেলপথাৰক প্ৰতিবাদৰ বাবে নিৰ্দিষ্ট কৰি দিছিল। ইয়াৰ পূৰ্বে চিজেপিয়ে যন্তৰ-মন্তৰত শান্তিপূৰ্ণ প্ৰতিবাদৰ অনুমতি বিচাৰি দিল্লী আৰক্ষীক ২৪ ঘণ্টাৰ সময়সীমা বান্ধি দিছিল। কিন্তু আৰক্ষীৰ সঁহাৰি নোপোৱাত আৰু যন্তৰ-মন্তৰৰ মৰ্যাদা কৰ্তন কৰাত মঙলবাৰে পুৱা নেতাসকলে “ভাৰত মাতা কী জয়” আৰু “ইনকিলাব জিন্দাবাদ” শ্লোগান দি বলপূৰ্বকভাৱে যন্তৰ-মন্তৰত প্ৰৱেশ কৰে। চিজেপিৰ প্ৰতিষ্ঠাপক অভিজিৎ ডিপকে সামাজিক মাধ্যমত এই প্ৰতিবাদৰ ভিডিঅ’ শ্বেয়াৰ কৰি কয় যে চৰকাৰে যন্তৰ-মন্তৰৰ মৰ্যাদা কাঢ়ি নিলেও নাগৰিকৰ প্ৰতিবাদৰ অধিকাৰ বন্ধ কৰিব নোৱাৰে আৰু এতিয়াৰে পৰা সমগ্ৰ দেশেই যন্তৰ-মন্তৰলৈ ৰূপান্তৰিত হ’ব।
ইপিনে, চিজেপিৰ আইনী শাখাৰ মুৰব্বী ৰত্না সিঙে সামাজিক মাধ্যম এক্সযোগে (X) জানিবলৈ দিয়ে যে দিনত আটক হোৱা সৌৰভ দাস, আশুতোষ ৰাংকা আৰু অজিংক্য সিন্ধেক নিশা গ্ৰেপ্তাৰ কৰা হৈছে। সিঙে অভিযোগ কৰা অনুসৰি, মাজনিশালৈকে আটক হোৱা নেতাসকলক তেওঁলোকৰ অধিবক্তাক সাক্ষাৎ কৰিবলৈ অনুমতি দিয়া হোৱা নাছিল আৰু পুৱতি নিশা প্ৰায় ৩ বজাত এখন ব্যক্তিগত ভানযোগে তেওঁলোকক সংসদ মাৰ্গ আৰক্ষী থানালৈ অনা হয়। উল্লেখ্য যে ইয়াৰ পূৰ্বে যোৱা ১০ অক্টোবৰত মুম্বাইৰ পৰা দিল্লীত উপস্থিত হোৱাৰ পাছতো অভিজিৎ ডিপকে, আশুতোষ ৰাংকা আৰু সৌৰভ দাসক আৰক্ষীয়ে আটক কৰি পৰৱৰ্তী সময়ত মুকলি কৰি দিছিল।
#BREAKING: Delhi Police arrests Saurav Das, Ashutosh Ranka, and Ajinkya Shinde at Parliament Street Police Station in today’s Jantar Mantar case.
Trespass, bond violation, obstruction of public official’s duty, etc.
They’ll be produced before the SCM Court in the morning. A possibility of Judicial Custody (JC) in the Tihar Jail is possible.
They were not allowed to meet their lawyers till late at night. They were brought to Parliament Street PS at 3 AM in a private van.
Despite these illegal actions, their spirits are high.
@Cockroachisback
— Ratna Singh (@whattalawyer) October 13, 2026
গ্ৰেপ্তাৰ হোৱা এই তিনিওগৰাকী নেতাক আজি বিশেষ কাৰ্যবাহী দণ্ডাধীশৰ আদালতত হাজিৰ কৰোৱাৰ কথা আছে আৰু তেওঁলোকক তিহাৰ কাৰাগাৰলৈ ন্যায়িক জিম্মাত প্ৰেৰণ কৰাৰ সম্ভাৱনা আছে বুলি দলটোৰ আইনী শাখাই জানিবলৈ দিছে। আৰক্ষীৰ এই পদক্ষেপক অবৈধ আখ্যা দিলেও নেতাসকলৰ মনোবল অটুট আছে বুলি ৰত্না সিঙে উল্লেখ কৰিছে। যন্তৰ-মন্তৰত প্ৰতিবাদ নিষিদ্ধ কৰা চৰকাৰী সিদ্ধান্ত আৰু চিজেপিৰ শীৰ্ষ নেতৃত্বৰ গ্ৰেপ্তাৰে দেশৰ ৰাজনীতিত পৰৱৰ্তী সময়ত কি প্ৰভাৱ পেলায়, সেয়া লক্ষণীয় হ’ব।
