অহা ২৫ মাৰ্চত ৰাজ্যৰ ৩৯ হাজাৰ প্ৰাথমিক বিদ্যালয় পৰিচালনা সমিতি আৰু ৰাইজৰ ১০ জনকৈ প্ৰতিনিধি লৈ গুৱাহাটীত ৩ লাখ ৯০ হাজাৰ লোকৰ এক বিশাল প্ৰতিবাদী সমাৱেশ অনুষ্ঠিত কৰা হ’ব। এই কথা অসম ৰাজ্যিক প্ৰাথমিক শিক্ষক সন্মিলনীৰ সভাপতি জীৱন চন্দ্ৰ বৰা আৰু প্ৰধান সম্পাদক ৰাতুল চন্দ্ৰ গোস্বামীয়ে জানিবলৈ দিয়ে।
উল্লেখযোগ্য যে ৰাজ্যৰ শিক্ষকৰ আন্দোলনক উপলুঙা কৰা অসমৰ শিক্ষা মন্ত্ৰীক শুকুৰবাৰে অৰ্থাৎ ৮ মাৰ্চত সতৰ্ক কৰি দিয়ে অসম ৰাজ্যিক প্ৰাথমিক শিক্ষক সন্মিলনীৰ সভাপতি জীৱন চন্দ্ৰ বৰা আৰু প্ৰধান সম্পাদক ৰাতুল চন্দ্ৰ গোস্বামীয়ে।
লগতে শুকুৰবাৰে গুৱাহাটীত গুণোৎসৱৰ ফলাফল ঘোষণা কৰা অনুষ্ঠানত শিক্ষা মন্ত্ৰী গৰাকীয়ে আন্দোলনকাৰী প্ৰাথমিক শিক্ষক সন্মিলনীক ‘মই কেতিয়াও ৰঙা চকুক ভয় নকৰো’ বুলি কৰা মন্তব্যক তীব্ৰ ভাষাৰে গৰিহণা দিয়ে সন্মিলনীৰ নেতৃবৃন্দই।
তাৰোপৰি শিক্ষা মন্ত্ৰী গৰাকীৰ বক্তব্যৰ প্ৰতিক্ৰিয়া প্ৰকাশ কৰি অসম ৰাজ্যিক প্ৰাথমিক শিক্ষক সন্মিলনীৰ সভাপতি আৰু সম্পাদক দয়ে কয় যে, ‘শিক্ষামন্ত্ৰীক ৰঙাচকু দেখুৱাৰ কাম আমাৰ নহয় আৰু আমাক ভাবুকি দিয়াৰ কামো শিক্ষা মন্ত্ৰীৰ নহয়। চৰকাৰৰ ওচৰত আমি কোনো নতুন দাবীও কৰা নাই। আমি মাত্ৰ প্ৰাপ্যহে বিচাৰিছো। প্ৰাপ্য বিচাৰি কৰা আমাৰ আন্দোলনে শিক্ষাৰ্থীৰো একো অনিষ্ট কৰা নাই। কিন্ত এনেদৰে দি থকা ভয় ভাবুকি চলি থাকিলে আন্দোলনে ভয়াৱহ ৰূপো ল’ব পাৰে।’
