বোকাখাতৰ কেন্দ্ৰীয় বিহুতলিত আজিৰ পৰা দুদিনীয়া কাৰ্যসূচীৰে গোলাঘাট জিলা চুতীয়া জাতি ছাত্ৰ সন্থাৰ দ্বিবাৰ্ষিক অধিৱেশন আৰম্ভ হৈছে ৷ বোকাখাত মহকুমা চুতীয়া ছাত্ৰ সন্থাৰ উদ্যোগত অনুষ্ঠিত অধিৱেশনৰ আজি প্ৰথম দিনা মূল তোৰণ উদ্বোধন কৰে আপকুৰ প্ৰতিষ্ঠাপক সভাপতি জ্যেষ্ঠ সাংবাদিক ভবেশ শইকীয়াই।
সন্থাৰ পতাকা উত্তোলন কৰে গোলাঘাট জিলা চুতীয়া ছাত্ৰ সন্থাৰ সভপতি পাপু শইকীয়াই, স্মৃতি তৰ্পন কৰে জিলা সম্পাদক ৰিতু শইকীয়াই। বৃক্ষ ৰোপন কৰে সমাজ সেৱক দেৱ প্ৰদীপ বৰাই ৷ সতী সাধনীৰ প্ৰতিকৃতিত মাল্যাপৰ্ণ কৰে উদযাপন সমিতিৰ সভাপতি প্ৰশান্ত শইকীয়াই ৷ চুতীয়া জাতিৰ দেও কুবেৰৰ শিলিতা কাৰ্যসূচী পৰিচালনা কৰে বৰ দেউৰী প্ৰতাপ চন্দ্ৰ নেওগে ৷
ছাত্ৰ-ছাত্ৰীৰ মাজত অনুষ্ঠিত চিত্ৰাঙ্কন আৰু ৰচনা প্ৰতিযোগিতাৰে আৰম্ভ হোৱা প্ৰথম দিনৰ কাৰ্যসূচীত ৰচনা প্ৰতিযোগিতা উদ্বোধন কৰে প্ৰবীন শিক্ষক খগেন বৰাই ৷ চিত্ৰাঙ্কন প্ৰতিযোগিতা উদ্বোধন কৰে লেখিকা সুৱৰ্ণ শইকীয়া বৰদলৈয়ে আৰু কুইজ প্ৰতিযোগিতা উদ্বোধন কৰে অধ্যাপক নিতুল কুমাৰ বৰাই।
সন্ধিয়া সন্থাৰ জিলা সভাপতি পাপু শইকীয়াৰ পৌৰহিত্যত অনুষ্ঠিত হয় প্ৰতিনিধি সভা। উদ্বোধন কৰে সদৌ অসম চুতীয়া ছাত্ৰ সন্থাৰ সহকাৰী সম্পাদক লক্ষী বৰাই লগতে কেন্দ্ৰীয় বিহুতলি মঞ্চত আয়োজিত সাংস্কৃতিক সন্ধ্যাত স্থানীয় শিল্পীয়ে অনুষ্ঠান পৰিবেশন কৰে। সাংস্কৃতিক সন্ধ্যা উদ্বোধন কৰে মহকুমা আৰক্ষী বিষয়া কল্যান কুমাৰ দাসে।
