শিশুক দুটোপাল পোলিঅ’ প্ৰতিষেধক খুৱাবলৈ এতিয়া পাকিস্তানত যুদ্ধসদৃশ প্ৰস্তুতি চলাবলগীয়া হৈছে। স্বাস্থ্যকৰ্মীসকলক নিৰাপত্তা প্ৰদান কৰিবলৈ কেৱল কৰাচী চহৰতেই ৮ হাজাৰৰো অধিক আৰক্ষী মোতায়েন কৰা হৈছে। সোমবাৰৰ পৰা সমগ্ৰ পাকিস্তানত আৰম্ভ হোৱা এই পোলিঅ’ টিকাকৰণ অভিযান অহা ৮ নৱেম্বৰলৈকে চলিব। বিগত সময়ছোৱাত টিকাকৰণ কৰ্মীৰ ওপৰত সন্ত্ৰাসবাদীয়ে চলোৱা ধাৰাবাহিক আক্ৰমণৰ প্ৰতি লক্ষ্য ৰাখিয়েই প্ৰশাসনে এই কটকটীয়া নিৰাপত্তাৰ ব্যৱস্থা গ্ৰহণ কৰিছে।
কৰাচীৰ উপৰি বেলুচিস্তান প্ৰদেশতো কঠোৰ নিৰাপত্তাৰ মাজেৰে পোলিঅ’ টিকাকৰণ অভিযান আৰম্ভ হৈছে। প্ৰশাসনৰ সূত্ৰ অনুসৰি, স্পৰ্শকাতৰ এলেকাসমূহত অতিৰিক্ত আৰক্ষী বাহিনী মোতায়েন কৰাৰ লগতে অতৰ্কিত তালাচী অব্যাহত ৰখা হৈছে। চলিত বৰ্ষত পাকিস্তানত এতিয়ালৈকে ৮ টা ‘ৱাইল্ড পোলিঅ’ভাইৰাছ টাইপ ১’ সংক্ৰমণৰ ঘটনা পোহৰলৈ আহিছে। ইয়াৰে ছটা ঘটনা উত্তৰ-পশ্চিমৰ খাইবাৰ পাখতুনখোৱা প্ৰদেশত আৰু দুটা ঘটনা দক্ষিণৰ সিন্ধু প্ৰদেশত ধৰা পৰিছে।
পাকিস্তানত পোলিঅ’ কৰ্মীৰ নিৰাপত্তা এক দীৰ্ঘদিনীয়া উদ্বেগৰ বিষয় হৈ আহিছে। সন্ত্ৰাসবাদী সংগঠনসমূহে পোলিঅ’ টিকাকৰণ কেন্দ্ৰ আৰু স্বাস্থ্যকৰ্মীসকলৰ ওপৰত কেইবাবাৰো আক্ৰমণ চলাই বহু স্বাস্থ্যকৰ্মীক হত্যা কৰিছে। সন্ত্ৰাসবাদীসকলৰ সন্দেহ যে পোলিঅ’ প্ৰতিষেধক প্ৰদানৰ নামত চৰকাৰে তেওঁলোকৰ গোপন ঘাটিসমূহৰ তথ্য সংগ্ৰহ কৰে। আনহাতে, একাংশ কট্টৰপন্থীয়েও পোলিঅ’ টিকাকৰণৰ তীব্ৰ বিৰোধিতা কৰি আহিছে। তেওঁলোকৰ দাবী অনুসৰি, পোলিঅ’ প্ৰতিষেধক গ্ৰহণ কৰিলে মানুহৰ বন্ধ্যত্ব আহিব পাৰে আৰু শৰীৰত বিভিন্ন ৰোগে বাহ ল’ব পাৰে।
এই সকলো প্ৰত্যাহ্বানৰ মাজতো চৰকাৰী পৰিসংখ্যা অনুসৰি পাকিস্তানত পোলিঅ’ আক্ৰান্তৰ সংখ্যা ৯৯.৮ শতাংশ হ্ৰাস পাইছে। নব্বৈৰ দশকৰ আৰম্ভণিতে দেশখনত প্ৰায় ২০ হাজাৰ লোক পোলিঅ’ত আক্ৰান্ত হৈছিল যদিও যোৱা বছৰ এই সংখ্যা মাত্ৰ ৩১ জনলৈ হ্ৰাস পাইছে। বৰ্তমান চৰকাৰে সশস্ত্ৰ আৰক্ষীৰ নিৰাপত্তাৰ মাজেৰে এই টিকাকৰণ অভিযান সফলতাৰে সম্পন্ন কৰাৰ প্ৰয়াস অব্যাহত ৰাখিছে।
