‘অসমৰ সৰ্বাংগীন উন্নয়নৰ শ্লোগানেৰে শাসনভাৰ দখল কৰা বিজেপিয়ে কংগ্ৰেছৰ বাটেৰে বাট বুলিছে। উন্নয়নৰ নামত ফটাঢোল বজাই বিজ্ঞাপন আৰু আঁচনিৰ পোহাৰ মেলা বিজেপি চৰকাৰে অসমৰ কিমান উন্নয়ন সাধিছে তাৰ প্ৰমাণ ৰাষ্ট্ৰীয় ঘাইপথ সমূহৰ দুৰৱস্থাই স্পষ্ট কৰি তুলিছে’। এইদৰে বিজেপিক তীব্ৰ সমালোচনা কৰিছে আছুৰ মুখ্য উপদেষ্টা সমুজ্জ্বল ভট্টাচাৰ্যই।
আজি গোলাঘাটৰ চুবুৰীয়া জিলা কাৰ্বি আংলঙৰ বোকাজানত ছাত্ৰ সন্থাই আয়োজন কৰা নাচিৰ হুছেইন সোঁৱৰণি ভলীবল প্ৰতিযোগিতাৰ উদ্বোধনী অনুষ্ঠানত অংশ ল’বলৈ গৈ আছুৰ মুখ্য উপদেষ্টা ভট্টাচাৰ্যই ৩৬ নং আৰু ৩৯ নং ৰাষ্ট্ৰীয় ঘাইপথৰ দুৰৱস্থাত স্তম্ভিত হৈ এনেদৰে বিজেপি চৰকাৰক তীব্ৰ সমালোচনা কৰে।
উল্লেখযোগ্য যে অসমৰ নগাঁও জিলাৰ পৰা নাগালেণ্ডৰ ডিমাপুৰলৈকে থকা ৩৬ নং ৰাষ্ট্ৰীয় ঘাইপথ আৰু গোলাঘাট জিলাৰ নুমলীগড়ৰ পৰা মণিপুৰৰ ম’ৰে পৰ্যন্ত বিস্তৃত হৈ থকা ৩৯ নং ৰাষ্ট্ৰীয় ঘাইপথটো বিগত বৰ্ষৰ এপ্ৰিলৰ পৰা দেশৰ ২ নং ৰাষ্ট্ৰীয় ঘাইপথলৈ উন্নীত কৰা হ’ল যদিও পথৰ জৰাজীৰ্ণ অৱস্থাই পথচাৰীক এতিয়া জ্বলাকলা খুৱাইছে।
পথ দুটাৰ মাজত সৃষ্টি হোৱা বৃহৎ বৃহৎ গাঁতৰ বাবে বিভিন্ন দুৰ্ঘটনা সংঘটিত হোৱাৰ পাছতো অসম চৰকাৰৰ সংশ্লিষ্ট কৰ্তৃপক্ষই পথ দুটা মেৰামতিৰ বাবে কাৰ্যতঃ একো ব্যৱস্থা গ্ৰহণ নকৰাৰ অভিযোগ উত্থাপিত হৈছে।
ৰাষ্ট্ৰীয় ঘাইপথৰ এনে দুৰৱস্থাৰ বাবেই আছুৰ উপদেষ্টাগৰাকীয়ে বিজেপি চৰকাৰৰ দিনত উন্নয়নমুখী অসমত জনসাধাৰণে ঘাইপথৰ মাজত থকা গাঁতেৰে যাতায়ত কৰাৰ পৰিৱৰ্তে গাঁতৰ মাজত থকা ঘাইপথেৰে যাতায়াত কৰিব লগীয়া হৈছে বুলি কটাক্ষ কৰিছে আৰু শীঘ্ৰে পথ দুটাৰ মেৰামতিৰ দাবী জনাইছে।
মন কৰিব লগীয়া যে ৩৯ নং ৰাষ্ট্ৰীয় ঘাইপথটো এছিয়ান হাইৱে ১ হিচাবে স্বীকৃতি হ’ল যদিও এছিয়াৰ বিভিন্ন দেশৰে সংযুক্ত পথ হিচাবে এতিয়াও ইয়াৰ আন্তঃগাঁথনি তৈয়াৰ হোৱা নাই। গতিকে লোকসভা নিৰ্বাচনৰ প্ৰাকক্ষণত প্ৰতিদিনে ন ন আঁচনি মুকলি কৰা চৰকাখনে ঘাইপথ দুটাৰ মেৰামতিৰ ক্ষেত্ৰত সু-দৃষ্টি দিয়ে নে নিদিয়ে সেইয়া পৰৱৰ্তী সময়ত লক্ষ্যণীয় হ’ব।
