‘মধ্যবিত্ত শ্ৰেণীৰ গ্ৰাহক ৰাইজৰ সুবিধাৰ্থে ডাক সেৱা বিভাগে শনিবাৰৰে পৰা আৰম্ভ কৰিব ইণ্ডিয়া পষ্ট পেমেণ্ট বেংক নামৰ এক নতুন বেংকিং ব্যৱস্থা। জিৰ’ বেলেঞ্চৰে গ্ৰাহকে একাউণ্ট খোলাৰ সুবিধা লাভ কৰিব পৰা এই বেংক ব্যৱস্থাৰ জৰিয়তে প্ৰতিজন গ্ৰাহকে প্ৰতিদিনে এক লাখ টকা পৰ্যন্ত ডিজিটেল লেনদেন কৰিব পাৰিব।’ আজি নগাঁও প্ৰধান ডাকঘৰত আয়োজিত এক সংবাদমেলত এই কথা সদৰী কৰে ডাক বিভাগৰ ডিব্ৰুগড় মণ্ডলৰ প্ৰবন্ধক সোম কামেই।
লগতে তেওঁ সংবাদমেলত আৰু কয় যে ডাক বিভাগে সৰ্বসাধাৰণ শ্ৰেণীৰ ৰাইজক বেংক সেৱাৰ জৰিয়তে নিয়মীয়া লেনদেন উপলব্ধ কৰোৱাৰ বাবে অসমত ২৬ টা এনে বেংক শাখা কাইলৈ মুকলি কৰা হ’ব।
তাৰোপৰি নগাঁৱত কাইলৈ কেন্দ্ৰীয় ৰে’ল ৰাজ্য মন্ত্ৰী ৰাজেন গোহাঁইয়ে বেংক শাখাটো মুকলি কৰিব বুলিও সোম কামে জানিবলৈ দিয়ে। ইফালে অহা ডিচেম্বৰ মাহৰ ভিতৰত অসমত ৪ হেজাৰ এনে বেংক শাখা মুকলি কৰাৰ লক্ষ্য স্থিৰ কৰা হৈছে বুলি প্ৰবন্ধকগৰাকীয়ে জানিবলৈ দিয়ে।
উল্লেখযোগ্য যে এই বেংক ব্যৱস্থাৰ জৰিয়তে গ্ৰাহকে ক্ষুদ্ৰ বাণিজ্যৰ সুবিধা লাভ কৰাৰ লগতে ছাত্ৰ-ছাত্ৰী, কৃষক, জ্যেষ্ঠ নাগৰিক, গৃহীনি আদিয়েও বিশেষ সুবিধা লাভ কৰিব।
