দীপাৱলী আৰু কালীপূজা উদযাপনৰ সময়ত ফটকা-আতচবাজীৰ ফলত দেশৰ বিভিন্ন প্ৰান্তত ভয়ংকৰ অগ্নিকাণ্ড আৰু দুৰ্ঘটনা সংঘটিত হয়। অসমতো কমেও ১১টা অগ্নিকাণ্ডৰ ঘটনা সংঘটিত হোৱাৰ খবৰ পোৱা গৈছে। এই ঘটনাসমূহত তিনিজন লোক আহত হোৱাৰ লগতে কেইবাটাও ঘৰ, ব্যৱসায়িক প্ৰতিষ্ঠান আৰু বৃহৎ পৰিমাণৰ সামগ্ৰী জুইত জাহ যায়।
অসমৰ বিভিন্ন জিলাত ৮ নৱেম্বৰৰ সন্ধিয়াৰ পৰা নিশালৈকে কমেও ১১টা অগ্নিকাণ্ডৰ ঘটনা সংঘটিত হয়। ঘটনাসমূহৰ খবৰ পোৱা গৈছে।
তামুলপুৰত ঘৰ জুইত জাহ, বিস্ফোৰণ গেছ চিলিণ্ডাৰৰ
তামুলপুৰৰ নামতী গাঁৱত স্বপন দাস নামৰ লোকজনৰ বাসগৃহত ভয়ংকৰ অগ্নিকাণ্ড সংঘটিত হয়। সেই সময়ত পৰিয়ালৰ লোক ঘৰত নাছিল।
প্ৰাথমিক তথ্য অনুসৰি, বিদ্যুতৰ শ্বৰ্ট চাৰ্কিটৰ ফলত জুইৰ সূত্ৰপাত হোৱা বুলি সন্দেহ কৰা হৈছে। পিছত ঘৰৰ ভিতৰত থকা গেছ চিলিণ্ডাৰ বিস্ফোৰণ হোৱাত জুই অধিক ভয়ংকৰ হৈ পৰে।
এই অগ্নিকাণ্ডত ঘৰটোৰ লগতে এখন মটৰচাইকেল, ঘৰুৱা সামগ্ৰী, নগদ ধন আৰু সোণৰ আ-অলংকাৰ জুইত জাহ যায়। জুই নিৰ্বাপণ কৰিবলৈ গৈ দীপক দাস আৰু আজগৰ আলী নামৰ দুজন লোক আহত হয়। তেওঁলোকক চিকিৎসালয়ত ভৰ্তি কৰোৱা হয়।
যোৰাবাটত বাসগৃহ ভস্মীভূত, আহত বৃদ্ধ
যোৰাবাটৰ ১২ মাইলৰ সমীপৰ আমভেৰ গাঁৱত আন এটা ভয়ংকৰ অগ্নিকাণ্ড সংঘটিত হয়। অগ্নিকাণ্ডত এটা বাসগৃহ সম্পূৰ্ণৰূপে জুইত জাহ যায়।
ঘটনাৰ সময়ত ঘৰৰ ভিতৰত থকা ৰতন শৰ্মা নামৰ এজন বৃদ্ধ লোক আহত হয়। স্থানীয় লোকৰ মতে, বিদ্যুতৰ শ্বৰ্ট চাৰ্কিটৰ ফলত জুইৰ সূত্ৰপাত হৈছিল। আৰক্ষী আৰু অগ্নিনিৰ্বাপক বাহিনীয়ে তেওঁক উদ্ধাৰ কৰি চিকিৎসালয়লৈ প্ৰেৰণ কৰে। মৰিগাঁৱত ফটকাৰ জুইত প্ৰায় ৫০ ফুট ওপৰলৈ উঠিল জুইৰ শিখা।
মৰিগাঁৱৰ নাওকটা গাঁৱত ফটকাৰ পৰা ওলোৱা জুইৰ এক অৱশিষ্ট অংশ পৰি মৰাপাটৰ খেৰিৰ দ’মত জুই লাগে বুলি সন্দেহ কৰা হৈছে।
জুইৰ শিখা প্ৰায় ৫০ ফুট ওপৰলৈ উঠিছিল। পিছলৈ জুই কাষতে থকা ধানৰ নৰাৰ দ’মলৈও বিয়পি পৰে।
অগ্নিনিৰ্বাপক বাহিনী, স্থানীয় ৰাইজ আৰু এছ ডি আৰ এফৰ জোৱানে মিলি জুই নিৰ্বাপণ কৰে। অৱশ্যে কাষৰীয়া বাসগৃহসমূহলৈ জুই বিয়পাৰ পূৰ্বেই পৰিস্থিতি নিয়ন্ত্ৰণলৈ অনা হয়।
শিলচৰত ব্যৱসায়ীৰ গুদাম সম্পূৰ্ণৰূপে ভস্মীভূত
শিলচৰৰ ৰংপুৰ অঞ্চলত ব্যৱসায়ী সুমন ধৰৰ এটা ভাৰাতীয়া গুদামত অগ্নিকাণ্ড সংঘটিত হয়।
প্ৰাথমিক সন্দেহ অনুসৰি, ফটকাৰ পৰা ওলোৱা জুইৰ স্ফুলিংগ গুদামত পৰাৰ ফলতে অগ্নিকাণ্ডৰ সূত্ৰপাত হৈছিল। গুদামত মজুত কৰি ৰখা সকলো সামগ্ৰী জুইত জাহ যায়। ক্ষয়-ক্ষতিৰ সম্পূৰ্ণ পৰিমাণ এতিয়াও স্পষ্ট হোৱা নাই।
মানকাচৰত ১০০ কুইণ্টল মৰাপাট জুইত জাহ
দক্ষিণ শালমাৰা-মানকাচৰ জিলাৰ মালাখোৱা অঞ্চলত শ্বাহিদুৰ ৰহমান নামৰ লোকজনৰ বাসগৃহত অগ্নিকাণ্ড সংঘটিত হয়।
এই অগ্নিকাণ্ডত প্ৰায় ১০০ কুইণ্টল মৰাপাট জুইত জাহ যায়। লগতে ঘৰৰ অন্যান্য সম্পত্তিও নষ্ট হয়। ক্ষয়-ক্ষতিৰ পৰিমাণ কেইবালাখ টকা হ’ব বুলি অনুমান কৰা হৈছে। বিদ্যুতৰ শ্বৰ্ট চাৰ্কিটৰ ফলত জুইৰ সূত্ৰপাত হোৱা বুলি প্ৰাথমিকভাৱে সন্দেহ কৰা হৈছে।
ৰূপহীহাটত তিনিটাকৈ ঘৰ ভস্মীভূত, ৭ লাখৰো অধিক টকাৰ ক্ষতি
নগাঁও জিলাৰ ৰূপহীহাটৰ বৰঘুলি নম্বৰ ২ গাঁৱত ভয়ংকৰ অগ্নিকাণ্ডত তিনিটাকৈ বাসগৃহ সম্পূৰ্ণৰূপে ভস্মীভূত হয়।
এই ঘটনাত ৮০ হাজাৰ টকা নগদ ধনসহ মুঠ ৭ লাখ টকাৰো অধিক সম্পত্তি নষ্ট হয়।
বজালীত ফটকাৰ স্ফুলিংগৰ পৰা দুমহলীয়া অট্টালিকাত জুই
বজালীৰ পাঠশালাৰ ভট্টদেৱ নগৰৰ ১০ নম্বৰ ৱাৰ্ডত এটা দুমহলীয়া অট্টালিকাত অগ্নিকাণ্ড সংঘটিত হয়। ফটকাৰ পৰা ওলোৱা স্ফুলিংগৰ ফলতে জুই লগা বুলি সন্দেহ কৰা হৈছে। অগ্নিনিৰ্বাপক বাহিনীয়ে ঘটনাস্থলীত উপস্থিত হৈ জুই নিৰ্বাপণৰ চেষ্টা চলায়।
পলাশবাৰী, মঙলদৈ, লখিমপুৰ আৰু সৰুপথাৰতো অগ্নিকাণ্ডৰ ঘটনা সংঘটিত হয়। পলাশবাৰীৰ সৰাপাৰাত এটা জ্বলি থকা চাকিৰ পৰা, মঙলদৈৰ গৰিমাৰী গাঁৱত ফটকাৰ পৰা আৰু লখিমপুৰৰ শনি মন্দিৰৰ সমীপৰ চাইকেলৰ গুদামত ফটকাৰ পৰা জুই লগা বুলি সন্দেহ কৰা হৈছে।
ৰাজস্থানত ফটকাৰ দোকানত ভয়ংকৰ বিস্ফোৰণ, দুজনৰ মৃত্যু
ৰাজস্থানৰ পালি জিলাৰ ফলনা চহৰত দেওবাৰে নিশা প্ৰায় ১০ বজাত স্বৰ্ণ মন্দিৰৰ সমীপৰ এখন ফটকাৰ দোকানত ভয়ংকৰ অগ্নিকাণ্ড সংঘটিত হয়।
প্ৰাথমিক তথ্য অনুসৰি, পথত ফুটোৱা ফটকাৰ স্ফুলিংগ দোকানখনত পৰাৰ ফলতে জুইৰ সূত্ৰপাত হয়। মুহূৰ্তৰ ভিতৰতে জুই কাষৰ আন দুখন দোকানলৈ বিয়পি পৰে।
এই ঘটনাত দুজন লোকৰ মৃত্যু হয় আৰু এজন লোক আহত হয়। আন তিনিজন লোক সন্ধানহীন হৈ থকা বুলি প্ৰাথমিক প্ৰতিবেদনত প্ৰকাশ পাইছে। অগ্নিকাণ্ডত দুখন স্কুটাৰ, এখন মটৰচাইকেল আৰু এখন চাইকেলো জুইত জাহ যায়।
দিল্লীত ফটকাৰ ৰকেটৰ আঘাতত ১০ বছৰীয়া শিশুৰ মৃত্যু
দীপাৱলীৰ নিশা দিল্লীৰ নাৰেলাত এক হৃদয়বিদাৰক ঘটনা সংঘটিত হয়। ফটকা ফুটাই থকা অৱস্থাত এটা ৰকেট ফটকা আহি ১০ বছৰীয়া শিশুৰ পেটত আঘাত কৰে।
গুৰুতৰভাৱে আহত শিশুটিক চিকিৎসালয়লৈ নিয়া হয় যদিও তেওঁৰ মৃত্যু হয়। ঘটনাটোক লৈ আৰক্ষীয়ে তদন্ত আৰম্ভ কৰিছে।
পুনেত ৬৩টা অগ্নিকাণ্ডৰ ঘটনা
মহাৰাষ্ট্ৰৰ পুনে চহৰত দীপাৱলীৰ দিনা মুঠ ৬৩টা অগ্নিকাণ্ডৰ ঘটনা সংঘটিত হয় বুলি প্ৰতিবেদনত প্ৰকাশ পাইছে।
এই আটাইকেইটা ঘটনাৰ সৈতে ফটকাৰ সম্পৰ্ক থকা বুলি প্ৰতিবেদনত উল্লেখ কৰা হৈছে। অৱশ্যে কোনো লোকৰ মৃত্যু বা আঘাতৰ খবৰ প্ৰকাশ পোৱা নাই।
দিল্লীত ২১৪টা অগ্নিসংক্ৰান্ত ফোনকল, AIIMSত ৪২জন অগ্নিদগ্ধ ৰোগী
দিল্লী অগ্নিনিৰ্বাপক সেৱাৰ তথ্য অনুসৰি, ৮ নৱেম্বৰত দীপাৱলীৰ সময়ছোৱাত মুঠ ২১৪টা অগ্নিসংক্ৰান্ত ফোনকল লাভ কৰে বিভাগটোৱে। ইয়াৰে ২৪টা ঘটনা ফটকাৰ সৈতে জড়িত আছিল।
আনহাতে, দিল্লীৰ AIIMSত দীপাৱলী সম্পৰ্কীয় ৪২টা অগ্নিদগ্ধৰ ঘটনা পঞ্জীয়ন কৰা হয়। ইয়াৰে ১১জনৰ শৰীৰৰ অধিক অংশত গুৰুতৰভাৱে পোৰা আঘাত আছিল।
অগ্নিনিৰ্বাপক বাহিনীৰ পাঁচজন কৰ্মচাৰীয়েও জুই নিৰ্বাপণৰ সময়ত সামান্য আঘাত পায়।
দিল্লীৰ বায়ু প্ৰদূষণ ভয়ংকৰ অৱস্থালৈ
দীপাৱলীৰ পাছদিনা অৰ্থাৎ ৯ নৱেম্বৰৰ পুৱাৰ ভাগত দিল্লীৰ আকাশ ঘন ধোঁৱাৰে আৱৰি ধৰে। ফটকা ফুটোৱাৰ ফলত বায়ুত সূক্ষ্ম প্ৰদূষিত কণা আৰু ধোঁৱাৰ পৰিমাণ বৃদ্ধি পায়।
আল জাজিৰাৰ প্ৰতিবেদন অনুসৰি, দিল্লীৰ কেইবাটাও অঞ্চলত বায়ুৰ গুণগত মান সূচক (AQI) ৩৫০ অতিক্ৰম কৰে। ইয়াৰ ফলত শ্বাস-প্ৰশ্বাসজনিত সমস্যাত ভোগা লোক, শিশু আৰু বৃদ্ধসকলৰ স্বাস্থ্যৰ প্ৰতি বিশেষ বিপদৰ সৃষ্টি হৈছে।
