এক গোপন সূত্ৰৰ আধাৰত বোকাখাত আৰক্ষীৰ যান-বাহন শাখাৰ এটা দলে ১৮ ডিচেম্বৰ অৰ্থাৎ মঙলবাৰে নিশা অভিযান চলাই দীৰ্ঘদিন ধৰি সন্ত্ৰাসৰ সৃষ্টি কৰি অহা এটা বাইক চুৰি চক্ৰ উৎখাত কৰিবলৈ সক্ষম হয়।
সম্পূৰ্ণ নিৰ্ভৰযোগ্য তথ্যৰ আধাৰত অভিযানকাৰী দলটোৱে বোকাখাতৰ আমটেঙা গাঁৱত অভিযান চলাই পৰেশ কুটুম নামৰ এজন যুৱকক আটক কৰাৰ লগতে এখন চুৰি কৰি অনা পালচাৰ বাইকো উদ্ধাৰ কৰে।
ইফালে ধৃত পৰেশ কুটুমৰ স্বীকাৰোক্তিৰ আধাৰত আৰক্ষীয়ে নিশাই বোকাখাতৰ অন্য দুটা স্থানৰ পৰা ৰাজা আলী আৰু ওমৰ আলী নামৰ দুজন যুৱককো কৰায়ত্ব কৰে। অভিযানকাৰী দলে উদ্ধাৰ কৰা পালচাৰ বাইকখন তেজপুৰৰ বৰপথাৰ অঞ্চলৰ পৰা অলপতে চুৰি কৰি অনা বুলিও ধৃত যুৱক তিনিজনে জেৰাত প্ৰকাশ কৰে।
ফটো : নৰ্থ-ইষ্ট নাও
উল্লেখযোগ্য যে তেজপুৰৰ পৰা চুৰি কৰি অনা বাইকখন বোকাখাতত বিক্ৰী কৰাৰ বাবে চেষ্টা চলোৱাৰ তথ্য আৰক্ষীয়ে লাভ কৰিছিল। আৰু এই তথ্যৰ আধাৰতে যুৱক তিনিজনক আটক কৰিবলৈ সক্ষম হয়।
পালচাৰ খনৰ উপৰি আৰু বহু বাইক অসমৰ বিভিন্ন স্থানৰ পৰা চুৰি কৰি এই বাইক চুৰি চক্ৰটোৱে বিক্ৰী কৰিছিল বুলি আৰক্ষীৰ তথ্যত প্ৰকাশ পাইছে। আনহাতে দলটোৰ সৈতে আৰু বহু লোক জড়িত থকাৰ কথাও অৱগত কৰিছে বোকাখাত আৰক্ষীয়ে।
