কণ্ঠশিল্পী জুবিন গাৰ্গৰ মৃত্যুৰ গোচৰত দুজন অভিযুক্তই জামিন লাভ কৰাৰ পাছতে সেই নিৰ্দেশক প্ৰত্যাহ্বান জনাই উচ্চতম ন্যায়ালয়ৰ কাষ চাপিব বুলি ঘোষণা কৰিছে অধিবক্তা ৰাতুল বৰাই। ২০২৫ চনৰ ১৯ ছেপ্টেম্বৰত ছিংগাপুৰত জুবিন গাৰ্গৰ মৃত্যুৰ পাছত প্ৰথমে আৰক্ষীৰ ওচৰত এজাহাৰ দাখিল কৰা বৰাই ২০২৬ চনৰ ১৭ অক্টোবৰত গুৱাহাটীত এখন সংবাদমেল সম্বোধন কৰি এই কথা ঘোষণা কৰে।
গুৱাহাটী উচ্চ ন্যায়ালয়ে দুই অভিযুক্তক জামিন মঞ্জুৰ কৰা নিৰ্দেশক প্ৰত্যাহ্বান জনাই তেওঁ উচ্চতম ন্যায়ালয়ত আবেদন দাখিল কৰিব।
গোচৰটোৰ আইনী প্ৰক্ৰিয়াত ৰাজ্য চৰকাৰৰ ভূমিকাক লৈও প্ৰশ্ন উত্থাপন কৰে ৰাতুল বৰাই। অসম আৰক্ষীয়ে দাখিল কৰা অভিযোগনামাত থকা দুৰ্বলতাৰ বাবেই অভিযুক্তসকলে এটাৰ পাছত আন এটাকৈ জামিন লাভ কৰিবলৈ সক্ষম হৈছে বুলি তেওঁ অভিযোগ কৰে।
বৰাই কয়, “আৰক্ষীৰ অভিযোগনামাত থকা সুৰুঙাৰ বাবেই এই গোচৰৰ অভিযুক্তসকলে এটাৰ পাছত আন এটাকৈ জামিন লাভ কৰি আছে। গোচৰটোৰ আইনী প্ৰক্ৰিয়াত চৰকাৰৰ ভূমিকা সন্তোষজনক নহয়।”
উচ্চতম ন্যায়ালয়ত আবেদন দাখিল কৰি দুই অভিযুক্তৰ জামিনৰ নিৰ্দেশ বাতিল কৰাৰ লগতে গোচৰটোৰ আন অভিযুক্তসকলৰ জামিনৰ বিষয়টোতো প্ৰয়োজনীয় ব্যৱস্থা গ্ৰহণৰ আহ্বান জনাব বুলি তেওঁ জানিবলৈ দিয়ে।
উল্লেখ্য যে গুৱাহাটী উচ্চ ন্যায়ালয়ে জুবিন গাৰ্গৰ বেণ্ডৰ সদস্য তথা কণ্ঠশিল্পী অমৃতপ্ৰভা মহন্ত আৰু জুবিনৰ সম্পৰ্কীয় ভাতৃ তথা অসম আৰক্ষীৰ নিলম্বিত উপ-আৰক্ষী অধীক্ষক সন্দীপন গাৰ্গক জামিন প্ৰদান কৰিছে।
এই দুজনৰ বাহিৰে জুবিনৰ মৃত্যুৰ গোচৰত আন পাঁচজন অভিযুক্ত এতিয়াও কাৰাগাৰত আছে। তেওঁলোক হৈছে নৰ্থ ইষ্ট ইণ্ডিয়া ফেষ্টিভেলৰ মুখ্য আয়োজক শ্যামকানু মহন্ত, জুবিনৰ মেনেজাৰ সিদ্ধাৰ্থ শৰ্মা, বেণ্ডৰ সদস্য শেখৰজ্যোতি গোস্বামী আৰু ব্যক্তিগত নিৰাপত্তাৰক্ষী নন্দেশ্বৰ বৰা তথা প্ৰবীণ বৈশ্য।
জুবিনৰ দুই ব্যক্তিগত নিৰাপত্তাৰক্ষীয়ে যোৱা ছেপ্টেম্বৰ মাহত আয়ৰ সৈতে সামঞ্জস্যহীন সম্পত্তি আহৰণৰ গোচৰত জামিন লাভ কৰিছিল। অৱশ্যে, জুবিনৰ মৃত্যুৰ গোচৰত জামিন নোপোৱাৰ বাবে তেওঁলোক এতিয়াও কাৰাগাৰত আছে।
২০২৫ চনৰ ১৯ ছেপ্টেম্বৰত ছিংগাপুৰৰ লাজাৰাছ দ্বীপৰ ওচৰৰ সাগৰত সাঁতুৰি থকা অৱস্থাত মৃত্যু হৈছিল অসমৰ অন্যতম জনপ্ৰিয় কণ্ঠশিল্পী তথা গীতিকাৰ জুবিন গাৰ্গৰ। নৰ্থ ইষ্ট ইণ্ডিয়া ফেষ্টিভেলৰ চতুৰ্থ সংস্কৰণত অংশগ্ৰহণ কৰিবলৈ তেওঁ ছিংগাপুৰলৈ গৈছিল।
তেওঁৰ মৃত্যুৰ পাছত অসমজুৰি ৬০খনতকৈও অধিক এজাহাৰ দাখিল কৰা হৈছিল। পৰৱৰ্তী সময়ত অসম আৰক্ষীৰ অপৰাধ অনুসন্ধান বিভাগৰ (চিআইডি) অধীনত গঠিত বিশেষ তদন্তকাৰী দলে (এছআইটি) গোচৰটোৰ তদন্ত চলায়। ২০২৫ চনৰ ডিচেম্বৰ মাহত তদন্তকাৰী দলটোৱে এখন আদালতত সাতজন অভিযুক্তৰ নাম সন্নিৱিষ্ট কৰি অভিযোগনামা দাখিল কৰে। ইয়াৰে চাৰিজনৰ বিৰুদ্ধে হত্যাৰ অভিযোগ উত্থাপন কৰা হৈছে।
বৰ্তমান গুৱাহাটীৰ এখন বিশেষ ক্ষিপ্ৰ বিচাৰ আদালতত গোচৰটোৰ শুনানি চলি আছে।
ইফালে, ছিংগাপুৰৰ আৰক্ষীৰ তদন্তত জুবিনৰ মৃত্যুৰ ঘটনাৰ আঁৰত কোনো অপৰাধমূলক কাৰ্যকলাপৰ প্ৰমাণ পোৱা নগ’ল বুলি প্ৰকাশ পাইছিল। ছিংগাপুৰৰ আদালতত দাখিল কৰা তথ্য অনুসৰি, জুবিন অত্যধিক মদ্যপান কৰি আছিল আৰু জীৱন ৰক্ষাকাৰী জেকেট পিন্ধিবলৈ অস্বীকাৰ কৰাৰ পাছত লাজাৰাছ দ্বীপৰ ওচৰৰ সাগৰত ডুব গৈ তেওঁৰ মৃত্যু হৈছিল।
অৱশ্যে, অসম চৰকাৰে স্পষ্ট কৰি আহিছে যে ছিংগাপুৰৰ তদন্তৰ সিদ্ধান্তই অসমত চলি থকা আইনী প্ৰক্ৰিয়াত কোনো প্ৰভাৱ নেপেলায়। ইয়াৰ পূৰ্বে মুখ্যমন্ত্ৰী হিমন্ত বিশ্ব শৰ্মাই অসম বিধানসভাত জুবিন গাৰ্গৰ মৃত্যুক “পোনপটীয়া আৰু স্পষ্ট হত্যাকাণ্ড” বুলি অভিহিত কৰিছিল।
এনে পৰিস্থিতিত দুই অভিযুক্তৰ জামিনৰ নিৰ্দেশৰ বিৰুদ্ধে ৰাতুল বৰাই উচ্চতম ন্যায়ালয়ৰ কাষ চপাৰ সিদ্ধান্তই জুবিনৰ মৃত্যুৰ গোচৰটোক পুনৰ চৰ্চালৈ আনিছে। তদন্তৰ অগ্ৰগতি, আৰক্ষীৰ অভিযোগনামা আৰু অভিযুক্তসকলৰ জামিনক লৈ অব্যাহত থকা বিতৰ্কৰ মাজতে এই বিষয়ত উচ্চতম ন্যায়ালয়ে কি সিদ্ধান্ত গ্ৰহণ কৰে, সেয়া লক্ষণীয় হ’ব।
