মিজোৰামৰ ৰাজধানী আইজল ভাৰতৰ একমাত্ৰ হৰ্নমুক্ত নগৰ হিচাপে হ’বলৈ আগবাঢ়িছে। এই আইজলত চৰকাৰী নীতি অবিহনেই সম্পূৰ্ণভাৱে হৰ্ন মুক্ত চহৰ হিচাপে পৰিগণিত হ’ব।
তাৎপৰ্যপূৰ্ণভাৱে মিজোৰামৰ অধিবাসীসকলে নগৰখনক শব্দ প্ৰদূষণৰ পৰা মুক্ত কৰাৰ বাবে নিজাববীয়াকৈ এই পদক্ষেপ গ্ৰহণ কৰিছে।
যদিওবা আইজলৰ হৰ্ন মুক্ত নীতিৰ সপক্ষে ক্ষেত্ৰত কোনো চৰকাৰী বা বিধায়িনী সহায় আগবঢ়োৱা নহয়, তথাপি মিজোৰামৰ অধিবাসীসকলে তেওঁলোকৰ নিজৰ উপকাৰৰ বাবে এই নিয়ম পালন কৰিব।
ট্ৰেংকুইলিটী (Tranquillity) নামৰ এখন চুটি চলচ্চিত্ৰত দেখুওৱা হৈছে, কেনেদৰে আইজলৰ নাগৰিকসকলে তেওঁলোকৰ নিজৰ চহৰখন হৰ্নমুক্ত কৰিবলৈ কান্ধত কান্ধ মিলাই ওলাই আহিছে।
এই চুটি চলচ্চিত্ৰখন নাগালেণ্ড আৰু মিজোৰামৰ ৬জন যুৱকে আইজলৰ ৰাজপথত চিত্ৰগ্ৰহণ কৰিছে। কৰিঅ’গ্ৰাফাৰ, অভিনেতা আৰু পৰিচালক প্ৰভুদেৱাই এই চুটি চলচ্চিত্ৰখন চোৱাৰ পাছত আইজলৰ নাগৰিকে গ্ৰহণ কৰা হৰ্নমুক্ত নীতিৰ প্ৰশংসা কৰিছে।
উল্লেখ্য যে যানজঁটৰ সময়ত যিকোনো অপ্ৰীতিকৰ ঘটনাৰ পৰা হাত সাৰিবলৈ মিজোৰামৰ নাগৰিকসকলে হৰ্ন নবজাই ধৈৰ্যেৰে ৰৈ থকাৰ অভ্যাস গঢ়ি তুলিছে। শব্দ প্ৰদূষণ ৰোধ কৰাৰ ক্ষেত্ৰত আইজলে দেশৰ ভিতৰতে এটা প্ৰশংসনীয় উদাহৰণ ডাঙি ধৰিছে।
