দুদিনীয়া নিৰ্বাচনী প্ৰচাৰ কাৰ্য্যসূচীলৈ উত্তৰ-পূৱ ভ্ৰমণলৈ অহা কংগ্ৰেছৰ ৰাষ্ট্ৰীয় সভাপতি ৰাহুল গান্ধীয়ে আজি অৰুণাচলৰ ইটানগৰৰ বিশাল জনসভাত অংশলৈ কোনো পৰিস্থিতিতে কংগ্ৰেছ দলে নাগৰিকত্ব সংশোধনী বিধেয়ক গৃহীত কৰিবলৈ নিদিয়ে বুলি মন্তব্য কৰে।
অৰুণাচল প্ৰদেশ, মণিপুৰ আৰু ত্ৰিপুৰাত নিৰ্বাচনী প্ৰচাৰ অভিযান শুভাৰম্ভ কৰিবলৈ আহি ৰাহুল গান্ধীয়ে ইটানগৰত বিজেপিৰ বিৰুদ্ধে আক্ৰমনাত্মক হৈ পৰে। বিশাল জনসভাক সম্বোধি গান্ধীয়ে উত্তৰ-পূৱৰ জনসাধাৰণৰ ভাষা, সংস্কৃতি ধ্বংস কৰিব বিচৰা নাগৰিকত্ব সংশোধনী বিধেয়ক কংগ্ৰেছে সদায় বিৰোধিতা কৰি যাব বুলি কয়।
জনসভাত ৰাহুলে অৰুণাচল প্ৰদেশক আৰু অধিক পথ, চিকিৎসালয়, বিমানবন্দৰ আদিৰ প্ৰয়োজন বুলি উল্লেখ কৰি কংগ্ৰেছ চৰকাৰে উত্তৰ-পূৰ্বাঞ্চলক বিশেষ মৰ্য্যদা প্ৰদান কৰিছিল কিন্তু বৰ্তমানৰ চৰকাৰে সেই মৰ্য্যদা কাঢ়ি নিয়া বুলি মন্তব্য কৰে। বৰ্তমান অৰুণাচলৰ জনসাধাৰণে নিজে নিজৰ সিদ্ধান্ত ল’ব নোৱাৰা হৈ পৰিছে নতুন দিল্লীয়েহে ৰাজ্যখনৰ জনসাধাৰণৰ সিদ্ধান্ত লয় বুলি বিজেপিক কটাক্ষ কৰে কংগ্ৰেছ সভাপতি গৰাকীয়ে।
আনহাতে, বিজেপিয়ে উত্তৰ-পূৱত ঔদ্যোগিক নীতি ধ্বংস কৰা বুলি অভিযোগ কৰি কেন্দ্ৰত য়ু পি এ চৰকাৰ ক্ষমতাত আহিলে সমগ্ৰ অঞ্চলটোৰ উন্নয়ণৰ বাবে চৰকাৰে নতুন ঔদ্যোগিক নীতি গ্ৰহণ কৰিব বুলি কয়।
বিজেপিয়ে নিজৰ আদৰ্শ সদায় আনৰ ওপৰত জাপি দিব বিচাৰে আমি বিজেপিক নিজৰ আদৰ্শত বাধা নিদিও কিন্তু উত্তৰ-পূৱৰ ওপৰত এই আদৰ্শ কেতিয়াও জাপি দিবলৈ দিয়া নহ’ব বুলি ৰাহুল গান্ধীয়ে সভাত মন্তব্য কৰে।
