লিংগ পৰিৱৰ্তনকাৰী স্বাতী বিধান বৰুৱা অসমৰ প্ৰথমগৰাকী তৃতীয় লিংগৰ ন্যায়াধীশ হিচাপে নিযুক্ত হৈছে। দেশৰ ভিতৰতে তৃতীয় লিংগৰ তৃতীয়গৰাকী ন্যায়াধীশ হিচাপে পৰিগণিত হোৱা বৰুৱাই গুৱাহাটীত অহা শনিবাৰে অনুষ্ঠিত হ’ব লগা লোক আদালতত ২০ গৰাকী ন্যায়াধীশৰ এগৰাকী হিচাপে ভাগ ল’ব।
কামৰূপ (মহানগৰ)জিলা আইনী সাহায্য কৰ্তৃপক্ষই বৰুৱাক এই পদত নিযুক্তি দিছে।
তৃতীয় লিংগৰ লোকসকলৰ অধিকাৰৰ বাবে দীৰ্ঘদিনধৰি যুঁজি অহা স্বাতীয়ে এই নিযুক্তিত আনন্দ প্ৰকাশ কৰিছে। ‘আমি, তৃতীয় লিংগৰ ব্যক্তিসকল, প্ৰায়েই একাংশ মানুহৰ দ্বাৰা ৰাজহুৱাকৈ ঠাট্টা-মস্কৰাৰ সন্মুখীন হ’ব লগা হয়। মই নিশ্চিত যে মোৰ এই নিযুক্তিয়ে তেওঁলোকক এই কথা উপলব্ধি কৰোৱাব যে তৃতীয় লিংগৰ ব্যক্তিসকল অস্পৃশ্য নহয়,’ সংবাদ মাধ্যমত মন্তব্য উল্লসিত স্বাতীৰ।
লিংগ পৰিৱৰ্তনত পৰিয়ালৰ বিৰোধিতা কৰি বম্বে’ উচ্চ ন্যায়ালয়ত ২০১২ চনত তৰা এক গোচৰৰ জৰিয়তে স্বাতী দেশজোৰা চৰ্চালৈ আহিছিল।
গুৱাহাটীৰ কামৰূপ জিলা আৰু সত্ৰ ন্যায়াধীশ চৌহদত শনিবাৰে হ’ব লগা লোক আদালতত অধ্যক্ষতা কৰিব অৱসৰপ্ৰাপ্ত ন্যায়াধীশ এইচ আলী হাজৰিকাই।
স্বাতীৰ পূৰ্বে পশ্চিম বংগৰ জয়িতা মণ্ডলে দেশৰ প্ৰথমগৰাকী আৰু মহাৰাষ্ট্ৰৰ ৱিদ্যা কাম্বলে দ্বিতীয়গৰাকী তৃতীয় লিংগৰ ন্যায়াধীশৰূপে নিযুক্ত হৈছিল।
পুৰুষ আৰু মহিলা এই দুই লিংগৰ বাহিৰৰ সমকামী, উভয়কামী আৰু ত্ৰান্সজেন্দাৰ (LGBT) ব্যক্তিসকল বিশ্বজুৰি তৃতীয় লিংগ হিচাপে স্বীকৃত।
