উত্তৰ-পূবৰ প্ৰথমগৰাকী লোক হিচাপে দেশৰ মুখ্য বিচাৰপতি পদত অধিস্থিত হোৱাটো নিশ্চিত হ’ল ন্যায়াধীশ ৰঞ্জন গগৈৰ। অহা ৩ অক্টোবৰত ভাৰতৰ উচ্চতম ন্যায়ালয়ৰ পৰৱৰ্তী মুখ্য ন্যায়াধীশৰূপে শপত গ্ৰহণ কৰিব গগৈয়ে।
অহা ২ অক্টোবৰত অৱসৰ ল’ব লগা বৰ্তমানৰ মুখ্য ন্যায়াধীশ দীপক মিশ্ৰই পৰৱৰ্তী মুখ্য ন্যায়াধীশ হিচাপে গগৈৰ নাম অনুমোদন জনাইছে।
ন্যায়াধীশ মিশ্ৰই দেশৰ আইন মন্ত্ৰ্যালয়লৈ ইতিমধ্যে তেওঁৰ পৰামৰ্শ পত্ৰ প্ৰেৰণ কৰিছে। প্ৰট’কল অনুসৰি উত্তৰসূৰী সম্পৰ্কে পৰামৰ্শ দিয়াৰ বাবে আইন মন্ত্ৰ্যালয়ে ন্যায়াধীশ মিশ্ৰক অনুৰোধ জনাইছিল।
২০১৯ চনৰ ১৭ নবেম্বৰত অৱসৰ ল’ব লগা গগৈ মুখ্য ন্যায়াধীশৰ পদত ১ বছৰ, ১ মাহ আৰু ১৪ দিন থাকিব।
সৰ্বোচ্চ ন্যায়ালয়ৰ বিভিন্ন পীঠসমূহক গোচৰ আবণ্টনৰ প্ৰক্ৰিয়াৰ লগতে বিভিন্ন বিষয়ত মুখ্য ন্যায়াধীশ মিশ্ৰক সমালোচনা কৰি এই বছৰৰ জানুৱাৰিত নতুন দিল্লীত ন্যায়াধীশ গগৈৰ লগতে আন তিনিগৰাকী জ্যেষ্ঠ ন্যায়াধীশে আয়োজন কৰা অভূতপূৰ্ব সংবাদ মেলখনৰ পিছত গগৈক মুখ্য ন্যায়াধীশৰূপে নিযুক্তিৰ ক্ষেত্ৰত আশংকা আহি পৰিছিল।
ভাৰতৰ ন্যায়িক ইতিহাসত উচ্চতম ন্যায়ালয়ৰ ন্যায়াধীশে সংবাদ মেল দিয়াৰ দৰে ঘটনা কেতিয়াও ঘটা নাছিল।
ন্যায়াধীশ গগৈৰ দেউতাক অসমৰ প্ৰাক্তন মুখ্য মন্ত্ৰী কেশৱ চন্দ্ৰ গগৈ।
ডিব্ৰুগড়ত ১৯৫৪ চনৰ ১৮ নবেম্বৰত জন্ম লোৱা গগৈয়ে ১৯৭৮ চনত গুৱাহাটী উচ্চ ন্যায়ালয়ত ওকালতি আৰম্ভ কৰিছিল।
গুৱাহাটী উচ্চ ন্যায়ালয়ৰ স্থায়ী ন্যায়াধীশৰূপে ২০০১ চনৰ ২৮ ফেব্ৰুৱাৰিত নিযুক্তি পোৱা গগৈক ২০১০ চনৰ ৯ ছেপ্তেম্বৰত পঞ্জাৱ আৰু হাৰিয়ানাৰ ন্যায়াধীশ হিচাপে বদলি কৰা হৈছিল।
পিছলৈ পঞ্জাৱ আৰু হাৰিয়ানা উচ্চ ন্যায়ালয়ৰ ন্যায়াধীশ পদত অধীস্থিত হোৱা গগৈ ২০১২ চনৰ ২৩ এপ্ৰিলত উচ্চতম ন্যায়ালয়ৰ ন্যায়াধীশৰূপে নিযুক্ত হৈছিল।
