সঞ্জীৱনী হেল্থ কেয়াৰৰ উদ্যোগত আৰু গ্লোবেল পেইন আৰু পল্লিয়েটিভ ক্লিনিকৰ সহযোগত হোজাইৰ মাটিখোলা কালি মন্দিৰত অলপতে এটা বিনামূলীয়া স্বাস্থ্য শিবিৰ অনুষ্ঠিত হৈ যায়।
ডাঃ এন এল ভগতৰ তত্ত্বাৱধানত উক্ত বিনামূলীয়া স্বাস্থ্য শিবিৰটো অনুষ্ঠিত হৈ যায়। স্বাস্থ্য শিবিৰটোত ডাঃ ভগতক সহায় কৰে হেমচন্দ্ৰ প্ৰসাদ, শান্তি সিং, সঞ্জীৱ দাস আৰু আকাষ ভূঞাই।
মাটিখোলাত অনুষ্ঠিত হোৱা বিনামূলীয়া স্বাস্থ্য শিবিৰটোত প্ৰায় ২০০ৰো অধিক ৰোগীয়ে বিনামূলীয়াকৈ স্বাস্থ্য পৰীক্ষা কৰোৱাৰ লগতে ৰোগীসকলৰ মাজত ঔষধো বিতৰণ কৰে বুলি জানিব পৰা গৈছে।
সঞ্জীৱনী হেল্থ কেয়াৰৰ স্বত্ত্বাধিকাৰী মেট্ৰ’লিন সিংঘাই স্বাস্থ্য শিবিৰটো সম্পৰ্কত নৰ্থ-ইষ্ট নাওক জানিবলৈ দি কয়, ‘এই শিবিৰটো অনুষ্ঠিত কৰাৰ মূল উদ্দেশ্য হৈছে বিভিন্ন বেমাৰৰ বিষয়ে সাধাৰণ ৰাইজক সজাগ কৰোৱা আৰু ইয়াক কেনেদৰে নিৰ্মূল কৰিব পাৰি সেই বিষয়ে জনোৱা’।
তেওঁ লগতে বিগত দুমাহৰ পৰা প্ৰত্যেক দেওবাৰে বিভিন্ন ঠাইত এনেধৰণৰ বিনামূলীয়া স্বাস্থ্য শিবিৰ অনুষ্ঠিত কৰি আহিছে বুলি জনায়। সঞ্জীৱনী হেল্থ কেয়াৰৰ উদ্যোগত যোৱা দুটা মাহত চিকাৰীগেট, নাওভাঙা কালি মন্দিৰ, কাৰ্বি আংলং জিলাৰ ডকমকা বজাৰ, মুৰাঝাৰ এল পি স্কুল আৰু মাটিখোৱা কালি মন্দিৰত এইদৰে চিকিৎসা শিবিৰ অনুষ্ঠিত কৰিছে।
‘বিনামূলীয়া স্বাস্থ্য শিবিৰৰ পৰা কমেও ৬০০ ৰোগী উপকৃত হৈছে। সমাজৰ বাবে এনেধৰণৰ স্বাস্থ্য শিবিৰ অনুষ্ঠিত কৰাটো আমাৰ বাবে এতিয়া মিশ্যনত পৰিণত হৈছে আৰু অনাগত দিনত আৰু অধিক ক্ষীপ্ৰতাৰে আমি স্বাস্থ্য শিবিৰ অনুষ্ঠিত কৰাৰ চেষ্টা কৰিম’। এইদৰে কয় সঞ্জীৱনী হেল্থ কেয়াৰৰ স্বত্ত্বাধিকাৰী মেট্ৰ’লিন সিংঘাই।
