অৰুণাচল প্ৰদেশৰ নামনি দিবং ভেলীত মুখ্য কাৰ্যালয় থকা সদৌ ইদু মিচিমি ছাত্ৰ সন্থাই (এআইএমএছয়ু) স্থায়ী বাসিন্দাৰ প্ৰমান পত্ৰ আৰু আৰক্ষীৰ গুলীত প্ৰতিবাদকাৰী নিহত হোৱাৰ ঘটনাক লৈ আজি ১২ ঘন্টীয়া বন্ধ তথা গণ সমাৱেশৰ আয়োজন কৰিছে।
সদৌ ইদু মিচিমি ছাত্ৰ সন্থাৰ সভাপতি মাপু মিহু আৰু সাধাৰণ সম্পাদক মম্পা লিংগিয়ে প্ৰকাশ কৰা এক জাননী অনুসৰি পুৱা ৫ বজাৰ পৰা আৰম্ভ হোৱা বন্ধ সন্ধিয়া ৫ বজাত সামৰণি পৰিব। তদুপৰি, পুৱা ৯-৩০ বজাত অ’ল্ড ৰ’ইং গেইটত সমাৱেশ অনুষ্ঠিত হ’ব।
সদৌ ইদু মিচিমি ছাত্ৰ সন্থাৰ নেতাদ্বয়ে জাৰি কৰা জাননী যোগে ৰাজ্যখনৰ সকলো জনসাধাৰণক নামচাই আৰু চাংলাং জিলাত বাস কৰা ছয়টা অনা অৰুণাচলী জনজাতিক স্থায়ী বাসিন্দাৰ প্ৰমান পত্ৰ দিয়াৰ বিৰুদ্ধে প্ৰতিবাদ জনাই আয়োজন কৰা ধৰ্মঘট তথা গণ সমাৱেশৰ কাৰ্যসূচীত সহযোগ কৰাৰ বাবে আহ্বান জনাইছে।
সন্থাই লগতে উল্লেখ কৰিছে যে এই ধৰ্মঘট আৰু গণ সমাৱেশ অৰুণাচল প্ৰদেশৰ খিলঞ্জীয়া জনসাধাৰণৰ অধিকাৰ সুৰক্ষাৰ বাবে মূল্যবান জীৱন আহুতি দিয়া ‘নিৰীহ লোক’ৰ হত্যাৰ প্ৰতিবাদত আয়োজন কৰা হৈছে।
তেওঁলোকে লগতে জনসাধাৰণক গণ সমাৱেশত উপস্থিত থাকি শক্তি প্ৰদৰ্শনৰ বাবে আহ্বান জনায়।
স্থায়ী বাসিন্দাৰ প্ৰমান পত্ৰক লৈ অশান্ত হৈ পৰাৰ পাছত অৰুণাচল চৰকাৰে স্পষ্ট কৰি দিছে যে চৰকাৰে ছয়টা অনা অৰুণাচলী জনজাতিক স্থায়ী বাসিন্দাৰ প্ৰমান পত্ৰ দিয়াৰ বিষয়ত কোনো পদক্ষেপ গ্ৰহণ নকৰে।
নিজৰ টুইটাৰ যোগে এই কথা প্ৰকাশ কৰি কেন্দ্ৰীয় গৃহ ৰাজ্য মন্ত্ৰী কিৰেন ৰিজিজুৱে দেওবাৰে কয়, ‘’ অৰুণাচল প্ৰদেশ চৰকাৰে ইতিমধ্যে স্থায়ী বাসিন্দাৰ প্ৰমান পত্ৰ গ্ৰহণ নকৰাৰ এক নিৰ্দেশনা গ্ৰহণ কৰিছে। শান্তিৰ স্বাৰ্থত ইজনে সিজনক দোষাৰোপ কৰাৰ সলনি একেলগে আগবাঢ়ি অহা উচিত। হিংসাৰ ফলত নিৰীহ লোকে প্ৰাণ হেৰুৱাবলগীয়া হোৱাটো অত্যন্ত দুর্ভাগ্যজনক।‘’
