বিতৰ্কই যেন লগ এৰি নিদিয়া হৈছে কেন্দ্ৰীয় ৰে’ল ৰাজ্যমন্ত্ৰী ৰাজেন গোঁহাইক। যৌন নিৰ্যাতনৰ গোচৰৰ প্ৰতিক্ৰিয়া মাৰ নৌ-যাওঁতেই এইবাৰ আন এক সমালোচনাৰ সন্মুখীন হৈ পৰিছে ৰাজেন গোঁহাই। কাৰণ কেন্দ্ৰীয় ৰে’ল ৰাজ্যমন্ত্ৰীগৰাকীৰ গৃহ জিলাতেই ৰে’ল ষ্টেশ্যনৰ প্লেটফৰ্মৰ এপ্ৰ’চ নিৰ্মাণৰ নামত সংঘটিত হৈছে ব্যাপক অনিয়ম। নিম্নমানৰ সামগ্ৰী ব্যৱহাৰ কৰি ঠিকাদাৰে চলাই লুণ্ঠন চলোৱাৰ অভিযোগ উত্থাপিত হৈছে।
নগাঁৱৰ বেবেজীয়া ৰে’ল ষ্টেশ্যনৰ প্লেটফৰ্মৰ এপ্ৰ’চ নিৰ্মাণৰ নামত ভয়ংকৰ দুৰ্নীতি সংঘটিত হোৱাৰ অভিযোগ উত্থাপন কৰিছে স্থানীয় ৰাইজে। উল্লেখ্য যে, এসপ্তাহ পূৰ্বে নিৰ্মাণ সম্পূৰ্ণ হোৱা এপ্ৰ’চ ৰোডৰ এতিয়া পুতৌজনক অৱস্থা। নিৰ্মাণৰ এসপ্তাহতে জহি-খহি গৈছে এপ্ৰ’চ ৰোডটো।
স্থানীয় ৰাইজৰ অভিযোগ অনুসৰি কেন্দ্ৰীয় ৰে’ল ৰাজ্যমন্ত্ৰীৰ আশিসধন্য ফিৰোজ গুপ্তা নামৰ ঠিকাদাৰজনে অতি নিম্নমানৰ সামগ্ৰী ব্যৱহাৰ কৰি নিৰ্মাণ কৰে এই পথটো। যাৰ ফলত এসপ্তাহতে নৱনিৰ্মিত পথটোৰ অৱস্থা এনে হৈছে বুলি স্থানীয় ৰাইজে মত পোষণ কৰাৰ উপৰি পথটোৰ পুনৰ নিৰ্মাণৰ লগতে এই অনিয়মৰ সন্দৰ্ভত এক উচ্চস্তৰীয় তদন্তৰ দাবী জনাইছে।
আনহাতে, ৰাজেন গোঁহাইৰ আশিসধন্য এইগৰাকী ঠিকাদাৰেই শেনচোৱা ৰে’ল জংশ্যনৰ এপ্ৰ’চ নিৰ্মাণৰ নামতো ব্যাপক অনিয়ম সংঘটিত কৰাৰ অভিযোগ উত্থাপিত হৈছে ।
