প্ৰত্যাশিতভাৱেই দিচপুৰত প্ৰতিবাদ আৰম্ভ কৰিলে সংকল্প যাত্ৰাৰ প্ৰতিবাদকাৰীসকলে। গণেশগুৰিৰ গণেশ উদ্যানত পাঁচ শতাধিক প্ৰতিবাদকাৰী সমৱেত হৈ ইতিমধ্যে প্ৰতিবাদ আৰম্ভ কৰে। কৃষক নেতা অখিল গগৈৰ নেতৃত্বত আৰম্ভ হোৱা এই প্ৰতিবাদত ৭০ টা জাতীয় সংগঠনৰ প্ৰতিনিধিও উপস্থিত থাকে।
ইপিনে, সংকল্প যাত্ৰাৰ বিক্ষোভ কাৰ্যসূচী প্ৰতিৰোধ কৰিবলৈ মহানগৰ আৰক্ষীয়ে জনতা ভৱনৰ সন্মুখত শতাধিক নিৰাপত্তাৰক্ষী মোতায়েন কৰি নিছিদ্ৰ বেষ্টনি গঢ়ি তুলিছে। যিকোনো উপায়ে প্ৰতিবাদকাৰীক দিচপুৰত প্ৰৱেশত বাধা দিয়াৰ বাবে আৰক্ষী-প্ৰশাসনে গ্ৰহণ কৰিছে কটকটীয়া সুৰক্ষা ব্যৱস্থা।
উল্লেখযোগ্য যে ৭০ টা জাতীয় সংগঠনৰ সংকল্প যাত্ৰাৰ প্ৰতিবাদকাৰীসকলে দিচপুৰ ঘেৰাও কৰাৰ বাবে সিদ্ধান্ত গ্ৰহণ কৰিছিল। প্ৰতিবাদকাৰীসকলক এইক্ষেত্ৰত প্ৰতিৰোধ কৰাৰ উদ্দেশ্যে প্ৰশাসনে মহানগৰীত ১৪৪ ধাৰা জাৰি কৰিছে।
আনহাতে, আৰক্ষীয়ে সংকল্প যাত্ৰাৰ বাবে গুৱাহাটী অভিমুখী প্ৰতিবাদকাৰীসকলক ৰাজ্যৰ বিভিন্ন স্থানত আটক কৰাৰ কথা জানিব পৰা গৈছে।
বঙাইগাঁৱত সংকল্প যাত্ৰাৰ অৰ্দ্ধ শতাধিক প্ৰতিবাদকাৰীক আৰক্ষীয়ে আটক কৰিছে। বঙাইগাঁও জিলাৰ মাণিকপুৰত সংকল্প যাত্ৰালৈ অহাৰ পথত আমছুৰ সভাপতি ৰেজাউল কৰিম সৰকাৰকে ধৰি সংগঠনটোৰ প্ৰতিবাদকাৰী দলটোক আটক কৰে।
সেইদৰে, গোৱালপাৰাতো দিচপুৰৰ গণবিক্ষোভ কাৰ্যসূচীলৈ আহি থকা কৃষক মুক্তি সংগ্ৰাম সমিতিৰ ২০ জন সদস্যক আৰক্ষীয়ে আটক কৰিছে।
আনহাতে, জাগীৰোডত সংকল্প যাত্ৰাৰ প্ৰতিবাদকাৰী দলক আৰক্ষীয়ে বাধা প্ৰদান কৰা বুলি জানিব পৰা গৈছে। ৰাষ্ট্ৰীয় ঘাইপথত প্ৰতিবাদকাৰীক বাধা দিয়াৰ বাবে বেৰিকেড স্থাপন কৰা হৈছে। অৱশ্যে প্ৰতিবাদকাৰীৰ ওচৰত সেও মানি পাছত আৰক্ষীয়ে এখন এখনকৈ বাইক অহাৰ অনুমতি প্ৰদান কৰে।
উল্লেখযোগ্য যে নাগৰিকত্ব সংশোধনী বিধেয়ক বাতিলৰ দাবীৰে ১১ নৱেম্বৰৰ পৰা কৃষক মুক্তি সংগ্ৰাম সমিতি, অসম জাতীয়তাবাদী যুৱ ছাত্ৰ পৰিষদকে ধৰি ৭০ টা সংগঠনে ৰাজ্যখনৰ মুঠ ৪টা স্থানৰ পৰা আৰম্ভ কৰিছিল সংকল্প শিখা যাত্ৰা।
ৰাজ্যখনৰ শদিয়া, জোনাই, ডিফু আৰু ধুবুৰীৰ পৰা এক বৃহৎ বাইক ৰেলীৰে এই সংকল্প যাত্ৰাৰ শুভাৰম্ভ ঘটোৱা হৈছিল। তদুপৰি, এই সংকল্প যাত্ৰাৰ সময়ত বিভিন্ন স্থানত পথ সভা, বিক্ষোভ আদি অনুষ্ঠিত কৰি সংগঠন কেইটাই নাগৰিকত্ব বিধেয়কৰ বিৰুদ্ধে প্ৰতিবাদ সাৱ্যস্ত কৰি আহিছিল।
ইয়াৰ পাছতে শুকুৰবাৰে এই সংকল্প যাত্ৰাৰ প্ৰতিবাদী সমদল গুৱাহাটীত উপস্থিত হৈ দিচপুৰত এক বিশাল গণ বিক্ষোভৰ কাৰ্যসূচী ৰূপায়ন কৰি জাতিধ্বংসী বিধেয়কখন বাতিলৰ বাবে চৰকাৰক শেষ সকীয়নি প্ৰদান কৰাৰ সিদ্ধান্ত লৈছিল।
