লোকসভা নিৰ্বাচনৰ দিন চমু চাপি অহাৰ পৰিপ্ৰেক্ষিতত শিৱসাগৰ জিলাত শান্তি শৃংখলাৰ পৰিস্থিতি বিঘ্নিত হেৱাৰ আশংকা কৰি আৰু জনজীৱন তথা সম্পত্তিৰ নিৰাপত্তাৰ প্ৰতি লক্ষ্য ৰাখি শিৱসাগৰ জিলাৰ অতিৰিক্ত জিলা দণ্ডাধীশ বিজিত দাসে সমগ্ৰ শিৱসাগৰ জিলাত তৎকালে বলবৎ হোৱাকৈ ভাৰতীয় ফৌজদাৰী কাৰ্যবিধি আইনৰ ১৪৪ ধৰাৰ অধীনত নিষেধাজ্ঞা জাৰি কৰিছে।
এই নিষেধাজ্ঞা অনুসৰি ৰাজহুৱা স্থানত পাঁচজন বা তাতোধিক লোকৰ সমাবেশ, সভা সমিতি পতা, শোভাযাত্ৰা উলিওৱা, শ্বহীদ বেদী নিৰ্মাণ, দেৱাল লিখন, শ্ল’গান ছপা কৰা, কোনো ব্যক্তি বা ব্যৱসায়িক প্ৰতিষ্ঠান কাৰ্যালয় আদিত কোনো ধৰণৰ বৰঙনি সংগ্ৰহ কৰা নিষিদ্ধ কৰা হৈছে।
জিলাখনত অসামাজিক লোক তথা উগ্ৰপন্থীৰ আইন বিৰুদ্ধ কাৰ্যকলাপ, গুলিচালনা, হত্যা, অপহৰণ বা ধনলুটৰ আশংকা কৰি দুচকীয়া বাহনত দুজন বা তাতোধিক লোক উঠা নিষিদ্ধ কৰিছে। অৱশ্যে ৬০ বছৰ উৰ্দ্ধৰ লোক, ১২ বছৰ বয়সৰ তলৰ লৰা ছোৱালী, মহিলা, চৰকাৰী বিষয়া কৰ্মচাৰী আৰু আৰক্ষীৰ লোকক এই নিষেধাজ্ঞাৰ পৰা ৰেহাই দিয়া হৈছে।
আনহাতে জনস্বাস্থ্যৰ প্ৰতি ভাবুকি অহা ৫০০ মাইক্ৰু ঘনত্বৰ কম প্লাষ্টিক কেৰীবেগ, যি কোনো ধৰণৰ ধপাত বা ধপাত জাতীয় সামগ্ৰী যেনে গুটখা, তিৰংগা, শিখৰ, আদি বেচা কিনা বন্ধ কৰি দিয়া হৈছে জিলাখনত।
ইয়াৰোপৰি অসম নাগালেণ্ড সীমান্তত ৰাতি সান্ধ্য আইন প্ৰৱৰ্তন কৰি সীমান্তৰ ৫ কিলোমিটাৰ পৰিধিৰ ভিতৰত সন্ধিয়া ৬ বজাৰ পৰা পুৱা ৬ বজালৈ যি কোনো ব্যক্তিৰ বা গোট আৰু গাড়ী মটৰৰ চলাচল নিষিদ্ধ কৰা হৈছে।
এই নিষেধাজ্ঞা সমূহ তৎকালীনভাৱে বলবৎ কৰা হৈছে আৰু ৬০ দিনলৈ বা পুনৰ আদেশ নিদিয়া পৰ্যন্ত বাহাল থাকিব। এই আদেশ অমান্য কৰা সকলৰ ওপৰত ভাৰতীয় দণ্ডাবিধি আইন ১৮৮ ধাৰা অনুসৰি শাস্তি বিহা হ’ব বুলি এক বিজ্ঞপ্তিৰ জৰিয়তে জিলা প্ৰসাশনে সদৰী কৰিছে।
