১৬ বছৰৰ তলৰ শিশুৱে যাতে ছ’চিয়েল মিডিয়া ব্যৱহাৰ কৰিব নোৱাৰে, তাৰ বাবে কেন্দ্ৰীয় চৰকাৰৰ হস্তক্ষেপ বিচাৰিছে কৰ্ণাটকৰ কংগ্ৰেছ চৰকাৰে। ৰাজ্য চৰকাৰৰ মতে, এই নিষেধাজ্ঞা কাৰ্যকৰী কৰিবলৈ প্ৰয়োজনীয় ব্যৱস্থা কেন্দ্ৰীয় চৰকাৰেহে গ্ৰহণ কৰিব পাৰিব।
চলিত বছৰৰ আৰম্ভণিতে কৰ্ণাটকৰ বাজেটত তদানীন্তন মুখ্যমন্ত্ৰী ছিদ্দাৰামায়াই ১৬ বছৰৰ তলৰ শিশুৰ বাবে ছ’চিয়েল মিডিয়া ব্যৱহাৰত নিষেধাজ্ঞা আৰোপ কৰাৰ কথা ঘোষণা কৰিছিল। শিশুৰ ওপৰত ম’বাইল ফোনৰ অত্যধিক ব্যৱহাৰৰ নেতিবাচক প্ৰভাৱ ৰোধ কৰাই আছিল এই পদক্ষেপৰ লক্ষ্য। বৰ্তমানৰ মুখ্যমন্ত্ৰী ডি কে শিৱকুমাৰেও এই সিদ্ধান্ত কাৰ্যকৰী কৰাৰ বাবে উদ্যোগ গ্ৰহণ কৰিছে।
কৰ্ণাটক চৰকাৰৰ এগৰাকী জ্যেষ্ঠ বিষয়াই জনোৱা মতে, ৰাজ্য চৰকাৰে বিদ্যালয় আৰু মহাবিদ্যালয়ত কম্পিউটাৰ ব্যৱহাৰৰ ক্ষেত্ৰত নিয়ন্ত্ৰণ আৰোপ কৰিব পাৰে। কিন্তু ছ’চিয়েল মিডিয়াৰ ব্যৱহাৰ সম্পূৰ্ণৰূপে নিষিদ্ধ কৰাটো এক বৃহৎ বিষয়। সেয়েহে, এই ক্ষেত্ৰত কেন্দ্ৰীয় চৰকাৰেই সিদ্ধান্ত ল’ব লাগিব বুলি বিষয়াগৰাকীয়ে মন্তব্য কৰে।
ইফালে, চলিত সপ্তাহতে উচ্চতম ন্যায়ালয়ে এটা গোচৰত নাবালকৰ বাবে ইণ্টাৰনেট ব্যৱহাৰত নিষেধাজ্ঞা আৰোপৰ দাবীত দাখিল কৰা আবেদন খাৰিজ কৰিছিল। আদালতৰ মতে, ইণ্টাৰনেট ব্যৱহাৰত সম্পূৰ্ণ নিষেধাজ্ঞা আৰোপ কৰিলে ইণ্টাৰনেট সেৱা ব্যৱহাৰৰ অধিকাৰ ক্ষুণ্ণ হ’ব পাৰে।
অৱশ্যে, কৰ্ণাটক চৰকাৰৰ প্ৰস্তাৱ ইণ্টাৰনেট ব্যৱহাৰ সম্পূৰ্ণৰূপে বন্ধ কৰাৰ সৈতে জড়িত নহয়। ৰাজ্য চৰকাৰে বিচাৰিছে যে ১৬ বছৰৰ তলৰ শিশুৱে যাতে ছ’চিয়েল মিডিয়াত একাউণ্ট খুলিব নোৱাৰে, তাৰ বাবে সংশ্লিষ্ট প্লেটফৰ্মসমূহক প্ৰয়োজনীয় কাৰিকৰী ব্যৱস্থা গ্ৰহণৰ নিৰ্দেশ কেন্দ্ৰীয় চৰকাৰে দিয়ক। বিশ্বৰ কেইবাখনো দেশত এনে ব্যৱস্থা গ্ৰহণ কৰা হৈছে বুলিও চৰকাৰী বিষয়াগৰাকীয়ে দাবী কৰে।
কৰ্ণাটকৰ তথ্য-প্ৰযুক্তি মন্ত্ৰী প্ৰিয়ংক খাৰ্গেই জনোৱা মতে, এই বিষয়টোক লৈ ৰাজ্য চৰকাৰে ছ’চিয়েল মিডিয়া প্লেটফৰ্মসমূহৰ সৈতে আলোচনা কৰি আছে। ১৬ বছৰৰ তলৰ শিশুৱে যাতে একাউণ্ট খুলিব নোৱাৰে, তাৰ বাবে কি কি ব্যৱস্থা গ্ৰহণ কৰিব পাৰি, সেই বিষয়ে পৰীক্ষা-নিৰীক্ষা চলোৱা হৈছে।
মন্ত্ৰীগৰাকীয়ে লগতে কয় যে অষ্ট্ৰেলিয়াকে ধৰি যিবোৰ দেশত শিশুৰ বাবে ছ’চিয়েল মিডিয়া ব্যৱহাৰত নিষেধাজ্ঞা আৰোপ কৰা হৈছে, তাতো বহু শিশুৱে বয়স পৰীক্ষাৰ ব্যৱস্থাক আওকাণ কৰি একাউণ্ট খুলিবলৈ সক্ষম হৈছে। সেয়েহে, কেৱল নিষেধাজ্ঞা আৰোপ কৰাই নহয়, বয়স পৰীক্ষাৰ ব্যৱস্থাটো কেনেদৰে অধিক ফলপ্ৰসূ কৰিব পাৰি, সেই বিষয়টোও বিবেচনা কৰি সিদ্ধান্ত ল’ব বিচাৰিছে কৰ্ণাটক চৰকাৰে।
