উত্তৰ-পূৰ্বাঞ্চলৰ ১১ টাকৈ ৰাজনৈতিক দলে মঙলবাৰে এখন অভিৱৰ্তনত মিলিত হৈ সৰ্বসন্মতভাৱে নাগৰিকত্ব সংশোধনী বিধেয়ক ২০১৬’ৰ বিৰোধিতা কৰাৰ সিদ্ধান্ত গ্ৰহণ কৰে।
উক্ত অভিৱৰ্তনত নেশ্যনেল পীপলছ পাৰ্টিৰ (এনপিপি)ৰ মুৰব্বী তথা মেঘালয়ৰ মুখ্য মন্ত্ৰী কনৰাড চাংমা আৰু মিজো নেশ্যনেল ফ্ৰন্টৰ (এমএনএফ) মুৰব্বী তথা মিজোৰমাৰ মুখ্য মন্ত্ৰী জোৰামথাংগাকে ধৰি উত্তৰ-পূৰ্বাঞ্চলৰ সাতখন ৰাজ্যৰ ৰাজনৈতিক দলবোৰৰ প্ৰতিনিধিয়ে অংশগ্ৰহণ কৰে।
‘’আমি একেলগে বিধেয়কখনৰ বিৰোধিতা কৰো। আমি বিশ্বাস কৰো যে বিধেয়কখন গৃহীত হ’লে অসমৰ লগতে উত্তৰ-পূৰ্বাঞ্চলৰ আন অংশৰ খিলঞ্জীয়া লোকৰ জীৱন আৰু পৰিচয়ৰ প্ৰতি ভাবুকিৰ সৃষ্টি কৰিব,’’-মিজোৰামৰ মুখ্য মন্ত্ৰী জোৰামথাংগাই কয়।
‘’কেন্দ্ৰীয় চৰকাৰে নাগৰিকত্ব সংশোধনী বিধেয়ক ২০১৬’ গৃহীত কৰিবলৈ লোৱা পদক্ষেপৰ বিষয়টো বিবেচনা কৰিয়েই স্বাভাৱিকতে এই অভিৱৰ্তন অনুষ্ঠিত হৈছে। আমি আজি বিধেয়কখনৰ বিৰোধিতা কৰিবলৈ এটা যৌথ প্ৰস্তাৱ গ্ৰহণ কৰিছো,’’- মঙলবাৰে অভিৱৰ্তনখন সমাপ্ত হোৱাৰ পাছত সংবাদম মাধ্যমৰ আগত অভিৱৰ্তনখনৰ আহ্বায়ক তথা মেঘালয়ৰ মুখ্য মন্ত্ৰী কনৰাড চাংমাই এইদৰে কয়।
তেওঁ লগতে বিধেয়কখন বাতিলৰ দাবীত প্ৰধান মন্ত্ৰী নৰেন্দ্ৰ মোদী আৰু ৰাষ্ট্ৰপতি ৰামনাথ কোবিন্দক সাক্ষাৎ কৰিবলৈ এটা প্ৰতিনিধি দল প্ৰেৰণৰ সিদ্ধান্তৰ কথা সদৰী কৰি কয়, ‘’ অভিৱৰ্তনে লগতে জাতিধ্বংসী বিধেয়কখনৰ সন্দৰ্ভত কেন্দ্ৰীয় চৰকাৰে গ্ৰহণ কৰা তেওঁলোকৰ স্থিতি পুনৰ বিবেচনা কৰাৰ বাবে আহ্বান জনাবলৈ সিদ্ধান্ত গ্ৰহণ কৰিছে।‘’
আনহাতে, দলকেইটাই ৰাষ্ট্ৰীয় গণতান্ত্ৰিক মৰ্চা (এনডিএ) বা নৰ্থইষ্ট ডেম’ক্ৰেটিক এলাইয়েন্স (নেডা)ৰ পৰা ওলাই আহিব নেকি বুলি সোধা প্ৰশ্নৰ উত্তৰত চাংমাই কয় যে অভিৱৰ্তনখন কোনো ৰাজনৈতিক উদ্দেশ্য আগত ৰাখি অনুষ্ঠিত কৰা হোৱা নাই। ‘’এই মুহূৰ্তত সেই বিষয়ে মন্তব্য কৰাটো সঠিক নহ’ব। আমি আশা কৰো যে কেন্দ্ৰীয় চৰকাৰে তেওঁলোকৰ স্থিতি পুনৰ বিবেচনা কৰিব। নাগৰিকত্ব সংশোধনী বিধেয়ককলৈ আমাৰ সমস্যাটোৰ বাবে এই অভিৱৰ্তনৰ আয়োজন কৰা হৈছে আৰু আমাৰ অঞ্চলটোৰ জনসাধাৰণৰ প্ৰতি দায়বদ্ধতা আছে। আমি প্ৰধান মন্ত্ৰী আৰু ৰাষ্ট্ৰপতিক সাক্ষাৎ কৰাৰ সিদ্ধান্ত গ্ৰহণ কৰিছো আৰু ভৱিষ্যতেও আমাৰ ভৱিষ্যৎ কাৰ্যপন্থা লৈ পুনৰ সাক্ষাৎ কৰিম,’’-চাংমাই কয়।
মঙলবাৰৰ এই অভিৱৰ্তনত অংশগ্ৰহণ কৰা দলসমূহৰ ভিতৰত আছিল নেশ্যনেল পীপলছ পাৰ্টিৰ (এনপিপি), মিজো নেশ্যনেল ফ্ৰন্টৰ (এমএনএফ), অসম গণ পৰিষদ(অগপ), পীপলছ ডেমক্ৰেটিক ফ্ৰন্ট (পিডিএফ), য়ুনাইটেড ডেম’ক্ৰেটিক পাৰ্টি (য়ুডিপি), হিলছ ষ্টেট পীপলছ ডেম’ক্ৰেটিক পাৰ্টি (এইচএছপিডিপি), ইণ্ডিজেনাছ পীপলছ ফ্ৰন্ট অফ ত্ৰিপুৰা(আইপিএফটি), নাগা পীপলছ ফ্ৰন্ট (এনপিএফ),এনডিপিপি, কেএনএইচএএম আৰু জে ডি(য়ু)।
