বৃহৎ নদীবান্ধৰ বিৰোধিতা কৰি তথা বানপানী, গৰাখহনীয়া সমস্যাক ৰাষ্ট্ৰীয় সমস্যা ঘোষণা কৰাৰ দাবীত কৃষক মুক্তি সংগ্ৰাম সমিতিয়ে আজি ৰাজ্যৰ সমগ্ৰ জিলা সদৰসমূহত প্ৰতিবাদ সাৱ্যস্ত কৰে।
মহানগৰীৰ মেঘদূত ভৱনৰ সন্মুখত কৃষক মুক্তি সংগ্ৰাম সমিতিৰ মহানগৰ জিলা সমিতিয়ে প্ৰতিবাদী কাৰ্যসূচী ৰূপায়ন কৰে। পুৱা ১১ বজাৰ পৰা আৰম্ভ হোৱা এই অৱস্থান ধৰ্মঘট কাৰ্যসূচী দিনৰ ১ বজা পৰ্য্যন্ত চলি থাকিব।
প্ৰতিবাদকাৰীসকলে অভিযোগ কৰে যে বিজেপি দলে নিৰ্বাচনৰ পূৰ্বে বৃহৎ নদীবান্ধৰ বিৰোধিতা কৰিছিল যদিও এতিয়া তেওঁলোকে বৃহৎ নদীবান্ধৰ পক্ষে সম্পূৰ্ণ স্থিতি গ্ৰহণ কৰিছে।
প্ৰতিবাদত অংশগ্ৰহণ কৰা কৃষক মুক্তি সংগ্ৰাম সমিতিৰ যুটীয়া সাধাৰণ সম্পাদক মুকুট ডেকাই নৰ্থ ইষ্ট নাওক জনায় যে অৰুণাচল প্ৰদেশ, নাগালেণ্ড আদিত প্ৰস্তাৱিত আৰু নিৰ্মীয়মান সকলো বৃহৎ নদীবান্ধ প্ৰকল্পৰ কাম বন্ধ ৰাখিব লাগে।
তদুপৰি, ৰঙানদী জলবিদ্যুৎ প্ৰকল্প, কুৰিশ্ব’ প্ৰকল্প, দৈয়াং জলবিদ্যুৎ প্ৰকল্পকে ধৰি অন্য বহুকেইটা প্ৰকল্পই পানী এৰি দিয়াৰ ফলত ৰাজ্যখনৰ বিভিন্ন ঠাইত প্ৰলয়ংকাৰী বানৰ সৃষ্টি হৈছে বুলিও তেওঁ কয়।
আনহাতে, প্ৰতিবাদকাৰী সকলে অসমৰ বানপানী সমস্যাক ৰাষ্ট্ৰীয় সমস্যা হিচাপে ঘোষণা কৰাৰ বাবেও প্ৰবল দাবী জনায়। প্ৰতিবাদকাৰীসকলে অৱস্থান ধৰ্মঘটৰ অন্ত পৰাৰ পিছত জিলা উপায়ুক্তৰ জৰিয়তে মুখ্য মন্ত্ৰীলৈ স্মাৰক পত্ৰ প্ৰেৰণ কৰিব।
আজিৰ উক্ত অৱস্থান ধৰ্মঘট কাৰ্য্যসূচীত মহানগৰ জিলা সমিতিৰ সভাপতি দেবেন শৰ্মা আৰু সাধাৰণ সম্পাদক পৃথিবী দলেও উপস্থিত থাকে।
