২০১৮’ বৰ্ষৰ ‘কৃষ্ণকান্ত সন্দিকৈ ৰাষ্ট্ৰীয় বঁটা’ বিশিষ্ট শিক্ষাবিদ অধ্যাপক ড০ অমৰেশ দত্তলৈ আগবঢ়োৱা হৈছে। কৃষ্ণকান্ত সন্দিকৈ ৰাজ্যিক মুক্ত বিশ্ববিদ্যালয়ে বিগত ২০১৫ বৰ্ষৰ পৰা এই বঁটা প্ৰদান কৰি আহিছে। চলিত বৰ্ষত এই বঁটা লাভ কৰা অধ্যাপক ড০ অমৰেশ দত্ত বৰ্তমান ডিব্ৰুগড়ৰ নালিয়াপুলৰ বাসিন্দা।
বৃহস্পতিবাৰে বিশ্ববিদ্যালয় কৰ্তৃপক্ষই এইকথা ঘোষণা কৰি জানিব দিয়ে যে অহা ১১ ডিচেম্বৰত এক গাম্ভীৰ্যপূৰ্ণ অনুষ্ঠানত অধ্যাপক দত্তক এই বঁটা প্ৰদান কৰিব মুখ্য মন্ত্ৰী সৰ্বানন্দ সোণোৱালে। সম্প্ৰতি শতবৰ্ষ গৰকা অধ্যাপকগৰাকীৰ স্বাস্থ্যৰ প্ৰতি লক্ষ্য ৰাখি উক্ত বঁটা প্ৰদান অনুষ্ঠানটো ডিব্ৰুগড়তে আয়োজন কৰা হৈছে।
উক্ত বঁটাত থাকিব নগদ পাঁচ লাখ টকাৰ লগতে এখন প্ৰশস্তি পত্ৰ আৰু এটি স্মাৰক।
বিগত সময়ত বিশ্ববিদ্যালয়খনে প্ৰদান কৰি অহা ‘কৃষ্ণকান্ত সন্দিকৈ ৰাষ্ট্ৰীয় বঁটা’ লাভ কৰিছিল দেশৰ বিশিষ্ট মহাকাশ বিজ্ঞানী জিতেন্দ্ৰনাথ গোস্বামী, বিশিষ্ট শিক্ষাবিদ তথা দাৰ্শনিক মৃণাল মিৰি আৰু দেশৰ প্ৰাক্তন মুখ্য নিৰ্বাচনী আয়ুক্ত হৰিশংকৰ ব্ৰহ্মই।
চলিত বৰ্ষত এই বঁটা প্ৰদানৰ বাবে উপযুক্ত ব্যক্তিক নিৰ্বাচন কৰিবৰ বাবে বিশ্ববিদ্যালয়খনে বিশিষ্ট শিক্ষাবিদ অধ্যাপক টাবু টাইড, প্ৰাক্তন উপাচাৰ্য প্ৰদ্যুৎ কুমাৰ গোস্বামী, আমাৰ অসম কাকতৰ সম্পাদক প্ৰশান্ত ৰাজগুৰুক লৈ এখন তিনিজনীয়া বাছনি সমিতি গঠন কৰি দিছিল।
উল্লেখযোগ্য যে বিগত শতিকাৰ পঞ্চাশৰ দশকত মধ্য প্ৰদেশত শিক্ষকতাৰ পাতনি মেলা অধ্যাপক অমৰেশ দত্তই গুৱাহাটী বিশ্ববিদ্যালয়ৰ ইংৰাজী বিভাগৰ অধ্যাপক পদৰ পৰা আশীৰ দশকত অৱসৰ গ্ৰহণ কৰিছিল। গুৱাহাটী বিশ্ববিদ্যালয়ে ড০ দত্তক প্ৰফেছাৰ এমেৰিটাছ সন্মান প্ৰদান কৰিছিল।
অধ্যাপক দত্তৰ জীৱনৰ অন্যতম কৃতি হ’ল ‘শ্বেইক্সপিয়েৰ্ছ ট্ৰেজিক ভিজন এণ্ড আৰ্ট’ নামৰ আন্তৰ্জাতিক সমাদৰ লাভ কৰা গ্ৰন্থখন। তেওঁ এন্চাইক্ল’পেডিয়া অব্ ইণ্ডিয়ান লিটাৰেচাৰৰ তিনিটা খণ্ডৰ মুখ্য সম্পাদক হিচাপেও বিশেষ কৃতিত্ব অৰ্জন কৰিছিল।
