ক’ভিড-১৯ মহামাৰীৰ সময়ত চিকিৎসা সুৰক্ষা সামগ্ৰী যোগান ধৰাৰ নামত কোটি কোটি টকাৰ প্ৰৱঞ্চনা কৰাৰ অপৰাধত ব্ৰিটেইনত কাৰাবাস খাটিবলগীয়া হৈছে ভাৰতীয় মূলৰ ব্যৱসায়ী যোগেশ ভাণ্ডাৰী। তেওঁৰ পত্নী মীনাক্ষী ভাণ্ডাৰীকো ধন সৰবৰাহৰ অপৰাধত দোষী সাব্যস্ত কৰা হৈছে। প্ৰৱঞ্চনাৰ জৰিয়তে লাভ কৰা ধনেৰে তেওঁলোকে বিলাসী গাড়ী, দামী ঘড়ী, গহনা আৰু বিদেশ ভ্ৰমণৰ নামত বৃহৎ পৰিমাণৰ ধন খৰচ কৰিছিল।
ব্ৰিটেইনৰ সংবাদ মাধ্যমৰ প্ৰতিবেদন অনুসৰি, ক’ভিডৰ সময়ত চিকিৎসালয়সমূহৰ বাবে লাখ লাখ বাকচ নাইট্ৰাইল গ্ল’ভছ যোগান ধৰিব পাৰিব বুলি যোগেশ ভাণ্ডাৰী আৰু তেওঁৰ সহযোগী ক্ৰেগ মৰিছে আমেৰিকা আৰু জাৰ্মানীৰ কেইবাটাও প্ৰতিষ্ঠানক আশ্বাস দিছিল। কিন্তু প্ৰতিশ্ৰুতি অনুসৰি সামগ্ৰী যোগান ধৰাৰ পৰিৱৰ্তে তেওঁলোকে ধন আত্মসাৎ কৰি নিজৰ ব্যক্তিগত কামত ব্যৱহাৰ কৰিছিল।
ব্ৰিটেইনৰ নেচনেল ক্ৰাইম এজেন্সীৰ তদন্তত প্ৰকাশ পোৱা অনুসৰি, প্ৰৱঞ্চনাৰ ধনেৰে প্ৰায় ১ লাখ ২৬ হাজাৰ পাউণ্ড মূল্যৰ এখন প’ৰ্ছে গাড়ী ক্ৰয় কৰা হৈছিল। ইয়াৰ উপৰি ৰ’লেক্সৰ দৰে বিলাসী ঘড়ী, গহনা, আন দামী গাড়ী আৰু বিলাসী ভ্ৰমণৰ নামতো ধন খৰচ কৰা হৈছিল। নিজৰ বাসগৃহৰ সংস্কাৰ আৰু পাৰিবাৰিক ঋণ পৰিশোধৰ বাবেও এই ধন ব্যৱহাৰ কৰা হৈছিল।
২০২৬ চনৰ জুলাই মাহত লেষ্টাৰ ক্ৰাউন ক’ৰ্টত পাঁচ সপ্তাহ ধৰি চলা বিচাৰৰ অন্তত যোগেশ ভাণ্ডাৰী, তেওঁৰ পত্নী মীনাক্ষী ভাণ্ডাৰী আৰু সহযোগী ক্ৰেগ মৰিছক দোষী সাব্যস্ত কৰা হৈছিল। শেহতীয়াকৈ ১৬ অক্টোবৰত যোগেশ ভাণ্ডাৰীক আঠ বছৰৰ কাৰাদণ্ড বিহা হয়। ক্ৰেগ মৰিছক তিনি বছৰ ন মাহৰ কাৰাদণ্ড দিয়া হৈছে।
আনহাতে, মীনাক্ষী ভাণ্ডাৰীক দুবছৰৰ কাৰাদণ্ড দিয়া হৈছে যদিও এই শাস্তি দুবছৰৰ বাবে স্থগিত ৰখা হৈছে। তেওঁক ২৫০ ঘণ্টা বিনা পাৰিশ্ৰমিকৰ সামাজিক কাম কৰাৰ লগতে ১৫ দিনৰ পুনৰ্বাসনমূলক কাৰ্যসূচীত অংশগ্ৰহণ কৰিবলৈও নিৰ্দেশ দিয়া হৈছে।
উল্লেখ্য যে, ক’ভিড মহামাৰীৰ সময়ত সমগ্ৰ বিশ্বতে চিকিৎসা সুৰক্ষা সামগ্ৰীৰ তীব্ৰ নাটনি হৈছিল। এনে সংকটৰ সুযোগ লৈ এই প্ৰৱঞ্চনা সংঘটিত কৰা হৈছিল। তদন্তকাৰী সংস্থাৰ মতে, এনে অপৰাধে ব্যৱসায়িক প্ৰতিষ্ঠানসমূহৰ আৰ্থিক ক্ষতি কৰাৰ লগতে সংকটৰ সময়ত চিকিৎসালয়সমূহৰ বাবে প্ৰয়োজনীয় সামগ্ৰী যোগান ধৰাৰ ক্ষেত্ৰতো বাধাৰ সৃষ্টি কৰে।
