ৰাজ্যখনৰ বিভিন্ন অঞ্চলত বানে তীব্ৰ ৰূপ ধাৰণ কৰাৰ সময়তে নগাওঁ জিলা বন সংমণ্ডলৰ অধীনৰ আৰু চামগুৰি সমষ্টিৰ নিকটৱৰ্তী অঞ্চলত অৱস্থিত বুঢ়াচাপৰি বন্যপ্ৰাণী অভয়াৰণ্যখনলৈ বৰ্তমান নামি আহিছে চৰম ভাবুকি।
সম্প্ৰতি প্ৰলংয়কাৰী বানৰ কবলত পৰি বুঢ়াচাপৰি বন্যপ্ৰাণী অভয়াৰণ্যখনৰ জীৱ-জন্তুসমূহ এক প্ৰকাৰে আশ্ৰয়হীন হোৱাৰ উপক্ৰম হৈছে। ব্ৰহ্মপুত্ৰৰ বাঢ়নী পানী ক্ৰমাৎ সোমাই অহাৰ লগে লগে প্লাৱিত হৈছে অভয়াৰণ্যখনৰ ন ন অঞ্চল।
বৰ্তমান বলিয়া বানৰ কোৱাল সোতঁত আটাইকেইটা বন শিবিৰেই প্লাবিত হোৱাৰ আশংকা প্ৰকাশ কৰিছে সংশ্লিষ্ট কৰ্তৃপক্ষই। উল্লেখ্য যে, বিগত বৰ্ষৰ পৰা হোৱা ব্যাপক গৰাখহনীয়াৰ বাবে প্ৰায় নি:শেষ হৈছিল অভয়াৰণ্যখনৰ এক চতুৰ্থাংশ বনভূমি।
বৰ্তমান পুৰণি হাইলেণ্ড কেইটাত বনৰীয়া জীৱ-জন্তুসমূহে আশ্ৰয় গ্ৰহণ কৰিছে যদিও পৰৱৰ্ত্তী সময়ত ব্ৰহ্মপুত্ৰৰ জলস্তৰ বৃদ্ধি পালে অধিক ক্ষয়-ক্ষতি হোৱাৰ শংকা প্ৰকাশ কৰিছে অভয়াৰণ্য খনৰ কৰ্তৃপক্ষই।
আনহাতে, বৰলুইতৰ বলিয়া বানে সংহাৰীৰূপ ধাৰণ কৰাত চামগুৰি সমষ্টিৰ অন্তৰ্গত ভূৰবন্ধা অঞ্চলৰ ৰাইজ আতংকিত হৈ পৰিছে ৷ যদিও আজি পুৱাৰে পৰা ভূৰবন্ধা অঞ্চলত বাঢ়নী পানীৰ জলস্তৰ আংশিক পৰিমানে হ্ৰাস পাইছে তথাপিও ভূৰবন্ধা অঞ্চলৰ ৰাইজৰ মাজত আশংকা কমা নাই।
ইপিনে বিগত বৰ্ষ সমূহত সৃষ্টি হোৱা অভাবনীয় বান আৰু খহনীয়াত ঘৰ বাৰী, মাটি ভেটি ব্ৰহ্মপুত্ৰৰ বুকুত জাহ যোৱাৰ ফলত প্ৰায় ৫ শতাধিক পৰিয়ালে মাথাউৰিতে আজিও দুৰ্বিসহ জীৱন নিৰ্বাহ কৰি আছে যদিও কোনো ধৰণৰ চৰকাৰী সা-সুবিধা নোপোৱাৰ অভিযোগ উত্থাপিত হৈছে।
