বৰপেটা জিলাৰ হাউলীত নিজ গৰ্ভৱতী পত্নীক ডিঙি চেপি হত্যা কৰা ঘটনাক লৈ সমগ্ৰ অঞ্চলটোত চাঞ্চল্য বিৰাজ কৰি থকাৰ সময়তে আজি হাউলী আৰক্ষীয়ে অপৰাধী স্বামী শুকুৰ আলীক আটক কৰে।
ঘটনাৰ বিবৰণী অনুসৰি হাউলী আৰক্ষী থানাৰ অন্তৰ্গত দাবালিয়াপাৰা গাঁৱৰ হাবেল উদ্দিনৰ পুত্ৰ শুকুৰ আলীয়ে শুকুৰবাৰে পত্নী ৰৌশনাৰা খাতুন(২২)ৰ লগত অতি সামান্য কথাত কাজিয়া লাগে। কাজিয়াৰ পৰিণতিতে শুকুৰ আলীয়ে পত্নী ৰৌশানাৰাক ডিঙি চেপি হত্যা কৰে।
আনহাতে, ঘটনা সংঘটিত কৰি অপৰাধী শুকুৰ আলীয়ে মৃতদেহটো ৰছীৰে ওলোমাই থৈ আত্মহত্যাৰ ৰূপ দিবলৈ চেষ্টা কৰিছিল। ঘটনা সন্দৰ্ভত ৰৌশানাৰাৰ ভাতৃৰ সন্দেহ ওপজাত হাউলী আৰক্ষী থানাত শুকুৰ আলী আৰু দেউতাক হাবেল উদ্দিনৰ বিৰুদ্ধে এখন এজাহাৰ দাখিল কৰে।
এজাহাৰৰ ভিত্তিত আৰক্ষীয়ে ভাৰতীয় দণ্ডবিধি আইনৰ ৩০২/৩৪ ধাৰাৰ অধীনত ১৪২/১৯ নম্বৰত এটা গোচৰ ৰুজু কৰি দুয়োকো আটক কৰি জেল হাজোতলৈ প্ৰেৰণ কৰে।
উল্লেখযোগ্য যে, পাঁচ বছৰ পূৰ্বে সামাজিকভাবে শুকুৰ আলীৰ লগত বিবাহ পাশত আবদ্ধ হোৱাৰ কিছু দিন পাছৰে পৰা ৰৌশানাৰাৰ ওপৰত স্বামী আৰু শহুৰেকে অকথ্য মানসিক আৰু শাৰীৰিক নিৰ্যাতন চলাই অহাৰ অভিযোগ উত্থাপন কৰিছে স্থানীয় ৰাইজে।
