২০১৮ বৰ্ষৰ অৰ্জুন বঁটাৰ বাবে নিৰ্বাচিত হৈছে অসমৰ হিমা দাস। দেশৰ নৱতম ট্ৰেকৰাণী তথা ক্ৰীড়াক্ষেত্ৰত এই বছৰটোতে দেশৰ হৈ কেইবাটাও বিৰল সন্মান কঢ়িয়াই অনা ২০ বছৰীয়া হিমাকে ধৰি জেভলিন থ্ৰ’ৱাৰ নীৰজ চোপ্ৰাসহ ২০গৰাকী ক্ৰীড়াবিদৰ নাম এই বঁটাৰ বাবে অনুমোদন জনোৱা হৈছে।
উল্লেখ্য যে সংশ্লিষ্ট খেলবোৰৰ ৰাষ্ট্ৰীয় সংস্থাই প্ৰেৰণ কৰা অনুমোদনত কেন্দ্ৰীয় ক্ৰীড়া মন্ত্ৰীয়ে ‘মোহৰ’ লগোৱাৰ পাছতে এতিয়া মনোনীত খেলুৱৈসকলে অহা ২৫ ছেপ্টেম্বৰত ৰাষ্ট্ৰপতি ভৱনত হ’বলগীয়া অনুষ্ঠানত ৰাষ্ট্ৰপতিৰ পৰা বঁটাসমূহ গ্ৰহণ কৰিব।
দেশৰ ক্ৰীড়াবিদৰ বাবে আগ বঢ়োৱা এই গৌৰৱ মুকুট নিশ্চিত হোৱাৰ খবৰে স্বাভাৱিকতে হিমাৰ লগতে আপ্লুত কৰি তুলিছে সমগ্ৰ ৰাজ্যবাসীক।
ইফালে এইবাৰ ৰাজীৱ গান্ধী খেল ৰত্ন বঁটাৰ বাবে ভাৰতীয় ক্ৰিকেট দলৰ অধিনায়ক বিৰাট কোহলী আৰু বিশ্ব চেম্পিয়ন মণিপুৰী ভাৰোত্তোলক মীৰাবাই চানুৰ নাম যৌথভাৱে অনুমোদন জনোৱা হৈছে।
উল্লেখ্য যে, জাকাৰ্টাৰ এছিয়ান গেইমছ থকাৰ পৰিপ্ৰেক্ষিতত সচৰাচৰ ১৯ আগষ্টৰ ৰাষ্ট্ৰীয় ক্ৰীড়া দিৱসৰ দিনা অনুষ্ঠিত হৈ অহা বঁটা প্ৰদান অনুষ্ঠানটো এইবাৰ ২৫ ছেপ্টেম্বৰলৈ পিছুৱাই দিয়া হৈছে। খেল ৰত্ন বঁটাত নগদ চাৰে সাত লাখ আৰু অৰ্জুন বঁটা বিজয়ী খেলুৱৈয়ে লাভ কৰিব নগদ পাঁচ লাখ।
আনহাতে অসমৰ হিমা দাস আৰু নীৰজ চোপ্ৰাৰ উপৰি অৰ্জুন বঁটাৰ বাবে নিৰ্বাচিত হোৱা খেলুৱৈসকল হৈছে জিনছন জনছন (এথলেটিকছ), এন ছিক্কী ৰেড্ডী (বেডমিণ্টন), সুতীষা কুমাৰ (বক্সিং), স্মৃতি মানধানা (ক্ৰিকেট), শুভাংকৰ শৰ্মা, মনপ্ৰীত সিং (হকী), সবিতা পুনিয়া (মহিলা হকী), ৰবি ৰাথোড় (প’ল’), ৰাহি ছাৰনোবাট, অংকুৰ মিট্টল, শ্ৰেয়াষী সিং (তিনিও শ্বুটিঙৰ), মণিকা বাট্ৰা, জি ছাথিয়ান (দুয়ো টেবুল টেনিছৰ), ৰোহন বোপান্না (টেনিছ), সুমিত (মল্লযুঁজ), পূজা কাদিয়ান (উশ্বু), অংকুৰ ধামা (পেৰা এথলেটিকছ), আৰু মনোজ সৰকাৰ (পেৰা বেডমিণ্টন)।