নাগালেণ্ড ডিমাপুৰৰ নামগালং অঞ্চলত শুকুৰবাৰে এক বিধ্বংশী অগ্নিকাণ্ড সংঘটিত হোৱাৰ ফলত বাঁহেৰে নিৰ্মিত ১০০ৰো অধিক বাসগৃহ ধংস হয়। অগ্নিকাণ্ড সংঘটিত হোৱাত এজন লোকে ওচৰৰে বাসিন্দাক বচাবলৈ যাওঁতে সামান্য ভাবে অগ্নিদগ্ধ হয় যদিও বিশেষ ভাবে কোনো লোকৰ ক্ষতি হোৱা নাই বুলি প্ৰশাসনে জানিবলৈ দিছে।
ঘটনা সংঘটিত হোৱা অঞ্চলৰ স্থানীয় বাসিন্দাই জনোৱা অনুসৰি দুপৰীয়া ২ মান বজাত ওচৰৰে এজন বাসিন্দাৰ ঘৰৰ কেৰোচিন ষ্টোভৰ পৰা জুইৰ সূত্ৰপাত হয় আৰু নিমিষতে অঞ্চলযুৰি জুঁইৰ লেলিহান শিখাই আৱৰি ধৰে। অগ্নিকাণ্ড সূত্ৰ পাত হোৱাৰ পিছত অঞ্চলটোৰ বহু কেইটা চিলিণ্ডাৰো বিস্ফোৰণ হয় বুলি জনায়। অগ্নিনিৰ্বাপক বাহিনীৰ পাঁচখনকৈ বাহনেৰে জুই নিৰ্বাপনৰ চেষ্টা চলায় যদিও ঘৰ সম্পত্তি ৰক্ষা কৰাত ব্যৰ্থ হয়। বৰ্তমান ডিমাপুৰ অগ্নি নিৰ্বাপক বাহিনীৰ বিষয়া এ ৱাটিৰ তত্বাৱধানত ঘটনা সন্দৰ্ভত তদন্ত অব্যাহত ৰখা বুলি গম পোৱা গৈছে।
অগ্নিকাণ্ড সংঘটিত হোৱাৰ পিছত ডিমাপুৰৰ অতিৰিক্ত আয়ুক্ত তথা জিলা দুৰ্যোগ প্ৰশমনৰ ন’ডেল বিষয়া ছাৰা ছে জমিৰে ঘটনাস্থলী পৰিদৰ্শন কৰে। জুঁইত জাহ যোৱা পৰিয়াললৈ ১০০০০ টকাকৈ এককালিন সাহাৰ্যও আগবঢ়াই উপায়ুক্তগৰাকীয়ে। এই পৰ্যন্ত অহা খবৰ অনুসৰি ২৩৯টা পৰিয়ালৰ ভিতৰত ৮৩টা পৰিয়াল অগ্নিকাণ্ডৰ ফলত ক্ষতিগ্ৰস্থ হোৱা বুলি প্ৰশাসনে সংবাদ মাধ্যমক জানিবলৈ দিয়ে।
