ৰাষ্ট্ৰীয় নাগৰিক পঞ্জীৰ চূড়ান্ত খচৰা প্ৰকাশলৈ মাজত মাত্ৰ ১০ দিন বাকী আছে। অসমবাসীৰ জাতীয় জীৱনৰ দলিল ৰাষ্ট্ৰীয় নাগৰিক পঞ্জীৰ বাবে প্ৰতিগৰাকী বৈধ ভাৰতীয়ই অতি আশাৰে অপেক্ষা কৰিছে। চূড়ান্ত খচৰাৰ সময় যিমানেই ওচৰ চাপি আহিছে, সিমানেই অসম বিৰোধী চক্ৰ সক্ৰিয় হৈ পৰিছে। অসমৰ খিলঞ্জীয়া লোকক শত্ৰু আচৰণ কৰি বিদেশী বাংলাদেশীক সুৰক্ষা দিবলৈ তৎপৰ হৈ পৰিছে এই চক্ৰ। আন্তৰ্জাতিক পৰ্যায়ত ৰাষ্ট্ৰীয় নাগৰিক পঞ্জীৰ বিৰুদ্ধে ব্যাপক চূড়ান্ত অপপ্ৰচাৰ চলাইছে এই চক্ৰই। শেহতীয়াকৈ ‘আৱাজ ডট অৰ্গ’ নামৰ ৱে’বছাইটটোৱে এন আৰ চিৰ বিৰুদ্ধে চলোৱা অপপ্ৰচাৰে সমগ্ৰ অসমবাসীৰ চকু কঁপালত তুলিছে। এন আৰ চিত লাখ লাখ মুছলমান লোকৰ নাম কৰ্তন কৰা হৈছে বুলি প্ৰচাৰ চলাইছে ৱেবছাইটটোৱে। লাখ লাখ মুছলমানৰ নাম কৰ্তনৰ বিৰোধিতা কৰিবলৈ আহ্বান জনাই ‘আৱাজ’এ অভিযান চলাইছে। ‘ইণ্ডিয়া! ষ্টপ ডিলিটিং মুছলিম’ শিৰোনামৰ অনলাইন অভিযানত অংশগ্ৰহণ কৰিছে বিভিন্ন দেশৰ লোকে। ৱে’বছাইটটোৱে এনে এক ধাৰণা দিছে যে- উদ্দেশ্যপ্ৰণোদিতভাৱে এন আৰ চি কৰ্তৃপক্ষই বৈধ ভাৰতীয় মুছলমানৰ নাম কৰ্তন কৰিছে। ইয়াৰ ফলত এক অভূতপূৰ্ব পৰিস্থিতিৰ উদ্ভৱ হ’ব বুলি ক’ব বিচাৰিছে। ‘আৱাজ’ৰ এই চূড়ান্ত মিথ্যাচাৰৰ প্ৰভাৱত বিশ্বৰ বিভিন্ন দেশৰ লোকে অসমত গোষ্ঠীগত নিষ্কাষণৰো আশংকা প্ৰকাশ কৰিছে। আনকি বহু লোকে এন আৰ চি কৰ্তৃপক্ষক এনে কামৰ পৰা বিৰত থাকিবলৈ সকীয়াই দিছে। অসমৰ পৰিস্থিতিৰ ওপৰত ৰাষ্ট্ৰসংঘৰ সচিব প্ৰধানৰো হস্তক্ষেপ দাবী কৰিছে। ‘আৱাজ ডট অৰ্গ’এ কিহৰ কাৰণে এই অপপ্ৰচাৰ চলাইছে? ইয়াৰ অন্তৰালত কোন অপশক্তি জড়িত আছে? এই সকলোবোৰ কথা অসমৰ ৰাইজে বিচাৰ-বিবেচনা কৰিব লাগিব। এই অপপ্ৰচাৰক আওকাণ কৰি থাকিব নোৱাৰি। আমাৰ দেশৰ সম্পূৰ্ণ বিধি ব্যৱস্থাৰ মাজত ৰাষ্ট্ৰীয় নাগৰিক পঞ্জী উন্নীতকৰণ প্ৰক্ৰিয়া চলিছে। উচ্চতম ন্যায়ালয়ৰ কঠোৰ নিৰীক্ষণত এন আৰ চি কৰ্তৃপক্ষই কাম কৰিছে। এন আৰ চি উন্নীতকৰণৰ প্ৰক্ৰিয়া সকলো দল-সংগঠনৰ ঐকমত্যৰ ভিত্তিত হৈছে। এন আৰ চি কৰ্তৃপক্ষই এনেদৰে কাম কৰিছে যে- যাতে এজনো প্ৰকৃত ভাৰতীয়ৰ নাম এন আৰ চিৰ পৰা বাদ নপৰে আৰু এজনো বিদেশীৰ নাম অন্তৰ্ভুক্ত নহয়। তাৰবাবে এন আৰ চিৰ নিয়ম-নীতি পানী নসৰকা কৰা আছে। যদিহে প্ৰকৃত ভাৰতীয়ৰ নাম বাদ পৰে তেনেহ’লে তাক অন্তৰ্ভুক্ত কৰাৰ সকলো ব্যৱস্থাও ৰখা হৈছে। বিশেষকৈ উচ্চতম ন্যায়ালয়ৰ সম্পূৰ্ণ তদাৰকত হোৱা এন আৰ চি উন্নীতকৰণ প্ৰক্ৰিয়াত সন্দেহ কৰিবলগীয়া কোনো যুক্তিয়ে থাকিব নোৱাৰে।
তেতিয়াহ’লে আন্তৰ্জাতিক পৰ্যায়ত কিয় অপপ্ৰচাৰ চলোৱা হৈছে? ইয়াৰ মূল উদ্দেশ্য হৈছে- অসমৰ খিলঞ্জীয়া লোকৰ ৰক্ষাকবচ স্বৰূপ এন আৰ চি উন্নীতকৰণ প্ৰক্ৰিয়াত ব্যাঘাত জন্মোৱা। ব্যাঘাত জন্মাব বিচৰা সকলৰ বিৰুদ্ধে সবল প্ৰতিবাদ হ’ব লাগে। ইতিমধ্যে এন আৰ চি কৰ্তৃপক্ষই ‘আৱাজ ডট অৰ্গ’ৰ ওপৰত চোকা নজৰ ৰাখিছে। ‘আৱাজ’ৰ অপপ্ৰচাৰৰ প্ৰত্যুত্তৰো দিছে। কিন্তু অপপ্ৰচাৰৰ বিৰুদ্ধে আমাৰ কেন্দ্ৰ চৰকাৰ আৰু ৰাজ্য চৰকাৰেও শক্তিশালী ভূমিকা গ্ৰহণ কৰিব লাগে।
ভাৰতবৰ্ষৰ ৰাজ্য এখনৰ ৰাষ্ট্ৰীয় নাগৰিক পঞ্জীৰ উন্নীতকৰণত বিসংগতি হোৱা বুলি আন্তৰ্জাতিক পৰ্যায়ত অপপ্ৰচাৰ চলোৱাৰ বিৰুদ্ধে কেন্দ্ৰ চৰকাৰে ‘আৱাজ ডট অৰ্গ’ক জাননী দিব পাৰে। প্ৰশ্ন কৰিব লাগে- সম্পূৰ্ণ বিধি ব্যৱস্থাৰ মাজেৰে চলি থকা এন আৰ চিৰ কাম-কাজক লৈ কি যুক্তিত এই অপপ্ৰচাৰ চলাইছে? এই অপপ্ৰচাৰত কোনে সাৰ-পানী যোগাইছে তাৰ তদন্ত হ’ব লাগে। দৃঢ়তাৰে এই কথা দাঙি ধৰিব লাগে যে- এন আৰ চি কোনো হিন্দু-মুছলমানৰ ভিত্তিত কৰা হোৱা নাই। স্বদেশী-বিদেশী প্ৰসংগক লৈহে এন আৰ চি উন্নীতকৰণ কৰা হৈছে।
যদিহে কেন্দ্ৰ চৰকাৰে এই ক্ষেত্ৰত শক্তিশালী প্ৰত্যুত্তৰ নিদিয়ে তেতিয়াহ’লে অপপ্ৰচাৰ একেদৰেই চলি থাকিব।
‘আৱাজ ডট অৰ্গ’ৰ ভূমিকাত ক্ষুব্ধ হৈ পৰিছে অসমৰ জাতীয় দল-সংগঠন। সকলোৱে একেমুখে ইয়াক গৰিহণা দিয়াৰ লগতে অপপ্ৰচাৰ বন্ধৰ দাবী তুলিছে। অসমত এই অপপ্ৰচাৰৰ বিৰুদ্ধে শক্তিশালী প্ৰতিবাদ হ’ব লাগে। আন্তৰ্জাতিক পৰ্যায়ত অসমৰ মান অৱনমিত কৰা এই অপশক্তিক উচিত প্ৰত্যুত্তৰ দিয়াৰ সময় আহিল।
জাতীয় জীৱনৰ গুৰুত্বপূৰ্ণ সময়ত আউল লগাব বিচৰা আন্তৰ্জাতিক চক্ৰৰ সৈতে ভাৰত তথা অসমৰো কোনোবা মহল জড়িত আছে নেকি? সেয়া আটাইতকৈ বিচাৰ্য্যৰ বিষয়।
ইয়াৰ পূৰ্বে ৰাষ্ট্ৰসংঘৰ মানৱ অধিকাৰ আয়োগেও আমাৰ দেশৰ বৈদেশিক পৰিক্ৰমা মন্ত্ৰ্যালয়লৈ এই সন্দৰ্ভত পত্ৰ প্ৰেৰণ কৰিছিল। তেওঁলোকৰো কথা একেই আছিল। বহু বাঙালী মুছলমানৰ নাম কৰ্তন হ’ব বুলি আশংকা কৰিছিল ৰাষ্ট্ৰসংঘৰ মানৱ অধিকাৰ আয়োগে। সেই বাবে সন্দেহ হয়- আন্তৰ্জাতিক পৰ্যায়ত এই কাৰ্যকলাপৰ নেপথ্যত কোনোবা অসম বিৰোধী সাম্প্ৰদায়িক শক্তি জড়িত থাকিব পাৰে। যিসকলে অসমৰ বিদেশী সমস্যাৰ সমাধান নিবিচাৰে। যিসকলে বিদেশীৰ আগ্ৰাসনত খিলঞ্জীয়াৰ অস্তিত্ব নিঃশেষ হোৱা বিচাৰে। এন আৰ চিক লৈ ভয় খাইছে কোনে? বৈধ ভাৰতীয়ই এন আৰ চিত ভয় খোৱাৰ যুক্তি ক’ত? আতংকিত হৈছে কোন? যাৰ নাগৰিকত্বক লৈ সন্দেহ হৈছে তেওঁলোকহে শংকিত হৈছে।
সকলোৱে জানে যে- এন আৰ চিত নাম অন্তৰ্ভুক্ত নোহোৱাসকল বিদেশী বুলি পৰিগণিত হ’ব পাৰে। বিদেশী বহিষ্কাৰৰ বাবে ৬বছৰীয়া অসম আন্দোলন হৈ গ’ল। ঐতিহাসিক অসম আন্দোলনৰ ফলত স্বাক্ষৰ হ’ল অসম চুক্তি। কিন্তু আজিও বিদেশী চিনাক্তকৰণ আৰু বহিষ্কৰণৰ কোনো কামেই আগনাবাঢ়িল। উচ্চতম ন্যায়ালয়ৰ কঠোৰ নিৰ্দেশ আৰু নিৰীক্ষণৰ মাজেৰে এন আৰ চিৰ কাম সম্পন্ন হ’বলৈ আগবঢ়াত সমূহ অসমবাসীয়ে স্বস্তিৰ নিশ্বাস ল’ব বিচাৰিছে।
এন আৰ চিৰ পিছত হ’ব পৰা পৰিস্থিতিক লৈ কাল্পনিক জগত এখন সৃষ্টি কৰি অপপ্ৰচাৰ চলোৱা সকল অসমৰ খিলঞ্জীয়া লোকৰ শত্ৰু। তেওঁলোকক চিনাক্ত কৰিবই লাগিব। তেতিয়াহে ৰক্ষা পৰিব অসমীয়া জাতি।
(লেখক গুৱাহাটীস্থিত এজন জ্যেষ্ঠ সাংবাদিক। ই মে’ইল : [email protected])
