চৈয়দ মুস্তাক আলী টি-২০ ক্ৰিকেট প্ৰতিযোগিতাৰ পূব মণ্ডল লীগৰ এখন খেলত কালি অসম ঝাৰখণ্ডৰ হাতত আঠ উইকেটত পৰাজিত হয়। ঝাৰখণ্ডৰ নিয়ন্ত্ৰিত ব’লিং সত্ত্বেও অসমে ১৪৮ ৰানৰ সন্তোষজনক স্ক’ৰ কৰে যদিও দুৰ্বল দলৰ ব’লিঙৰ বাবে ঝাৰখণ্ডই সহজেই মাত্ৰ দুই উইকেট খৰচ কৰিয়েই আৰু চাৰি অ’ভাৰ বাকী থকা অৱস্থাতে প্ৰয়োজনীয় ৰানখিনি সংগ্ৰহ কৰে।
অসম দলটোৰ হৈ শিৱশংকৰ ৰয়ে সৰ্বাধিক ৫২ ৰান আৰু অমিত সিনহাই ৪০ ৰান কৰে। ঝাৰখণ্ডৰ মনু কুমাৰে অসমৰ তিনিটা উইকেট লয় (৩/23)।
ঝাৰখণ্ডৰ হৈ ইশান্ত জাগিয়ে ৬৮ ৰানৰ অপৰাজিত ইনিংছ খেলি দলক লক্ষ্যত উপনীত হোৱাত সহায় কৰে।
আনহাতে ৰাঁচিত হোৱা প্ৰতিযোগিতাৰ পূব মণ্ডলৰ আন এখন খেলত বেংগলে ত্ৰিপুৰাক ন উইকেটত পৰাজিত কৰে। বেংগলৰ অপেনাৰদ্বয় শ্ৰীবৎস গোস্বামী আৰু বিবেক সিঙে দ্ৰুততাৰে অৰ্ধশতক কৰি জয়ৰ লক্ষ্যত দলক উপনীত কৰায়। প্ৰতিযোগিতাখনত দলটোৰ অপৰাজেয় ধাৰা অব্যাহত ৰখাত দুয়োজন অপেনাৰে গুৰুত্বপূৰ্ণ ভূমিকা লয়। এই জয়েৰে বংগ ক্ৰমাগত তৃতীয়খন খেলত অপৰাজেয় হৈ ৰ’ল। গোস্বামীয়ে ৫৭ বলত ৮২ ৰান কৰি অপৰাজিত থাকে আৰু সিঙে মাত্ৰ ৪৩ বলত ৭১ কৰে। অধিনায়ক মনোজ তিৱাৰীয়েও ১৫ ৰান কৰি অপৰাজিত হৈ থাকে।
ইয়াৰ পূৰ্বে ত্ৰিপুৰাই ১৬৯ ৰানৰ প্ৰত্যাহ্বানমূলক স্ক’ৰ থিয় কৰায়। তেওঁলোকৰ উইকেট কীপাৰ স্মিত পেটেলে ৫৭ বলত ৭৩ ৰান কৰাৰ উপৰকি উদয়ন বসুৱে ২২, যশপাল সিঙে ২৪ আৰু গুৰিন্দৰ সিঙে ২৫ ৰান কৰে। কিন্তু বংগ দুই অ’ভাৰ বাকী থকা অৱস্থাতে এই লক্ষ্য অতিক্ৰম কৰিবলৈ সক্ষম হয়।
