চলিত আই লীগত কাইলৈ শ্বিলঙৰ লাজং এফ চি নতুন দিল্লীৰ আম্বেদকাৰ ষ্টেডিয়ামত মুখামুখি হ’ব ইণ্ডিয়ান এৰ’জৰ। ইতিপূৰ্বে দহ পইণ্টেৰে তালিকাৰ চতুৰ্থ স্থানত থকা লাজঙে কাইলৈ সম্পূৰ্ণ পইণ্ট অৰ্জন কৰাৰ চেষ্টা কৰিব। আনহাতে মাত্ৰ তিনি পইণ্টেৰে তালিকাৰ নৱম স্থানত থকা ইণ্ডিয়ান এৰ’জৰো চেষ্টা হ’ব নিজৰ পইণ্ট বৃদ্ধি কৰা। অৱশ্যে উত্তৰ-পূবৰ শক্তিশালী দলটোৰ পৰা জয় কাঢ়ি অনা তেওঁলোকৰ বাবে সহজ কথা নহ’ব। কাৰণ লাজঙে ইতিপূৰ্বে প্ৰতিযোগিতাখনত নিজৰ সামৰ্থ্যৰ প্ৰমাণ দি ছিজনৰ প্ৰথম দুয়োখন মেচতে জয় সাব্যস্ত কৰিছিল। পিছৰ দুখনমানত অৱশ্যে ক্লাবটোৱে সেই ধাৰা অব্যাহত ৰাখিব পৰা নাই। তেওঁলোক ইষ্ট বেংগলৰ দ্বাৰা ১-৫ ব্যৱধানত ধৰাশায়ী হৈছিল। প্ৰশিক্ষক ববী নংবেটৰ অধীনত থকা দলটোৱে পিছত অৱশ্যে মোহন বাগানৰ দৰে দলক এৱেই মেচত ১-০ ত হৰুৱাই পুনৰ আত্মবিশ্বাস ঘূৰাই আনি থৈছে। তেওঁলোকে মুঠ ছখন খেলৰ পৰা ১০ পইণ্ট গোটাইছে।
এটা সূত্ৰই জনোৱা মতে কাইলৈৰ খেলখনত লাজং দলটোৰ অধিনায়ক ছেমুৱেল লালমুৱানপুইয়াই খেলাৰ সম্ভাৱনা নাই।
‘আমি কাইলৈ ইণ্ডিয়ান এৰ’জৰ বিৰুদ্ধে জয়ৰ বাবে আমাৰ সৰ্বশক্তিৰে চেষ্টা কৰিম।’ ইণ্ডিয়ান এৰ’জক এটা ভাল দল বুলি প্ৰশংসা কৰি লাজঙৰ প্ৰশিক্ষকে এইদৰে কয়।
