শেষ অভাৰত ৮ ৰানৰ প্ৰয়োজন হৈছিল। হাতত তেতিয়াও চাৰিটা উইকেট, তথাপি চাপ তুংগত আছিল। প্ৰথম বলটোত নমন ধীৰে চাৰি মাৰি ভাৰতক জয়ৰ দুৱাৰদলিত উপনীত কৰে। পিছৰ দুটা বলত আহিল দুই ৰান। তাৰ পিছত মেট হেনৰীৰ চতুৰ্থটো বলত দুৰ্দান্ত ছয়! উস, শেষ হ’ল উত্তেজনাপূৰ্ণ মেচখন।
নিউজিলেণ্ডৰ বিৰুদ্ধে প্রথম টি-২০ত ভাৰতে ৪ উইকেটত জয়লাভ কৰি পাঁচখন খেলৰ শৃংখলাত ১-০ ব্যধানত অগ্রগতি লাভ কৰিলে৷ টিম ইণ্ডিয়াই কেৱল জয়লাভ কৰাই নহয়, মেচখনত অভিলেখ গঢ়িবলৈও সক্ষম হয়। টি-২০ আন্তঃৰাষ্ট্ৰীয় ক্ৰিকেটত সৰ্বোচ্চ ৰান অনুসৰণ কৰি ভাৰতে জয়লাভ কৰে।
এফালে গ্লেন ফিলিপছৰ বিধ্বংসী বেটিং, আনফালে সঞ্জু চেমছন, শ্ৰেয়াছ আয়াৰ আৰু নমন ধীৰৰ প্ৰত্যাক্ৰমণ – ক্ৰাইষ্টচাৰ্চৰ হেগলী অ’ভেলত অনুষ্ঠিত হোৱা মেচখন দুয়োটা দলৰ বেটছমেনৰ শক্তিৰ বাবে মেচখনত দেখা গ’ল ৰানৰ বৰষুণ। নিউজিলেণ্ডে ২০ অভাৰত ৮ উইকেটত ২২৫ ৰান সংগ্ৰহ কৰে। ইয়াৰ প্ৰত্যুত্তৰত ভাৰতে ১৯.৪ অভাৰত ৬ উইকেটৰ বিনিময়ত ২৩০ ৰান সংগ্ৰহ কৰি জয় আজুৰি আনে।
নিউজিলেণ্ডে মেচৰ আৰম্ভণিৰে পৰাই ভাৰতীয় বলাৰসকলৰ ওপৰত চাপ সৃষ্টি কৰিছিল। টিম ছেইফাৰ্ট আৰু ফিন এলেনৰ আক্রমণেৰে কিউই দলটোৱে প্রথম ছয় অভাৰতে ৬৫ ৰানলৈ লৈ যায়৷ ছেইফাৰ্টে ১৭টা বলত ২৪ ৰান সংগ্ৰহ কৰি উভতিছিল যদিও এলেনৰ বেটিং ৰখোৱা সহজ নাছিল। মাত্ৰ ২৪টা বলত তেওঁ ৪৫ ৰান সংগ্ৰহ কৰে। তেওঁৰ ইনিংছত আছিল পাঁচটা চাৰি আৰু দুটা ছয়।
ইয়াৰ পিছত ডেৰিল মিচেলৰ ১৯ বলত ২৮ ৰান সংগ্ৰহ কৰি দলটোক আগুৱাই লৈ যায়। অৱশ্যে নিউজিলেণ্ডৰ ইনিংছটোৰ আটাইতকৈ ডাঙৰ আকৰ্ষণ আছিল গ্লেন ফিলিপছ। তেওঁ মাত্ৰ ৪০টা বলত অপৰাজিত ৮২ ৰান সংগ্ৰহ কৰে। আঠটা চাৰি আৰু তিনিটা ছয়ৰে সজোৱা তেওঁৰ ইনিংছত কেইবাটাও চকু কপালত তুলিব পৰা শ্বট আছিল। শেষত বেভন জেকবছৰ ১৬ বলত ৩১ ৰানৰ বিস্ফোৰক ইনিংছেও নিউজিলেণ্ডক ডাঙৰ স্ক’ৰত উপনীত হোৱাত সহায় কৰে। তেওঁৰ ইনিংছত আছিল তিনিটা ছয়।
ভাৰতীয় বলাৰৰ ভিতৰত অক্ষৰ পেটেলে সৰ্বাধিক ৰান দিয়ে। তেওঁ চাৰি অভাৰত ৫১ ৰান দিয়ে। অৱশ্যে এটা উইকেট দখল কৰে। প্ৰায় চাৰি বছৰৰ অন্তত আন্তঃৰাষ্ট্ৰীয় ক্ৰিকেটলৈ ঘূৰি অহা ভুৱনেশ্বৰ কুমাৰেও ৪ অভাৰত ৪৯ ৰান দি কোনো উইকেট নাপালে। অৰ্শদীপ সিং আৰু মায়ংক যাদৱে এটাকৈ উইকেট দখল কৰে। নিউজিলেণ্ডৰ ইনিংছ শেষৰ পাঁচ অভাৰত ৬৭ ৰান সংগ্ৰহেৰে ৮ উইকেটত ২২৫ ৰানত অন্ত পৰে। ইয়াৰ পিছতে ভাৰতৰ সন্মুখত এক কঠিন প্ৰত্যাহ্বান – জয়ী হ’বলৈ ২২৬ ৰানৰ প্ৰয়োজন হৈছিল।
ডাঙৰ ৰান অনুসৰণ কৰি ভাৰতে আৰম্ভণিৰে পৰাই দ্ৰুতগতিত ৰান সংগ্ৰহ কৰিবলগীয়া হৈছিল। অভিষেক শৰ্মা আৰু সঞ্জু চেমচনে সেই কামটো কৰিছিল। অভিষেকে মাত্ৰ ১২টা বলত ২৯ ৰান সংগ্ৰহ কৰে। তেওঁৰ ইনিংছত আছিল দুটা চাৰি আৰু তিনিটা ছয়। আনহাতে, সঞ্জুৱে ৩৩টা বলত ৬৭ ৰানৰ আক্ৰমণাত্মক ইনিংছ খেলিছিল। তেওঁৰ ইনিংছত আছিল আঠটা চাৰি আৰু চাৰিটা ছয়।
পাৱাৰপ্লে’ত অ’পেনিং যুটিয়ে ৯৩ ৰান সংগ্ৰহ কৰি নিউজিলেণ্ডৰ বলাৰসকলৰ ওপৰত চাপ বৃদ্ধি কৰে। অৱশ্যে ৯৩ ৰানৰ অন্তত অভিষেক আউট হোৱাৰ পাছত ভাৰতে দ্ৰুতগতিত উইকেট হেৰুৱাবলৈ আৰম্ভ কৰে। সঞ্জুৱে ৬৭ ৰান সংগ্ৰহ কৰি আউট হয়। তিলক ভাৰ্মাই ১১টা বলত ৬ ৰান সংগ্ৰহ কৰে। ঈশান কিষাণেও ৩ বলত মাত্ৰ ১ ৰান কৰি আউট হয়।
মিডল অভাৰত নিউজিলেণ্ডে খেলখন নিয়ন্ত্ৰণ কৰিবলৈ চেষ্টা কৰে। কিন্তু ভাৰতে শ্ৰেয়াছ আয়াৰৰ বেটিঙেৰে পুনৰ যুঁজত নামিল। শ্ৰেয়াছে ২৬টা বলত ৪১ ৰান সংগ্ৰহ কৰে। তেওঁৰ ইনিংছত আছিল এটা চাৰি আৰু দুটা ছয়। অক্ষৰ পেটেলেও ১৪টা বলত ২৪ ৰান সংগ্ৰহ কৰি গুৰুত্বপূৰ্ণ অৱদান আগবঢ়ায়। তেওঁৰ ইনিংছত আছিল তিনিটা চাৰি আৰু এটা ছয়।
ক্ষিপ্ৰতাৰে ৰান কৰাৰ এই পৰ্যায়ত ভাৰতীয় বেটছমেনসকলে দেখুৱাইছিল যে ২২৫ ৰানৰ লক্ষ্য অনতিক্ৰম্য নহয়। ১৪.৩ অভাৰত ১৬৭ ৰানত অক্ষৰ আউট হোৱাৰ পাছত ভাৰত পুনৰ চাপত পৰে। সেই সময়ত জয়ী হ’বলৈ তেতিয়াও ৫৯ ৰানৰ প্ৰয়োজন আছিল, হাতত আছিল ৩৩টা বল।
সেই পৰিস্থিতিত নমন ধীৰে ক্ৰীজত শ্ৰেয়াছৰ লগত যোগ দিয়ে। তেওঁ আৰম্ভণিতে সাৱধানে খেলিছিল যদিও সোনকালেই হাত খুলিলে। নমনে মিচেল ছাণ্টনাৰৰ অভাৰত ছয় আৰু চাৰ মাৰি মেচখনৰ ছবি সলনি কৰে। শ্ৰেয়াছেও প্ৰত্যাক্ৰমণ অব্যাহত ৰাখে। ১৭ অভাৰৰ অন্তত ভাৰতৰ ৰান ১৯৭ত উপনীত হয়। শেষ ১৮টা বলত ২৯ ৰানৰ প্ৰয়োজন হয়।
অৱশ্যে মেচখনৰ উত্তেজনা তেতিয়াও আছিল। শ্ৰেয়াছক ১৮.১ অভাৰত এডাম মিলানৰ বলত মিচেল ছাণ্টনাৰে ধৰা পেলায়। ২১০ ৰানত ষষ্ঠটো উইকেট হেৰুৱাই পুনৰ চাপত পৰে ভাৰত। জয়ী হ’বলৈ ১১টা বলত ১৬ ৰানৰ প্ৰয়োজন হৈছিল। নীতিশ কুমাৰ ৰেড্ডীৰ সৈতে ক্ৰীজত আছিল নমন ধীৰ। সেই কঠিন পৰিস্থিতিতো নমনে নিজৰ আগ্ৰাসী বেটিঙৰ পৰা পিছুৱাই যোৱা নাছিল। শেষত ১৫টা বলত অপৰাজিত ৪২ৰানেৰে ভাৰতক জয়ী কৰি খেলপথাৰৰ পৰা ওলাই আহে।
ভাৰতক জয়ী হ’বলৈ শেষৰ দুটা অভাৰত ১৬ ৰানৰ প্ৰয়োজন হৈছিল। ১৯ নং অভাৰত মিলানৰ বিৰুদ্ধে নমন ধীৰে কেইটামান গুৰুত্বপূৰ্ণ বাউণ্ডেৰী মাৰিছিল। শেষ অভাৰৰ পূৰ্বে ভাৰতৰ ৰান ৬ উইকেটত ২১৮ ৰান আছিল। অৰ্থাৎ জয়ী হ’বলৈ ৬টা বলত ৮ ৰানৰ প্ৰয়োজন। বল আছিল মেট হেনৰীৰ হাতত। সেই সময়ত পৰিস্থিতি উত্তেজনাপূৰ্ণ আছিল। প্ৰথম বলত চাৰি ৰান কৰি নমনে ভাৰতৰ চাপ বহু পৰিমাণে হ্ৰাস কৰে। পৰৱৰ্তী বলত এটা ৰান লৈ তেওঁ ষ্ট্ৰাইক বজাই ৰাখিছিল। তৃতীয় বলত এটা ৰান লয় নীতিশ কুমাৰ ৰেড্ডীয়ে। সেই বলত ৰান আউটৰ সুযোগ নষ্ট কৰে নিউজিলেণ্ডে।
শেষত তিনিটা বলৰ পৰা মাত্ৰ দুই ৰানৰ প্ৰয়োজন হৈছিল। চতুর্থ বলত নমনে হেনৰীক বিশাল ছয় মাৰি ভাৰতৰ জয় নিশ্চিত কৰে৷ ১৫টা বলত তেওঁৰ অপৰাজিত ৪২ ৰান কৰে। তেওঁৰ ইনিংছত আছিল তিনিটা চাৰি আৰু তিনিটা ছয়। শেষৰ ফালে নীতিশৰ উপস্থিতিও গুৰুত্বপূৰ্ণ আছিল।
এই জয়েৰে ভাৰতে কেইবাটাও নজিৰ গঢ়ি তুলিলে। ২২৬ ৰান খেদি ভাৰতে মেচখনত জয়লাভ কৰে, যিটো পুৰুষৰ টি-২০ আন্তঃৰাষ্ট্ৰীয় ক্ৰিকেটত সৰ্বাধিক সফল ৰান চেজ। এই ফৰ্মেটত ইমান ডাঙৰ ৰান খেদি ভাৰতে আগতে কেতিয়াও জয়ী হোৱা নাছিল।
নিউজিলেণ্ডৰ মাটিত তেওঁলোকৰ বিৰুদ্ধে ইমান ডাঙৰ ৰান খেদি ফুৰাটোও এক ডাঙৰ কৃতিত্ব। আনহাতে, নিজৰ মাটিত নিউজিলেণ্ডৰ ২২৫/৪ স্ক’ৰটোও এক ডাঙৰ নজিৰ। গ্লেন ফিলিপছৰ অপৰাজিত ৮২ ৰান আৰু ২৪ বলত ফিন এলেনৰ ৪৫ ৰানৰ সৌজন্যত কিউইয়ে ডাঙৰ ৰান সংগ্ৰহ কৰে। কিন্তু ভাৰতীয় বেটছমেনৰ প্ৰত্যাক্রমণৰ বাবেই টিম ইণ্ডিয়াই শেষ হাঁহি মাৰিলে৷ পাঁচখন মেচৰ শৃংখলাত ১-০ ব্যৱধানত অগ্ৰগতি লাভ কৰিলে ভাৰতে।
