পৰ্যটকৰ বাবে আজি পুৱা মুকলি কৰা হ’ল কাজিৰঙা ৰাষ্ট্ৰীয় উদ্যানৰ অগৰাতলি আৰু বুঢ়াপাহাৰ বনাঞ্চল। আজি পুৱা কাজিৰঙাৰ অগৰাতলি বনাঞ্চলৰ প্ৰৱেশ দ্বাৰত আয়োজিত এক বিশেষ অনুষ্ঠানত কাজিৰঙাৰ বন সংৰক্ষক জৰ্জেচ আহমেদে ফিটা কাটি আনুষ্ঠানিকভাৱে পৰ্যটকৰ বাবে জীপ চাফাৰী মুকলি কৰে।
অনুষ্ঠানত অগৰাতলি বনাঞ্চলৰ বনাঞ্চলিক বিষয়া ধৰণীধৰ বৰা, জীপ চাফাৰী সন্থাৰ সভাপতি অনিমেষ শইকীয়া আৰু গোলাঘাট জিলাৰ অনাৰেৰী ৱাইল্ড লাইফ ৱাৰ্ডেন উত্তম শইকীয়াৰ উপৰি ফ্ৰান্সৰ পৰ্যটক মাৰ্কচাণ্ড পাউলিন আৰু ইংলণ্ডৰ পৰ্যটক কেম্পিয়ন ডেভিডো উপস্থিত থাকে।
অনুষ্ঠানত অতিথি সকলক অগৰাতলি জীপ চাফাৰীৰ তৰফৰ পৰা ফুলাম গামোচাৰে আদৰণি জনোৱা হয়৷ অনুষ্ঠানত বন সংৰক্ষক জৰ্জেচ আহমেদ আৰু অনিমেষ শইকীয়াই অগৰাতলি বনাঞ্চলৰ জৈৱ বৈচিত্ৰতাৰ প্ৰতি পৰ্যটকক আকৰ্ষণ কৰিবৰ বাবে ট্যুৰ অপাৰেটৰ আৰু পৰ্যটন ক্ষেত্ৰৰ সৈতে জড়িত স্থানীয় যুৱকসকলক আগবাঢ়ি আহিবলৈ অনুৰোধ জনায়।
উল্লেখ্য যে অগৰাতলিৰ লগতে আজি বুঢাপাহাৰ বনাঞ্চলতো পৰ্যটকৰ বাবে মুকলি কৰাৰ হয় জীপ চাফাৰী৷ স্থানীয় পাৰিপাৰ্শ্বিক উন্নয়ন সমিতিৰ সভাপতি মানিক মুণ্ডাই আনুষ্ঠানিক বুঢ়াপাহাৰত জীপ চাফাৰী মুকলি কৰে।
বুঢ়াপাহাৰৰ উদ্বোধনী অনুষ্ঠানত ডি এফ অ ৰোহিনী বল্লভ শইকীয়াৰ লগতে বিশ্ব প্ৰকৃতি নিধিৰ জ্যেষ্ঠ সমন্বয়ক প্ৰনৱ জ্যোতি বৰা আৰু আৰণ্যকৰ আৰিফ হুছেইন উপস্থিত থাকে।
