এখন যাত্ৰীবাহী বাছ দলঙৰ পৰা চিধাই নদীত বাগৰি পৰে। তাৰ আগতে বাছখন কমেও ১০০ মিটাৰ খাৱৈৰ পৰা তললৈ চুচুৰি গৈছিল। উত্তৰাখণ্ডৰ ঋষিকেশ-বদ্ৰীনাথ ঘাইপথত পুৱতি নিশা সংঘটিত হয় এক ভয়ংকৰ পথ দুৰ্ঘটনা।
বাতৰি মতে, বাছখনত কমেও ৩০ৰ পৰা ৩৫জন যাত্ৰী আছিল। ইয়াৰে ৮ জনৰ ইতিমধ্যে মৃত্যু হৈছে। দুৰ্যোগ ব্যৱস্থাপনা দলে আহতসকলক উদ্ধাৰৰ কাম আৰম্ভ কৰিছে। মৃতকৰ সংখ্যা আৰু বৃদ্ধি পাব পাৰে বুলি আশংকা কৰা হৈছে।
জানিব পৰা মতে, বাছখন হৰিদ্বাৰৰ পৰা আহি আছিল। মঙলবাৰে পুৱতি নিশা প্ৰায় ৩:৩০ বজাত হৰিদ্বাৰৰ পৰা কৰ্ণপ্ৰয়াগ অভিমুখে আহিছিল বাছখন। দুৰ্ঘটনাটোৰ সঠিক সময় এতিয়াও স্পষ্ট হোৱা নাই।
ঋষিকেশ-বদ্ৰীনাথ ঘাইপথেৰে যাওঁতে গুলাৰ অঞ্চলৰ সমীপত এখন দলং পাৰ হোৱাৰ সময়ত বাছখন খাৱৈত বাগৰি পৰে। প্ৰায় ১০০ মিটাৰ তললৈ নামি বাছখন খাৱৈৰ তলত নদীত পৰে। থিতাতে কমেও ৮ জন লোকৰ মৃত্যু হোৱা বুলি জানিব পৰা গৈছে।
দুৰ্ঘটনাৰ খবৰ পোৱাৰ পিছতে ৰাজ্যৰ দুৰ্যোগ ব্যৱস্থাপনা দলে উদ্ধাৰ অভিযান আৰম্ভ কৰে। বাছখন নদীত পৰি যোৱাৰ পিছত বহু যাত্ৰী আবদ্ধ হৈ পৰে বাছখনত। তেওঁলোকক এজন এজনকৈ ঋষিকেশ এইমছলৈ লৈ যোৱা হয়। তাত কমেও ২৬জন যাত্ৰী চিকিৎসাধীন হৈ আছে। সম্প্ৰতি কোনো যাত্ৰী নদীত উটি গৈছে নেকি সেয়া উদ্ধাৰকাৰীয়ে পৰীক্ষা কৰি আছে। ঘটনাৰ কেইবা ঘণ্টা পাৰ হৈ গ’লেও উদ্ধাৰ অভিযান পূৰ্ণগতিত চলি আছে।
জানিব পৰা মতে, যাত্ৰীসকলৰ ভিতৰত কলকাতা, বিহাৰ, অসম, দিল্লী, উত্তৰ প্ৰদেশৰ বাসিন্দাও আহত হৈছে। আহত যাত্ৰীসকলৰ অধিকাংশই ঝাৰখণ্ডৰ বাসিন্দা। বাছখনত উত্তৰাখণ্ডৰ একাংশ বাসিন্দাও আছিল। অৱশ্যে মৃত লোককেইজনৰ পৰিচয় এতিয়াও জানিব পৰা হোৱা নাই। আহতসকলৰ ভিতৰত সংকটজনক অৱস্থাৰ লোকসকলৰ পৰিচয়ো এতিয়াও জানিব পৰা হোৱা নাই।
প্ৰধানমন্ত্ৰী নৰেন্দ্ৰ মোদীয়ে তেওঁৰ এক্স হেণ্ডেলত এই মৰ্মান্তিক ঘটনাক লৈ শোক প্ৰকাশ কৰিছে। মৃতকৰ পৰিয়াললৈ সমবেদনা জ্ঞাপন কৰাৰ উপৰিও আহতসকলৰ আশু আৰোগ্য কামনা কৰিছে।
