ৰাষ্ট্ৰীয় নাগৰিকপঞ্জীৰ সম্পূৰ্ণ খচৰা প্ৰকাশ হ’ল। ৩০ জুলাইৰ দিনা পুৱা ১০ বজাত দেশৰ মহাপঞ্জীয়ক শৈলেশ আৰু এন আৰ চিৰ মুখ্য সমন্বয়ক প্ৰতীক হাজেলাই সম্পূৰ্ণ খচৰা ৰাজহুৱা কৰাৰ লগে লগে ৰচিত হ’ল এক সোণালী মুহূৰ্ত। সমগ্ৰ অসমবাসী কেইবা দশক ধৰি ককবকাই থকা বিদেশী সমস্যাৰ সমাধানৰ এক আনুষ্ঠানিক ঢাপ যেন এই মুহূৰ্ত। ইয়াৰ সাক্ষী হৈ ৰ’ল ৰাজ্যখনৰ সকলো লোক।
খচৰা প্ৰকাশৰ পিছত সম্পূৰ্ণ শান্তি বিৰাজ কৰিছে অসমত। নাম অন্তৰ্ভুক্ত নোহোৱা লোকসকলৰ মাজতো কোনো ভয় বা শংকাৰ পৰিৱেশ সৃষ্টি হোৱা নাই। পূৰ্বৰ সকলো আশংকা নাইকিয়া কৰিলে অসমৰ গণতান্ত্ৰিক ৰাইজে। সকলোবোৰ ঠিকেই আছে। কিন্তু, অসমৰ এন আৰ চিক লৈ কুটিল অভিসন্ধি কৰিছে মমতা বেনাৰ্জী নেতৃত্বাধীন তৃণমূল কংগ্ৰেছে।
৩০ জুলাইত এন আৰ চিৰ সম্পূৰ্ণ খচৰা প্ৰকাশ হোৱাৰ কিছু সময়ৰ পিছৰ পৰা বিষবাষ্প বিয়পাবলৈ অপচেষ্টা চলাইছে পশ্চিম বংগৰ মুখ্য মন্ত্ৰী মমতা বেনাৰ্জীয়ে। মমতা বেনাৰ্জীয়ে এনেকুৱা এক পৰিৱেশৰ সৃষ্টি কৰিব বিচাৰিছে যে- এন আৰ চি-এ গৃহযুদ্ধৰ সূচনা কৰিব। এখন ৰক্তাক্ত সমাজৰ ফালে লৈ যাব। তেওঁ স্পষ্টভাৱেই কৈছে- অসমত গৃহযুদ্ধৰ সূচনা হ’ব বুলি।
কেৱল মন্তব্য দিয়েই ক্ষান্ত হোৱা নাই মুখ্য মন্ত্ৰীগৰাকী। বিজেপিবিৰোধী আন ৰাজনৈতিক দলৰ সৈতে লগ লাগি বিষয়টো অধিক জটিল কৰি তুলিব বিচাৰিছে। বিজেপিৰ বিৰুদ্ধে অসমৰ এন আৰ চিক তেওঁ ৰাজনৈতিক অস্ত্ৰ হিচাপে ব্যৱহাৰ কৰিছে। যিকোনো প্ৰকাৰে এন আৰ চি বন্ধ কৰা আৰু অসমত অশান্তিৰ সূত্ৰপাত ঘটাবলৈ প্ৰতি মুহূৰ্ততে চেষ্টা কৰিছে মমতা বেনাৰ্জীয়ে। ৩০ জুলাইৰ পৰা এতিয়ালৈকে এন আৰ চিক লৈ মমতা বেনাৰ্জীয়ে কি কৰিছে সকলোৱে দেখিছে। অসমত ইয়াৰ বিৰুদ্ধে তীব্ৰ প্ৰতিবাদ হৈছে। তৃণমূল কংগ্ৰেছত পদত্যাগৰ জোৱাৰ উঠিছে। ইজনৰ পিছত সিজন নেতাই দল ত্যাগ কৰিছে। তৎসত্বেও থমকি ৰোৱা নাই মমতা বাহিনী।
অসমত এন আৰ চিক লৈ সম্পূৰ্ণ শান্তিপূৰ্ণ পৰিৱেশে বিৰাজ কৰি থকাৰ সময়ত উগ্ৰ বিভেদকামী দৃষ্টিভংগীৰে আহিছিল তৃণমূল কংগ্ৰেছৰ প্ৰতিনিধিৰ দল। সেই প্ৰতিনিধি দলটোক শিলচৰৰ কুম্ভীৰগ্ৰাম বিমান বন্দৰৰপৰাই অসম চৰকাৰে ওভতাই পঠিয়াইছে। প্ৰতিনিধি দলটোৱে বিমান বন্দৰত কি পৰিস্থিতি উদ্ভৱ কৰিলে সেয়া টেলিভিচনৰ পৰ্দাত সমগ্ৰ দেশবাসীয়ে দেখিলে।
এতিয়া প্ৰশ্ন হৈছে যে- তৃণমূল কংগ্ৰেছৰ প্ৰতিনিধি দলটোক বৰাকৰ জনসাধাৰণে আদৰণি জনাইছিলনে? আমি পোৱা খবৰ অনুসৰি বৰাকৰ সৰ্বসাধাৰণ ৰাইজৰ মাজত তৃণমূল কংগ্ৰেছৰ ভূমিকাক লৈ কোনো সদভাৱ নাই। বৰঞ্চ তেওঁলোকে মমতা বেনাৰ্জীৰ কাৰ্য্যত ক্ষুব্ধ হৈহে পৰিছে। খচৰা প্ৰকাশ হোৱাৰ পিছত বৰাকৰ পৰিৱেশ সম্পূৰ্ণ শান্ত। খচৰাত নাম অন্তৰ্ভুক্ত নোহোৱা সকলো উদ্বিগ্ন নহয়। কাৰণ উচ্চতম ন্যায়ালয়ে নিৰ্ধাৰণ কৰি দিয়া বিধি-ব্যৱস্থা আৰু চৰকাৰৰ আশ্বাসত আশ্বস্ত হৈছে তেওঁলোক। প্ৰকৃত বৈধ ভাৰতীয় নাগৰিকৰ নাম কোনো প্ৰকাৰে কৰ্তন নহয় চূড়ান্ত এন আৰ চিৰ পৰা। চূড়ান্ত এন আৰ চিত অন্তৰ্ভুক্ত হ’বই। কেৱল মমতা বেনাৰ্জীয়েহে এন আৰ চিক লৈ সমস্যা দেখিছে।
ৰাজ্যখনৰ দীৰ্ঘদিনীয়া অবৈধ বিদেশীৰ সমস্যা সমাধানৰ বাবে ৰাষ্ট্ৰীয় নাগৰিকপঞ্জী উন্নীতকৰণ হ’বই লাগিব। তাৰ কোনো বিকল্প নাই। যিহেতু উচ্চতম ন্যায়ালয়ৰ কঠোৰ নিৰ্দেশ আৰু নিৰৱচ্ছিন্ন তদাৰকিৰ মাজত এন আৰ চিৰ কাম চলিছে। তাত একোৱেই সুৰুঙা নাই।
সকলো দল-সংগঠনৰ সহমতৰ ভিত্তিত এন আৰ চিৰ নিয়মাৱলী যুগুত কৰা হৈছে। এতিয়া এই এন আৰ চি মানৱতাবিৰোধী বুলি পশ্চিম বংগৰ মুখ্য মন্ত্ৰীগৰাকীয়ে কৰা মন্তব্য গৰিহণাৰ যোগ্য। ৰাজনৈতিক লাভালাভৰ বাবে কি কৰিব নোৱাৰে ৰাজনীতিবিদে? তাৰেই জলন্ত প্ৰমাণ মমতা বেনাৰ্জী।
বৰ্তমান এন আৰ চিক লৈ খঙত জ্বলিপকি থকা মমতা বেনাৰ্জীয়ে মনত পেলাওক ২০০৫ চনৰ ৪ আগষ্টৰ দিনটো। সেইদিনা তেওঁ লোকসভাৰ মজিয়াত কি কৰিছিল? পশ্চিম বংগত বাংলাদেশীৰ অবৈধ প্ৰব্ৰজনে ধ্বংসলীলা চলাইছে বুলি সজোৰে উত্থাপন কৰিব বিচাৰিছিল। সদনত তেওঁ ২২ মিনিটত ১৪বাৰ চিঞৰি চিঞৰি কৈছিল যে- পশ্চিম বংগলৈ অবাধ অনুপ্ৰৱেশ হৈছে। পশ্চিম বংগৰ ভোটাৰ তালিকাত বৃহৎসংখ্যক বাংলাদেশীৰ নাম অন্তৰ্ভুক্ত হোৱা বুলিও দাবী কৰিছিল। তেতিয়া মমতা বেনাৰ্জীক উভতি ধৰিছিল চি পি আই (এম)ৰ সাংসদ বাসুদেৱ আচাৰ্যই। অৰ্থাৎ ভাৰতবৰ্ষলৈ প্ৰতিবেশী বাংলাদেশৰ পৰা অবৈধ প্ৰব্ৰজন হোৱাৰ কথা দেশৰ সংসদৰ মজিয়াত দাঙি ধৰিছিল মমতা বেনাৰ্জীয়ে।
আৰু তেওঁ ভালকৈয়ে জানে- পশ্চিম বংগতকৈ অসমত বাংলাদেশী অনুপ্ৰৱেশৰ সমস্যা অধিক ভয়াৱহ। আজি এন আৰ চি-এ গৃহযুদ্ধৰ সূচনা কৰিব বুলি কওঁতে এবাৰলৈ হ’লেও নেত্ৰীগৰাকীয়ে মনত পেলাওক ১৩ বছৰৰ আগৰ এই দিনটোৰ কথা!
মমতা বেনাৰ্জী আৰু তৃণমূল কংগ্ৰেছ আজি এক অসমবিৰোধী শক্তি হিচাপে থিয় হোৱাতো অতি দুৰ্ভাগ্যজনক। এখন ৰাজ্যৰ মুখ্য মন্ত্ৰীৰ এনে দায়িত্বহীন মন্তব্য আৰু কাৰ্য্য গভীৰ উদ্বেগৰ বিষয়। অৱশ্যে ইয়াৰ বিৰুদ্ধে অসমৰ জনসাধাৰণে উচিত প্ৰত্যুত্তৰ দিছে। তেওঁৰ প্ৰৰোচনাত প্ৰৰোচিত হোৱাতো দূৰৈৰে কথা, শান্তি-শৃংখলা আৰু সংযম বজাই ৰাখি দেখুৱাই দিছে এখন গণতান্ত্ৰিক ৰাষ্ট্ৰৰ নাগৰিক হিচাপে কেনেদৰে দায়িত্ব পালন কৰিব লাগে।
আমি আমাৰ বিধি-ব্যৱস্থাক সন্মান জনাব লাগিব। তাৰ জৰিয়তে কাম-কাজ কৰিব লাগিব। বিভেদকামী শক্তিক প্ৰতিহত কৰাৰ বাবেও অসমৰ সৰ্বস্তৰৰ লোক সজাগ থাকিব লাগিব। আমাক এখন শুদ্ধ এন আৰ চি লাগে। শুদ্ধ এন আৰ চিৰ কামত বাধা দিয়া কোনো শক্তিকে প্ৰশ্ৰয় দিব নোৱাৰি। অপশক্তিক ওফৰাবই লাগিব।
এখন শুদ্ধ এন আৰ চিৰ জৰিয়তে বিদেশী চিনাক্তকৰণ আৰু বহিষ্কৰণৰ প্ৰক্ৰিয়া আৰম্ভ হ’ব। তাক বাধা দিয়াসকল কোন হ’ব? নিশ্চিতকৈ সেয়া অসমবিৰোধী চক্ৰ।
এন আৰ চিৰ সম্পূৰ্ণ খচৰা প্ৰকাশৰ সংবাদমেল আৰম্ভ হৈছিল আমাৰ জাতীয় সংগীত ‘অ’ মোৰ আপোনাৰ দেশে’ৰে। আমি আশাবাদী জাতীয় সংগীতৰ মৰ্মকথা সুৰক্ষিত হ’ব এন আৰ চিৰ জৰিয়তে। এতিয়া অপেক্ষা মাথো চূড়ান্ত এন আৰ চিলৈ।
(লেখক গুৱাহাটীস্থিত এজন জ্যেষ্ঠ সাংবাদিক। ই মে‘ইল: [email protected])
