গুণগত শিক্ষাৰ প্ৰসাৰক প্ৰধান লক্ষ্য হিচাপে লৈ ৰাজ্য চৰকাৰে শিক্ষাখণ্ডত পালন কৰি অহা গুণোৎসৱৰ তৃতীয় পৰ্যায়ৰ প্ৰথম দিনটোত সফল সামৰণি পৰিছে দৰং জিলাত। জিলাখনৰ দ্বিতীয় শ্ৰেণীৰ পৰা অষ্টম শ্ৰেণীলৈকে ১২৮০ খন প্ৰাথমিক পৰ্যায়ৰ বিদ্যালয়ৰ মুঠ ৯৯,৪৯০ গৰাকী ছাত্ৰ-ছাত্ৰীয়ে গুণোৎসৱত অংশগ্ৰহণ কৰিছে। বুধবাৰৰ পৰা আৰম্ভ হোৱা তৃতীয় পৰ্যায়ৰ গুণোৎসৱত জিলাখনৰ শিক্ষক-শিক্ষয়ত্ৰী, ছাত্ৰ-ছাত্ৰীৰ লগতে অভিভাৱক সকলেও যথেষ্ট সহাৰি জনোৱা পৰিলক্ষিত হৈছে। জিলাখনৰ মুঠ ৯৫শতাংশ ছাত্ৰ-ছাত্ৰী প্ৰথম দিনটোত বিদ্যালয়ত উপস্থিত আছিল। প্ৰথম দিনৰ কাৰ্যসূচীৰ অন্ত পৰাৰ পিছত দৰং জিলাৰ উপায়ুক্ত অশোক কুমাৰ বৰ্মনে সংবাদ মাধ্যমক সম্বোধন কৰি এই কথা জানিবলৈ দিয়ে। সংবাদমেল খনত উপায়ুক্তৰ উপৰি অতিৰিক্ত উপায়ুক্ত কল্পনা ডেকা আৰু বিদ্যালয় পৰিদৰ্শক নগেন বড়ো উপস্থিত আছিল।
চাৰিদিনীয়া গুণোৎসৱৰ কাৰ্যসূচীত ৫১৭ গৰাকী চৰকাৰী বিষয়া, কামৰুপ(ম), কামৰুপ(গ) আৰু ওদালগুৰি জিলাৰ বিভিন্ন শিক্ষকে বহিঃ পৰ্যবেক্ষক (এক্সটাৰ্নেল এভালেটৰ) ৰূপে বিদ্যালয় সমূহত উপস্থিত থাকি ছাত্ৰ- ছাত্ৰী সকলৰ বিদ্যায়তণিক মূল্যায়ণৰ লগতে শিক্ষানুষ্ঠান খনৰ জড়িত বিভিন্ন দিশ পৰ্যবেক্ষণ কৰিব। এই মন্তব্য কৰে জিলাখনৰ অতিৰিক্ত উপায়ুক্ত কল্পনা ডেকাই। শিক্ষক সকলৰ উপৰি ৰাজ্যখনৰ বিভিন্ন উচ্চ পদস্থ আই এ এছ, এ পি এছ, আই এফ এছ বিষয়া ৰাজেশ প্ৰসাদ, মদন চন্দ্ৰ ডেকা, বিনোদ কুমাৰ, এ এম সিং, হিৰদেশ মিশ্ৰা আৰু নিতুল গগৈৰ দৰে লোকেও এক্সটাৰ্নেল এভালেটৰ হিচাপে কাম কৰিব।
