অৰুণাচল প্ৰদেশত প্ৰস্তাৱিত ১১,২০০ মেগাৱাট ক্ষমতাসম্পন্ন উজনি চিয়াং বহুমুখী নদীবান্ধ প্ৰকল্পৰ বিৰোধিতাৰে সাব্যস্ত কৰা প্ৰতিবাদে ভয়ংকৰ ৰূপ ধাৰণ কৰাৰ পৰিপ্ৰেক্ষিতত কেন্দ্ৰীয় চৰকাৰে ৰাজ্যখনলৈ কেন্দ্ৰীয় ৰিজাৰ্ভ আৰক্ষী বাহিনীৰ বিশেষ দাঙ্গা নিৰোধী গোট ‘ৰেপিড একচন ফৰ্চ’ৰ দুটা কোম্পানী প্ৰেৰণ কৰিছে। সংবাদ সংস্থা পিটিআইয়ে চৰকাৰী সূত্ৰৰ উদ্ধৃতিৰে প্ৰকাশ কৰা অনুসৰি, এই বাহিনীটোত প্ৰায় ২৫০ গৰাকী জোৱান আছে। শুকুৰবাৰে নিশা পাছিঘাটত এটা আৰক্ষী থানা, নেচনেল হাইড্ৰ’ইলেক্ট্ৰিক পাৱাৰ কৰ্পোৰেচনৰ কাৰ্যালয় আৰু ৰাজ্যিক বিজেপিৰ সভাপতিকে ধৰি তিনিগৰাকী ৰাজনৈতিক নেতাৰ বাসগৃহত প্ৰতিবাদকাৰীয়ে আক্ৰমণ তথা অগ্নিসংযোগ কৰাৰ পাছতে কেন্দ্ৰীয় গৃহ মন্ত্ৰালয়ে এই পদক্ষেপ গ্ৰহণ কৰে।
কেন্দ্ৰীয় গৃহ মন্ত্ৰালয়ৰ নিৰ্দেশমৰ্মে শনিবাৰে ভাৰতীয় বায়ুসেনাৰ এখন পৰিবহণ বিমানেৰে নৱী মুম্বাইৰ পৰা আৰএএফৰ দুটা কোম্পানীক পাছিঘাটলৈ আকাশমাৰ্গেৰে অনা হয় আৰু দেওবাৰে তেওঁলোকক উপদ্ৰৱজৰ্জৰ অঞ্চলত মোতায়েন কৰাৰ কথা। উল্লেখ্য যে আৰএএফ হৈছে বৃহৎ জনতা আৰু ৰাজহুৱা বিশৃংখলতা নিয়ন্ত্ৰণৰ বাবে বিশেষভাৱে প্ৰশিক্ষণপ্ৰাপ্ত চিআৰপিএফৰ এটা দাঙ্গা নিৰোধী শাখা। প্ৰশাসনিক সূত্ৰই জানিবলৈ দিয়া মতে, শুকুৰবাৰৰ পৰাই চিআৰপিএফৰ জোৱানসকলে প্ৰতিবাদ নিয়ন্ত্ৰণৰ চেষ্টা চলাই আছিল আৰু পৰিস্থিতি অধিক ভয়াৱহ হোৱাত বাধা দিছিল। এই সংঘৰ্ষত কেন্দ্ৰীয় বাহিনী আৰু ৰাজ্যিক আৰক্ষীৰ কেইবাগৰাকীও জোৱান আহত হৈছে। ৰাজ্যখনত ইতিমধ্যে চিআৰপিএফৰ দুটা বা তিনিটা বেটেলিয়ান স্থায়ীভাৱে মোতায়েন হৈ আছে।
অৰুণাচল প্ৰদেশৰ মুখ্যমন্ত্ৰীৰ কাৰ্যালয়ে প্ৰকাশ কৰা এক বিবৃতিত কোৱা হৈছে যে চিয়াং, উজনি চিয়াং আৰু পূব চিয়াং জিলাত আহ্বান জনোৱা ১২ ঘণ্টীয়া বন্ধ শুকুৰবাৰে দিনৰ ভাগত সাধাৰণতে শান্তিপূৰ্ণ আছিল। পিছে বন্ধৰ সময়সীমা উকলি যোৱাৰ পাছতে পূব চিয়াং জিলাৰ পাছিঘাটত হিংসাত্মক ঘটনাৰ সূত্ৰপাত হয় আৰু ই শনিবাৰে পুৱা প্ৰায় ৩:৩০ বজা পৰ্যন্ত অব্যাহত থাকে। প্ৰতিবাদকাৰীৰ এটা উন্মত্ত দলে এনএইচপিচিৰ কাৰ্যালয় আৰু আৰক্ষী থানাত জুই লগাই দিয়াৰ লগতে নেতাসকলৰ বাসগৃহত ব্যাপক ক্ষতিসাধন কৰে। প্ৰস্তাৱিত বৃহৎ নদীবান্ধ প্ৰকল্পটোৰ বিৰুদ্ধে থকা বিৰোধিতাৰ ফলস্বৰূপেই এই হিংসাত্মক ঘটনাৱলী সংঘটিত হয় বুলি ধাৰণা কৰা হৈছে।
পাছিঘাটত সংঘটিত এই হিংসাত্মক ঘটনাক মুখ্যমন্ত্ৰী পেমা খাণ্ডুৱে দুৰ্ভাগ্যজনক বুলি অভিহিত কৰি ৰাইজক শান্তি-শৃংখলা বজাই ৰাখিবলৈ আহ্বান জনাইছে। গণতন্ত্ৰত শান্তিপূৰ্ণ প্ৰতিবাদৰ এক গুৰুত্বপূৰ্ণ স্থান আছে যদিও ই আইনৰ গণ্ডীৰ ভিতৰত থাকিব লাগে বুলি মন্তব্য কৰি তেওঁ কয় যে ৰাজহুৱা বা ব্যক্তিগত সম্পত্তি ধ্বংস কৰা বা ৰাজহুৱা শৃংখলাত ব্যাঘাত জন্মোৱা কাৰ্য কেতিয়াও গ্ৰহণযোগ্য নহয়। সাম্প্ৰতিক সময়ত আইন-শৃংখলা জনিত পৰিস্থিতিৰ প্ৰতি লক্ষ্য ৰাখি ক্ষতিগ্ৰস্ত অঞ্চলসমূহত শান্তি ঘূৰাই আনিবলৈ ৰাজ্যিক প্ৰশাসন আৰু নিৰাপত্তাৰক্ষীয়ে যৌথভাৱে প্ৰচেষ্টা অব্যাহত ৰাখিছে।
