৬৪ সংখ্যক বন্যপ্ৰাণী সপ্তাহৰ তৃতীয় দিনটো বৃহস্পতিবাৰে কাজিৰঙাৰ কহঁৰাত উদযাপন কৰে কাজিৰঙা ৰাষ্ট্ৰীয় উদ্যান কৰ্তৃপক্ষই ৷ এই উপলক্ষে পুৱা কহঁৰাৰ মিহিমুখত হস্তী দিৱসৰ এক বিশেষ কাৰ্যসূচী পালন কৰা হয় ৷
এই অনুষ্ঠানত ছাত্ৰ ছাত্ৰীৰ মাজত হাতীৰ বিষয়ে জ্ঞান প্ৰদান কৰিবৰ বাবে বিভাগীয় হাতীৰ উপস্থিতিত ছাত্ৰ ছাত্ৰীক হাতীৰ স্বভাৱ, অংগ-প্ৰত্যংগ,হাতীৰ শৰীৰৰ বিভিন্ন অংগৰ লগতে হাতীৰ চিনাক্তকৰণ আদিৰ বিষয়ে ছাত্ৰ ছাত্ৰীক অৱগত কৰা হয় ৷
অনুষ্ঠানত ডি এফ অ’ ৰোহিনী বল্লভ শইকীয়া, সহকাৰী বন সংৰক্ষক ভাস্কৰ জ্যোতি বুঢ়াগোঁহাই, কৰবেট ফাউণ্ডেশ্যনৰ ডা৹ নবীন পাণ্ডেৰ উপৰিও সমল ব্যক্তি হিচাবে কাজিৰঙা ৰাষ্ট্ৰীয় উদ্যানৰ গৱেষণা বিষয়া ৰবীন্দ্ৰ শৰ্মা আৰু বন বিভাগৰ পশু চিকিৎসক ডা৹ দেৱব্ৰত ফুকন উপস্থিত থাকে ৷
পৰৱৰ্তী সময়ত আৰণ্যক আৰু কৰবেট ফাউণ্ডেশ্যনৰ উদ্যোগত বন বিভাগৰ সহযোগত কহঁৰাৰ শতবৰ্ষ সমাৰোহ সভাগৃহত ছাত্ৰ ছাত্ৰীৰ মাজত চিত্ৰাংকন আৰু কুইজ প্ৰতিযোগিতা অনুষ্ঠিত কৰা হয় ৷ সহকাৰী বন সংৰক্ষক ভাস্কৰ জ্যোতি বুঢ়াগোঁহায়ে উদ্বোধন কৰা কুইজ প্ৰতিযোগিতা পৰিচালনা কৰে অ’নাৰেৰী ৱাইল্ড লাইফ ৱাৰ্ডেন উত্তম শইকীয়া, আৰণ্যকৰ প্ৰকল্প বিষয়া আৰিফ হুছেইন, কৰবেট ফাউণ্ডেশ্যনৰ দিব্যজ্যোতি শইকীয়া আৰু যদুমনি গোস্বামীয়ে ৷ প্ৰতিযোগিতাত কাজিৰঙাৰ কাষৰীয় বিদ্যালয়ৰ ছাত্ৰ ছাত্ৰীয়ে অংশগ্ৰহণ কৰে ৷
