৩ জানুৱাৰিত বাক্সা জিলাৰ তামুলপুৰ থানাৰ অন্তৰ্গত ডিমিলাপাৰাত দিন দুপৰতে সংঘটিত এটা ডকাইতিকাণ্ডৰ ঘটনাই সমগ্ৰ অঞ্চলটোতে তীব্ৰ চাঞ্চল্যৰ সৃষ্টি কৰাৰ লগতে আৰক্ষীৰ স্থিতি সন্দৰ্ভতো সচেতন মহলে প্ৰশ্ন উত্থাপন কৰে।
জানিব পৰা অনুসৰি তামুলপুৰৰ বন্ধন বেংকত কৰ্মৰত নুৰুল হুছেইনে অইন দিনাৰ দৰে ৩ জানুৱাৰিৰ দিনাও বিভিন্ন গোটৰ পৰা সাপ্তাহিক কিস্তি সংগ্ৰহ কৰাৰ উদ্দেশ্যে মাজদিয়া, ডুমুৰীয়া আৰু শালমাৰাৰ গাঁৱলৈ গৈছিল। হুছেইনে সাপ্তাহিক কিস্তিখিনি সংগ্ৰহ কৰি আহি থাকোতেই ডিমিলাপাৰাত দুজন অচিনাক্ত যুৱকে আগভেটি ধৰি পিষ্টল দেখুৱাই নগদ ৯১,৭৭০ টকা লুট কৰি নিয়ে।
উল্লেখ্য যে বেংকৰ কৰ্মচাৰীজনে এ এছ-২৫ কে-২৭৪০ নম্বৰৰ মটৰ চাইকেলখনৰে আহি থাকোতেই এখন নম্বৰবিহীন ক’লা ৰঙৰ পালছাৰ মটৰ চাইকেলত মুখত ৰুমাল বান্ধি অহা যুৱকদ্বয়ে কৰ্মচাৰীজনক পিষ্টল দেখুৱাই নগদ ধনখিনি লুট লৈ যায়।
এই ঘটনাৰ পাছতে ভুক্তভোগী যুৱকজনে তামুলপুৰ থানাত খবৰ দিয়াত তামুলপুৰ থানাৰ ভাৰপ্ৰাপ্ত বিষয়া অসীম বৰা আৰু তামুলপুৰ মহকুমা আৰক্ষী বিষয়া অসীমা কলিতাসহ এটি আৰক্ষীৰ দল ঘটনাস্থলীত উপস্থিত হৈ ঘটনাৰ প্ৰাৰম্ভিক তদন্ত আৰম্ভ কৰে।
উল্লেখ্য যে আজি দুমাহ পূৰ্বে নৰ্থ-ইষ্ট স্মল ফাইনেন্স বেংক লিমিটেডৰ দুগৰাকী কৰ্মচাৰীৰ পৰাও দুজন অচিনাক্ত দুৰ্বৃত্তই টকা লুটি লৈ যোৱাৰ দৰে ঘটনা সংঘটিত হৈছিল। জিলাখনৰ তামুলপুৰত এনেদৰে সঘনাই ডকাইতি কাণ্ড সংঘটিত হৈ থকাটোৱে সাধাৰণ ৰাইজৰ মাজত প্ৰতিক্ৰিয়া সৃষ্টি কৰাৰ লগতে অঞ্চলটোত তামুলপুৰ আৰক্ষীৰ ফোপোলা স্বৰূপ পোহৰলৈ আহিছে।
