অৰুণাচল প্ৰদেশত থকা অবৈধ বাংলাদেশী অনুপ্ৰৱেশকাৰীৰ বিৰুদ্ধে সদৌ অৰুণাচল প্ৰদেশ ছাত্ৰ সন্থা (আপছু)এ আৰম্ভ কৰা ‘চাফাই অভিযান’ (Operation Clean Drive)ৰ প্ৰতি উত্তৰ-পূব ছাত্ৰ সন্থা (নেছ’)ই পূৰ্ণ সমৰ্থন আগবঢ়াইছে।
বৃহস্পতিবাৰে ইটানগৰত ছাত্ৰ সংগঠন দুটাৰ মাজত এই সন্দৰ্ভত অনুষ্ঠিত এক বৈঠকত নেছ’ই এক কথা ঘোষণা কৰে।
বৈঠকত অংশগ্ৰহণ কৰা নেছ’ৰ ৰাজ্যিক গোটৰ কাৰ্যবাহী সম্পাদক মাৰ্গে ৰিবা আৰু সমন্বয়ক প্ৰিতম সোনমে উত্তৰ-পূবৰ সকলো ৰাজ্যতে এন আৰ চিৰ বাবে দাবী তোলে।
আনহাতে আপছুৰ সাধাৰণ সম্পাদক টবম ডাইয়ে কয় যে অসমৰ ক্ষেত্ৰত গ্ৰহণ কৰাৰ দৰে অৰুণাচল প্ৰদেশত এন আৰ চিৰ ভিত্তিবৰ্ষ ১৯৭১ চন হিচাপে সর্বসন্মতভাবৱে গ্ৰহণ কৰিব নোৱাৰি কিয়নো ইয়াত ১৯৭১ চনৰ বহু আগতেই বাংলাদেশৰ পৰা অনুপ্ৰৱেশকাৰীয়ে প্ৰৱেশ কৰিছিল।
ৰাজ্যখনৰ সকলো খিলঞ্জীয়া লোককে আপছুৰ উক্ত অভিযানৰ প্ৰতি সমৰ্থন আগবঢ়াবলৈ আহ্বান জনাই নেছ’ৰ সদস্য দুজনে লগতে কয় যে এই ক্ষেত্ৰত যাতে কোনো প্ৰকৃত নাগৰিকে হাৰাশাস্তিৰ সন্মুখীন হ’ব লগীয়া নহয় তাৰ প্ৰতি নজৰ ৰখা উচিত।
